SIEMCHILBU 40

Joseph in suoh nite mang a hilchienna

1Tualeh tam silte nuain hichi ahing hia, Izipt leengpa uain pepa leh a tanghou bawl pa’n apu uh Izipt leengpa a lungthah sah ua. 2Tuachi’n Pharoah milien nite uoin pete lah a lienpen leh tanghou bawlte lah a lienpen tungah alungthah ta hi. 3Tuachi’n amauh gel mi veng pawlte lamkai inn a, Joseph kikhumna suongkul ah a khumta hi. 4Tualeh mi veng pawl lamkai pa’n amaute gel Joseph a kemsah a, tualeh amaun ana asep pieh ua, hun tomkhat ataang uhi.

5Tualeh suongkul ataang Izipt leengpa uain pepa leh tanghou bawlpa ani un zan khat thuin mang akhietna tuom tuom tuoh aman uhi. 6Tualeh Joseph zingmawng in akung uah ahing pei a, amauh ahing kimupi a, tualeh ngaivawi, ana lungkham mama uhi. 7Tuachi’n aman apu inn a akikhumna-a ama toh taangkhawm Pharoah miliente kungah, “Bang achia tunia tambanga ngui mel puo na hi uoi?” chi in a dong hi.

8Tualeh amaute gelin a kungah, “Koute gel in mang ka nei ua, a hinghil chien thei koima aumsih hi,” achi ua, tualeh Joseph in akung uah, “Hilchienna kichite Pasian a hilou ahiei mah? Hepitahin hinghil un” achi hi.

9Tualeh uain pie lienpen pa’n amang Joseph ahil a, “Ngai in, ka mangin grepgui khat ka masangah ahing um a, 10Tualeh grep guiin ba thum anei a, tualeh ahing sel doh a ahing pah khe ngal a, grep ga bomte ahing uma ahing minta hi. 11Tuachi’n Pharoah nou ka khut ah ahing uma, tualeh Grep gate ka lou a, Pharoah nou ah ka suh a, tualeh anou pen Pharoah khut ah kana pie hi,” achi hi.

12Tualeh Joseph in a kungah “A hilchienna tami ahi, a ba thumte pen ni thum ahi. 13Tu akipat ni thum sungin Pharoah in na lu adomkang dinga, na sep ngaima ahing semsah kia dinga, tualeh uain pepa nahi laia na pieh ngai bangin Pharoah nou akhut ah na pekia ding hi. 14Hinanleh na hamphat kia chiengin kei hing manghil sinlen, hepitahin ka tungah na hepina hing langsahin, tualeh Pharoah kungah ka tungthu hing gen inlen, tam inn a kipat hing puikhie in. 15Aziehpen Hebru mite gam a kipata mi’n ang guh mang uh ka hia, tanah zong suongkul khuh sunga ahing khumna dingun bangma ka bawl khiel sih hi,” achi hi.

16Tanghou bawl lienpen pan ahilchienna dih chi athei in, Joseph kungah, “Kei zong mang ka nei a, Ngaiin, tanghou ngou lawbeu thum ka lu in kana puo a, 17tualeh, lawbeu tungtapen sungah Pharoah ding, tanghou chi tuom tuom aum a; tuate pen vaten ka lutunga law a kapuoh na akipat ane siengta uhi,” achi hi.

18Tuachi’n, Joseph in a dawnga, “A hilchienna tami ahi, Law thumte khu ni thum ahia, 19Tua kipat ni thum sungin Pharoah in na tahsa akipat na lutang domkang vanin, sing dawn ah ahing khai dinga, tualeh vaten nasa ane sieng ding uhi” achi hi.

20Tualeh, hichi ahing hi a, ni thum ni in, Pharoah pien hun a hing tunga, aman anasemte zousie a dingin ann kuong alui a: tualeh ana semte lah a, uain pie alien penpa lutang leh tanghou bawl alien penpa lutang a domkang ta a. 21Tuachi’n uain pie a lien penpa khu uain pe ma in apangsah kia a; tuachiin, Pharoah khutah nou apeta hi. 22Ahivang in tanghou bawla lien penpa khu Joseph in amang a hilchien bangin akhai liata hi. 23Hinanleh uain pie alien penpa’n Joseph athei zing tasih a, amanghil ta hi.

Currently Selected:

SIEMCHILBU 40: ZOUBSI

Highlight

Copy