SIEMCHILBU 39

Joseph in solna atuoh

1Tualeh Joseph khu Izipt gamah apui suh ua, Pharoah nuoi a milien veng pawlte lamkai, Izipt mi Potiphar in khuna hing puisuh Ishmael mite khut apat in aleita hi. 2#Nasep. 7.9Tualeh Mangpa’n Joseph aumpi a, tuachi’n mi lawching tah ahia, apu Izipt mi inn ah aum hi. 3Tualeh apu’n Mangpa’n ama aumpi a, asil bawl pouma ah Mangpa’n akhut ah a lawching sah chi a thei a. 4Tuachi’n Joseph in apu mitmu in hepina a tanga, ana asep pieh hi. Tuachi’n aman a innsung mite tungah vaisai in apangsah a, anei zousie a khutah a unin a koi sieng hi. 5Tuachi’n innsunga vaisai a akoi akipat tambang ahing hi a, Mangpa’n Izipt mi innsung, Joseph zal in a guolzawl ta hi. Inn leh gam a anei zousie tungah Mangpa guolzawlna aum hi. 6Tuachi’n aman anei zousie a unin Joseph khutah a koia, tuachiin ann neh chilou anei zousie bangma theiphah anei sih hi. Tualeh Joseph mi melhoi mama leh etlawm tah ahia. 7Tualeh tamte zouin hichi ahing hi a, apu zi in Joseph a dei et a, tuachiin “Hing luppi in” achi hi. 8Hinanleh ama a ut sih a, apu zi kungah “En in, ka puin tam innsung ah, ka kungah bang aum ei chi athei vateh sih hi, anei zousie a unin ka khutah ahing kemsah hi. 9Tam inn sungah keisanga lienzaw koima aum sih hi; a zi na hi ziehin nang chilou kei a dingin bangma it anei sih hi. Tuaziehin bang dingin tambang mawna lienpi bawl in, Pasian tungah sil gilou bawl in ka khiel thei diei?” achi hi. 10Tuachi’n hichi ahing ahia, ni chinin Joseph zawl nanleh ama luppi thu leh ama toh umkhawm lam thu ah a ngaisah nuom vawtsih hi.

11Hinanleh tua hun laiin hichi ahing hia, a nasem dingin Joseph khu inn sungah ava lut a, tualeh inn sungah mi mawngmawng koima aum sih hi. 12Tualeh amanu’n a puonsil in ana man a, “Hing luppi in” a chi hi. Tualeh aman a khutah a puonsil a nuasie a, a taisanta hi. 13Tualeh hichi ahing hi a, a puonsil a khutah nuasiein ataikhie chi amutahin; 14Amanu’n a inn a mite a han a, a kung uah, “Envawi un, hing zumsah dinga Hebrumi khat i kung ua hing puilut ahita khula, hing luppi tumin ka kungah ahing lut a, tuachiin aw ngaitahin ka kikou ta hi. 15Tualeh hichi ahing hi a, aw ngaitah a ka kikou azah tahin a puonsil ka kungah nuasie in a taidohta hi” achi hi.

16Tualeh apu inn ahing tun masangsie’n a puonsil a kungah ana koi den hi. 17Tuachi’n akungah tambangin agen a, “Hebru suoh i kunga na hing puiin hing suhzalat tumin ka kungah ahing lut a. 18Tuachi’n hichi ahing hi a, aw ngaitaha ka kikou leh a puonsil ka kunga nuasie in atai dohta hi” achi hi.

19Tuachi’n hichi ahing hi a, apu in a zinu’n a kunga “Tambang talawm a na suohpa’n a hing bawl” chithu azah tahin a lungthah ta hi. 20Tuachi’n Joseph apu’n azawpi a, leengpa miliente akhumna uh suongkul ah akhumta hi. 21#Nasep. 7.9Hinanleh Mangpa’n Joseph aumpi a, ahepina akilang sah a, suongkul vengpa mitmu ah deisahna a tangsah hi. 22Tuachi’n suongkul vengpan suongkul aum suongkultang zousie Joseph khutah a unin akeem sah a, tuana abawl zousie uh Joseph bawl ahimai hi. 23Suongkul vengpan Joseph khut nuoia um bangkim ava en nawn tasih hi. Mangpa’n Joseph aumpi a, tualeh abawl pouma Mangpa’n lawchinna apieh ziehin.

Currently Selected:

SIEMCHILBU 39: ZOUBSI

Highlight

Copy