SIEMCHILBU 46

Jakob Izipt gam a apeisuhna

1Tuachi’n Israel, anei zousie toh ahing kipankhie a, Beer-sheba ahing tunga, apa Isaak Pasian kungah kithoinate alan hi. 2Tuachi’n, Pasian in Israel kungah zanlai a mangin ahoupi a, “Jakob, Jakob” achi hi, tualeh aman “Tanah um inge,” achi hi.

3Tualeh, Aman “Kei Pasian na pa Pasian ka hi, Izipt gam a peisuh ding zausin, tuanah nang apat nam thupitah in ka hing siemding hi,” achi hi. 4Tuachi’n Izipt gamah na kungah peisuh vangin tualeh pellouin hing puikhe tou kia vangin Joseph khut ngelin na mit asingsah ding hi.

5Tuachi’n, Jakob pen Beer-sheba apat apei a; Israel taten apa uh Jakob leh a taneute u’leh a zite uh tuonna ding a Pharoah in sakolleng ahahte ah a tuongsah uhi. 6#Nasep. 7.15Tuachi’n amaun Kanaan gam a a lamkhiet uh ganta leh neitahte hing puoin Izipt gamah ahing tung ua, Jakob leh ahahasuonte zousie toh. 7A tapate, atapate tapate, a tanute, a tapate tanute leh ahah a suonte zousie Izipt gamah ahing lutpita hi.

8Tualeh tamte khu Israel tate Izipt gam a hinglut Jakob leh a tapate min ahi. Reuben, Jakob tapa upapen. 9Reuben tapate Hanok, Pallu, Hezron leh Karmi. 10Simeon tapate: Jemuel, Jamin leh Ohad, Jachin leh Johar tualeh Kanaan numei khat toh anei, Shaul toh ahi uhi. 11Levi tapate Gershon, Kohath leh Merari. 12Tualeh Juda tapate Er leh Onan leh Shelah leh Perez leh Zerah; hinanleh Er leh Onam pen Kanaan gamah ashita uhi. Tualeh Perez tapate Hezron leh Hamul ahi uhi. 13Issakar tapate Tola, Puvah, Job leh Shimron. 14Zebulun tapate Sered leh Elon leh Jahleel. 15Tamte Leah tapate Padan-Aram gam a Jakob dinga ahin piehte a tanu Dinah toh ahi. A tapate leh a tanute a bawn un mi sawmthum leh thum ahi uhi.

16Gad tapate Ziphion, Haggi, Shuni, Ezbon, Eri, Arodi leh Areli ahi uhi. 17Asher tapate, Jimna, Ishuah, Ishui Beriah leh anaunu uh Serah tualeh Beriah tapate, Heber leh Malkiel. 18Tualeh Laban in atanu Leah kunga apieh Zilpah tapate ahi uhi. Tamte aman Jakob dinga ahinnpieh mi sawm leh guhte ahi uhi.

19Tualeh Jakob zi Rachel tapate Joseph leh Benjamin ahi uhi. 20#Siem. 41.50-52Tualeh Joseph in Izipt gamah tapa Manasseh leh Ephraim anei a, tuate khu On#On: Khu Hilopolis ahi khomin khat ahi kho siempu Potiphera tanu Asenath in ahinnpieh ahi. 21Tualeh Benjamin tapate Balah, Becher Ashbel, Gera, Naaman, Ehi, Rosh, Muppim, Huppim leh Ard ahi uhi. 22Tamte Rachel in Jakob dinga ahin pieh a tapate ahi, a bawn un sawm leh li ahi uhi.

23Dan tapa, Hushim ahi. 24Naphtali tapate Jahzeel, Guni, Jezer leh Shillem te ahi uhi. 25Tamte Laban in atanu Rachel kunga apieh Bilhah tapate ahi uh, aman tamte Jakob dinga ahinpieh ahi a bawnun sagi ahi uhi.

26Jakob tapate zite simlouin a tahsa a piengkhie Izipt gam a a lutpiteng bawnin mi sawm guh leh guh ahi uhi. 27#Nasep. 7.14Tualeh Joseph in Izipt gam a anei tapate ni ahi ua, Izipt gam a hinglut Jakob innkuonte zousie mi sawm sagi ahi uhi.

28Tuachi’n Jakob in Goshen gam lampi kawhmu dingin Juda pen Joseph kungah a sawl masa hi, tuachi’n Goshen gamah ahing tungta uhi. 29Tuachi’n Joseph in a sakolleng mansa in ana koia, Goshen ah apa dawn dingin apeitou a, a kungah akigen a, tualeh a ngawngkawi a sawtpi a ngawnga kiluoi in akap hi. 30Tualeh Israel in Joseph kungah, “Hing leh dam a na mel ka mu kia tah ziehin, tuin vang ka shi lezong shi taveng,” achi hi.

31Tuachi’n, Joseph in, a sanggamte leh apa innsung mite kungah, “peitou vangin Pharoah kungah, ka sanggamte leh ka pa innsung mite Kanaan gam a umte ka kungah hing tungta uh chiin vahil vang” achi hi. 32Amaute belam chingmi ahi ua, gan khawimi ahi ziehun, tualeh a belam honte u’leh a bawng honte u’leh anei alam zousie uh ahing puo uhi chiin vagen tavang achi hi. 33Tualeh hichi hing hivanin, Pharoah in ahing hat a noute, bang nasem na hi uoi chia ahing doh chiengin. 34Na suohte sepna pen kou leh ka pu ka pate ua kipanin ka neu lai ua pat tu dongin gan khawimi kahi uh nachi ding uhi. Tuachi’n Goshen gamah na teng thei ding uhi, achi hi. Aziehpen belam chingmi pouma Izipt mite dingin kidahhuoi ahi.

Currently Selected:

SIEMCHILBU 46: ZOUBSI

Highlight

Copy