SIEMCHILBU 34
34
Jakob in asepga alaw
1Tualeh Leah in Jakob toh ahinpieh atanu Dinnah, khum gam a nungahte en dingin a pawtkhie a. 2Tualeh tuagam Lengpa Hivmi Hamor tapa Shekem in ana mu a, aman a luppi a abuasah ta hi. 3Tualeh aman Jakob tanu Dinnah khu alunggul vevaw a, angai seng manin kamsiem tahin ahoupi hi. 4Tuachi’n Shekem in apa Hamor kungah, “Tam nungah ka zi dingin hing lah pieh in” achi hi.
5Tualeh Jakob in atanu Dinnah, Shekem in abuasah chi aza a, tua hun laiin a tapate gamlah ah ganta toh aum ua, tuachiin amauh hing tun masangsie, Jakob asip khinkhian hi. 6Tualeh Shekem pa Hamor khu Jakob kihoupi dingin a kungah a hing pei a. 7Tualeh Jakob taten tam thu azah tah un, gam lah apat ahing pei ua, tualeh Jakob tanu luppi a, Israelte lah a sil gilou mot-huoi, bawl vawt lou ding sil abawl ziehin a lunggim ua, a thangpai mama uhi. 8Hinanleh Hamor in amaute ahoupi a, a kung uah “Ka tapa Shekem in na tanu alunggul vevaw a, hepitahin azi dingin hing pie un” achi hi. 9Tualeh zi leh ta in kiteng tua va ui, na tanute uh hing pie unlen, kou tanute zong la un. 10Tuachi’n kou toh na tengkhawm ding ua, gam zong ahing kihawm pieh dinga, summet bawl unlen tanah kikhuol ta un, nei leh lam khol in teng un,” achi hi.
11Tualeh Shekem in a nungahpa leh asanggampate kungah, “Hing hepi unlen, ka kunga na gen pouma uh hing pevang achi hi. 12Manlemuol leh silpieh na hing nget nuom zaza uh ngen unlen, ka kunga na genbang bangun hing pevang, hinanleh nungah pen ka zi dingin hing pie un” achi hi.
13Hinanleh Jakob taten asanggamnu uh Dinnah abuasah ziehin Shekem leh apa Hamor sol bawlna toh adawng ua, thu agen uhi. 14Tualeh amaun akung uah, “Tam sil, teptanlou mi kunga ka naunu uh pieh pen bawl thei sih va ung, aziehpen kou dinga min sietna ahi hi. 15Hinanleh tambanga na bawl u’leh lem ka sa ding uhi, nalah ua pasal teng a tep na tan ua, kou banga na um u’leh. 16Tuachi’n ka tanute uh hing pe va ungin, kon zong na tanute uh lava ungin, tuachi’n nou toh ka tengkhawm ding ua, chikhat ihita ding uhi. 17Hinanleh teptan ding thu a ka thu uh na zui sih ding u’leh ka tanu uh zawpi va-ungin, pei mai va-ung,” achi uhi.
18Tualeh a thugen un Hamor leh Hamor tapa Shekem akipah sah hi. 19Tuachi’n atangval pan Jakob tanu adei seng ziehin, ni sawt hallouin tua sil abawlta hi. Amapen apa innkuonpite zousie sanga mite zatat pen ahi.
20Tualeh Hamor leh atapa Shekem khu akhopi kul Kotpi ah ahing pei ua, a khopi mite toh akihou lim ua akung uah. 21“Tam mite eite toh kilemtah in aum uhi, tuaziehin tami gamah teng uhen len, tam gam sungah summet bawl uhen, ngaivawi un, ama ua dingin gam alien hun mama hi. A tanute uh zi dingin la vaiin, amaute zong i tanute uh pevai, achi uhi. 22Tam mite toh kilemtah a tengkhawm a, chi khat namkhat ihi theina ding aum hi. Amaute teptan ahi bangun, pasal zousie teptan hilei. 23A gamte uh anei alamte uh, aganta khoite zousie uh eite a hing himai lou ding amah? A thu uh lemsahpi vaiin, ikung uah a teng maiding uhi” achi uhi. 24Tualeh Hamor leh atapa Shekem thu khu Kulkot a pawt zousien a za ua, a khopi kul kotpi a pawt pasal zousie tep atanpieh ta uhi.
25Tualeh, ni thum niin, hichi ahing hi a, a nat laitah un Jakob tate ni Simeon leh Levi, Dinnah sanggamten a namsau uh aman ua, hangsan tahin khopi ahing bulu ua, pasal zousie athat siengta uhi. 26Tualeh amaun, Hamor leh atapa Shekem khu namsau hiemin a that ua, Shekem inn apat Dinnah apuikhie ua, a peita uhi. 27Tualeh Jakob tapaten ami thate uh ava tun khum ua, asanggamnu uh kisuh buana khopi asimta uhi. 28A belamte, uh, a bawngtalte uh, asabiltungte uh khopi sunga sil umte pouma leh alou ua sil um poumate alah pieh uhi. 29Tualeh anei alam zousie uh, a taneute uh leh a zite uh sal in aman ua, innsunga um pouma atomgam pieh ta uhi.
30Tualeh Jakob in Simeon leh Levi kungah, “Tam gam a umte lah a Kanaanmite leh Periz mite lah ah huot nang lawsah ua, nang lunggim sah seng uhi. Kei tawmnou khat ka hi ziehin ang dou dingin hing kikhawm va un, ahing that ding ua, ahing sumangthai ding uhi, kei leh ka innkuonpite toh,” achi hi.
31Tualeh amaun, “Ka sanggamnu uh kizua banga abawl ding uh ahiei mah?” achi uhi.
Currently Selected:
SIEMCHILBU 34: ZOUBSI
Highlight
Share
Copy
Want to have your highlights saved across all your devices? Sign up or sign in
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.
