SIEMCHILBU 41

Joseph In Pharoah mang a hilchienna

1Tualeh kum ni vingveng nuain hichi ahing hi a, Pharoah in mang a nei a, tualeh ngaivawi, luigei#Luigei: Nile luigei, Izipt (North Africa) gam a luilien pen ahi ah ana dinga. 2Tualeh ngaivawi, thakhat in lui akipan in bawngpi hoi mama thau tahtah sagi ahing pawt a, hampa lah ah ahing gamta uhi. 3Tuachi’n ngaivawi, tuate nua ah lui akipat bawngpi dang ling thengthung gawng gemgom sagi ma ahing pawtkhie ua, bawngpi dangte kunga luigei ah ahing ding uhi. 4Tualeh bawngpi hoilou leh gawng gemgom ten bawngpi hoi leh thau mama sagite khu ane siengta uhi, tuachiin Pharoah akhanglou ta hi. 5Tualeh a imu kia a, mang anei kia a, tualeh ngaiin, thakhat in bu kung khat ah buvui sagi lienpipi leh hoitah tah ahing um khie a, 6Tuachi’n ngaivawi, tami nuain buvui sagi ngat giugeu suolam huiin amut heu gawpte ahing umdoh kia hi. 7Tualeh buvui sagi ngat giugeu ten buvui sagi lien leh hoite khu aval siengta uhi, tuachiin Pharoah a khanglou kia a, ngaiin a mang ana hi hi. 8#Dan. 2.2Tualeh, zingmawng in tambang ahing hia, alungsim ngaituona a buoi mama a, mi a sawl a, Izipt gam a mitphieldawi siemte leh mipilte zousie a unin a hankhawm sah a, tualeh Pharoah in amaute a mang ahil a, hinanleh amang Pharoah hilchien thei koima aum sih uhi.

9Tualaitahin uain pie a lien penpa’n Pharoah kungah, “Tuni’n ka bawlkhelnate ka hing theidoh ta hi. 10Pharoah a suohte tunga a lungthah laiin, kei leh tanghou bawl a lienpenpa, ka ni un suongkul veng lamkaipa inn a suongkul sungah ahing khumta uhi. 11Tuachi’n zankhat ama leh ken mang khat ka nei tuoh ua, ka mangte un a khiehna atuom tuom anei tuoh hi. 12Tualeh tuanah vengpawl lamkai suohpa Hebru mi tangval khat ka kung uah aum a, tuachiin ama kahil ua, tualeh aman ka mang uh hilchienna ahing bawl a, ka mang uh dungzui in ahing hilchien tuoh tuoh hi. 13Tualeh tambang ahing hia, aman a hilchien bang bangin ahing umta a, keipen ka sep ngaima ahing semsah kia a, amapen akhailiata hi” achi hi.

14Tuachi’n Pharoah in mi a sawl a, Joseph a hansah a, tuachiin gangtahin suongkul apat ahing pui ua, tualeh akhamulte heuin apuon silte a henga, Pharoah kungah ahing lut hi. 15Tualeh Pharoah in Joseph kungah, “Mang khat ka nei a a hilchien thei koima aum sih a, hinanleh nang a thu nathei pouleh na hilchien thei chi thu kigen kaza hi” achi hi. 16Tualeh Joseph in Pharoah a dawnga, “Tuapen kei a um ahisih a, Pasian in Pharoah hamuonhuoi tahin a dawng zawding hi,” achi hi.

17Tuachi’n Pharoah in Joseph kungah, “Ngaivawi, ka mangin luipi pieu ah kana dinga, 18Tualeh thakhat in lui akipat bawngpi athau a thau leh hoi tahtah sagi ahing pawtkhie a, loupa dawng lah ah ahing gamta uhi. 19Tuachi’n ngaivawi, tuate nua ah, bawngpi dang ling letlut gawng gemgom ahoi a hoilou, tambang va-ia a hoilou, Izipt gam sunga ka mu khah ngai vawtlou ahing pawtdoh tou kia uhi. 20Tualeh bawngpi gawng gemgom leh hoilouten bawngpi athau a thau leh ahoi a hoi mama sagi hing pawt masate ane mangta uhi. 21Tualeh, aneh zou nua un zong, anesiengta uh chi akithei tuom sih hi, achiillai mabangin hoilou tahin aum nalai uhi, tuachiin ka khanglouta hi. 22Tuamabangin ka mangin, bukung khat ah buvui sagi lien tahtah hoi mama ahing umdoh a, 23Tuachi’n ngaiin, tuate nua ah buvui sagi ma nang nit net ngat giugeu suolam huiin amut heu dohte ahing um doh kia uhi. 24Tualeh buvui ngat giugeu ten buvui hoi sagite avaltum sieng ta uhi, tualeh tami thu mitphieldawi siemte ka hil a, hinanleh ka kunga hinghil chien thei koima aum sih uhi,” achi hi.

25Joseph in Pharoah kungah, “Pharoah mang tegel pen khat ahia; Pasian in bawl dia akisahte Pharoah kunga atheisah ahi. 26Bawngpi hoi sagite khu kum sagi, ahia, tualeh buvui hoi sagite zong kum sagi ma ahia, na mang tegel khu khat ahi. 27Tualeh bawngpi gawng leh hoilou sagi anua a hing pawtdohte khu kum sagi ma ahia, tualeh buvui hoilou suolam huiin amut siet gawp sagite khu kiel kum sagi dingte ahi. 28Tam silte ahi Pharoah kunga ka gen; Pasian in bawl dinga atup silte Pharoah atheisah ahi. 29Ngaivawi, Izipt gam sung tengteng ah nieng leh taitah a umna kum sagi ahing tung ding hi. 30Hinanleh tuate nuain kiel kum sagi ahing umkia dinga, tuachiin nieng leh tai a um nate Izipt gamah manghil sieng ahita dinga, kielna in gam sung ane segawp tading hi. 31Tuachi’n kiel thupitahin azui ziehin gam sung pumpi ah nieng leh taitah a umlai theiphah ahi nawn tasih ding hi, a huoi siet seng ding ziehin. 32Tualeh Pharoah mang nivei anei thuosahna pen, sil bawl ding khu Pasian suhdet ahia, Pasian mama in atunsah pai ding ahizieh ahi.

