SIEMCHILBU 35

Jakob Bethel tungkia

1 # Siem. 28.11-17 Tuachi’n Pasian in Jakob kungah, “Kisa inlen Bethel ah peitou inlen, tuanah tengin. Tualeh khunah na upa Esau kunga kipat a na taimang lai a, na kunga kilah Pasian a dingin maitam bawl in,” achi hi.

2Jakob in a innkuonpite kung leh a kunga um zousie kungah, “Na lah ua gamdang pasien umte paimang unlen, kisusiengthou unlen, tualeh na puon sil uh heng un. 3Tuachi’n kisa vai in, Bethel ah peitou vai, tuanah ka lungdon lai a hing dawngpa leh ka pei peina lam a ka kunga um ngitnget Pasian a dingin maitam bawl vang” achi hi. 4Tuachi’n amaun Jakob kungah, a khut ua um gamdang pasien zousie leh abil ua aba uh bilba zousie Jakob kungah apie ua, Jakob in tuate zousie Shekem kunga um gangpi phung nuoiah a phuolta hi.

5Tualeh apei zel ua Pasian giinna khu akimvel ua khopite tungah aum a, Jakob tapate adelzui sih uhi. 6Tuachi’n Jakob Kanaan gam a um Luz khuo ahing tunga, tuakhu Bethel ahi, ama leh akunga um zousie toh. 7Tualeh khunah maitam a bawl a, a sanggampa masanga kipat ataimang lai a Pasian akunga akilah ziehin khummun min El-Bethel aphuo hi. 8Tualeh Rebekah donnu, Deborah ashi a Bethel nuoi a gangpi sing nuoi ah avui ua, tua gangpi sing min khu Allon-Bakuth#Allon-Bakuth: Kaana gangpi sing akichi hi.

9Tuachi’n Jakob Padan-Aram gam a kipat ahing peidoh laiin, Pasian a kungah akilah kia a, tualeh ama aguolzawl hi. 10#Siem. 32.28Tualeh Pasian in a kungah, “Na min Jakob ahi a, na min Jakob kichi nawnsih vanin, Israel ahizaw ta ding achi hi,” tuachiin amin Israel achita hi. 11#Siem. 17.4-8Tualeh Pasian in a kungah “Kei Pasian bangkimbawlthei ka hi, chi tampi suongin hing pung inlen, genkham ching nam tampi leh nam tuomtuom nanga kipat hing um vanin, tualeh nangma tahsa akipat leengte zong ahing umdoh ding uhi. 12Tualeh Abraham leh Isaak kunga ka pieh gam khu nangma kungah hing pevangin, tualeh na nua a nahah nasuonte kungah gam khu pe zel vang,” achi hi. 13Tuachi’n Pasian in ama a houpina mun akipat apeitou santa hi. 14#Siem. 28.18,19Tuachi’n Jakob in ama ahoupi na munah khuom khat a phuta, tua suong khuom tungah dawn ding sillat a sunga sathau a sun khum hi. 15Tualeh Jakob in, Pasian in ama a houpina mun khu Bethel achi ta hi.

Rachel leh Isaak shi

16Tuachi’n Bethel apat apei zel ua, Ephrath tunna ding gamla simtah ahi nalai hi. Tuachi’n Rachel in nau a vei a, a gim mama ta hi. 17Tualeh hichi ahing hi a, agim mama laitahin naudomnu in a kungah “Zau vawtsin, tapa dang nei ding na hi,” achi hi. 18Tualeh hichi ahing ahia, a hagau aha ding kuonin (a shita a) amin Ben-oni#Ben-oni: Ka lung khamna tapa china a phuo a, hinanleh apan Benjamin#Benjamin: Ka zietlang tapa (vangpha ding tapa) china chiin ahan hi.

19Tuachi’n Rachel a shita a, Ephrath lampi ah avuita ua, Tuapen Bethlehem ahi. 20Tuachi’n Jakob in ahan tungah khuom a phuta, tuakhu tuni dongin Rachel han suongphu ahi zing hi. 21Tualeh Israel khu apei zel a, Migdol Eder inn sang gal lam ah a puon inn azah hi.

22 # Siem. 49.4 Tualeh hichi ahing ahi a, Israel khum gam a aten laiin, Reuben in apa meinu Bilhah ava luppi a, tuakhu Israel in athei ta hi. Tuachi’n Jakob tapate sawm leh ni ahi uhi. 23Leah tapate Reuben, Jakob ta masapen leh Simeon, Levi, Juda, Issakar leh Zebulun. 24Rachel tapate Joseph leh Benjamin. 25Rachel suohnu Bilhah tapate Dan leh Naphtali. 26Tualeh Leah suohnu Zilpah tapate, Gad leh Asher; tamte pen Jakob tapate Padan-Aram gam a aneite ahi uhi.

27 # Siem. 13.18 Tuachi’n Jakob khu Abraham leh Isaak umna Kirjath-Arba khum khu Hebron ahi, Mamre ah apa Isaak kung ahing tungta hi. 28Tuin Isaak damsung kum za leh kum sawmgiet ahita hi. 29Tuachi’n Isaak upa vuoikawn vawt a damin ashita hi. A chipite kunga pui in aumta, a tapate Esau leh Jakob in avuita uhi.

Currently Selected:

SIEMCHILBU 35: ZOUBSI

Highlight

Copy