33Tuaziehin tuin Pharoah in mi lemtheitah leh piltah khat suikhie henlen, Izipt gam sungah houtu in koi hen. 34Pharoah in tami bawl henlen, tualeh aman agam tungah houtu ding guot henlen, nieng leh taitah a um kum sagi sungin Izipt gam a pieng bu se-nga suo seni khonkhawm hen. 35Tualeh amaun tua kum hoi sagi hing tung dingte a bu zousie lakhawm in Pharoah thuneina nuoi ah koi uhenlen tualeh khopite ah zong koikhawm uhen. 36Tuachi’n tua bu khu Izipt gam sunga dingin kiginkholna a koikhawm ahi ding a, kiel zieh a gam amanthai louna dingin,” achi hi.

Joseph Izipt gamah houtu in apang

37Tuachi’n tami thu Pharoah leh asuohte tengteng ngaiin hoi asah lamtah uh ahi. 38Tualeh Pharoah in asuohte kungah, “Tambang Pasian hagau umna mi imu zou ding amah?” achi hi. 39Tuachi’n Pharoah in Joseph kungah, “Pasian in tamte zousie nang ahing theisah ziehin nang banga lemthei leh pil koima aum sih, achi hi.’ 40#Nasep. 7.10Ka inn sungah vaihawmin na pang dinga, ka mite zousie na thupieh banga vaihawm pieh ahi ding hi. Lengtoupha ah athu mai maiin nang sangin ka lien zaw ding hi,” achi hi.

Joseph Izipt ah vaihawmin apang

41Tualeh Pharoah in Joseph kungah, “En in, Izipt gam pumpi ah vai hawm in ka hing koita hi,” achi hi. 42#Dan. 5.29Tuachi’n Pharoah in akhut akipan in amin namna khutsip lakhie in Joseph khutah abunsah a, puon malngat puon silte asil sah a, angawng ah sana khainieng a awsah ta hi. 43Tualeh a sakolleng nei anina ah atousah a, amasangah “Khupdin un” chiin akikou uhi. Tuachi’n ama khu Izipt gam zousie tunga vaihawmin a bawlta uhi. 44Tualeh Pharoah in Joseph kungah, “Kei Pharoah ka hi, nang thulouin koiman Izipt gam sung zousie ah akhut ahiei, akeng ahiei aleh thei sih ding,” achi hi. 45Tualeh Pharoah in Joseph min Zaphnath-paneah ahisah ta hi. Tualeh a zi dingin On khuo a Siempu Potiphera tanu Asenath apie hi. Tuachi’n Joseph apawt khie a Izipt gam teng teng atuon suah ta hi. 46Tualeh Izipt leengpa Pharoah masanga adin laiin Joseph khu kum sawmthum a upa ahia, tualeh Joseph khu Pharoah masang akipat apawt khie a Izipt gam teng teng atuon suah ta hi. 47Tualeh kum hoi kum sagi sungin leitangin bu leh bal tampi apieng sah hi. 48Tuachi’n aman Izipt gam a um, kum sagi sunga pieng bu zousie alakhawm a, tua bute pen khopite ah akoi khawma, khopi kimvel a bu zousie tua khopite ah akoi khawm hi. 49Tuachi’n Joseph in bu atama tam, tuipi pieunel bangin a sung khawm venvon a, simseng ding ahilou ziehin asim atawpsan vawt hi.

50Tualeh kiel kumte tun masangin On khuo siempu Potiphera tanu Asenath in Joseph tapa ni ahinpieh hi. 51Joseph in atapa masapen min Manasseh#Manasseh: Manghil aphuo hi, “Aziehpen Pasian in ka sep gimna zousie leh ka pa innkuonpite zousie a hing manghil sahta” achi hi. 52Tualeh atapa nina pen min Ephraim#Ephraim: ga nuom aphuo hi, “Pasian in ka gim thuohna gamah hahlesuon ahing siempieh ta hi,” achi ziehin.

53Tualeh Izipt gam a kum hoi kum sagite ahing beita a, 54#Nasep. 7.11Joseph in ana gensa bang bangin kiel kum sagi khu ahing tung panta hi. Kiel khu gamteng ah ahing tunga, hinanleh Izipt gam sungah neh ding aum hi. 55#Jn. 2.5Tuachi’n Izipt gam pumpi ahing kiel ta a, mipite Pharoah kungah neh ding ngenin akikou ta uhi. Tualeh Pharoah in Izipt mite kungah, “Joseph kungah pei unlen, ama gen bang bangin bawl un” achi hi. 56Tuachi’n leitung pumpi ah kiel ahing tungta a, khumin Joseph in bu sun khawmna inn zousie a honga, Izipt mite alei sah ta hi. Kiel pen Izipt gam sungah akhawh mama hi. 57Tuachi’n gam tenga kiel akhawh mama ziehin gamchina mite Izipt gamah Joseph kungah bu lei dingin ahing pei uhi.

Currently Selected:

SIEMCHILBU 41: ZOUBSI

Highlight

Copy