SIEMCHILBU 31

Laban kunga pat Jakob taimangna

1Tualeh aman, Laban tapaten, “Jakob in ipa nei zousie alah pieh siengta hi. I pa nei leh lam apat a tambang hausatna amu ahi” achi uh azata hi. 2Tualeh Jakob in Laban maisuo a en a, ngaivawi, tu malam a bangin a tungah ahoi nawn sih, chi a thei hi. 3Tuazouin Mangpa’n Jakob kungah, “Na pu leh pate leh na sanggamte gamlang ah nua peitan, ka hing umpi zing na ding hi,” achi hi.

4Tuaziehin Jakob in mi a sawl a, gamlah a ganhon umna ah Rachel leh Leah ava hansah ta hi. 5Tualeh aman akung uah, “Napa mel ka mu in tu malam bangin ka tungah a hoi nawn sih chi ka thei a, hinanleh ka pa Pasian ka kungah aum zing hi. 6Tualeh ka theitawp suoin na pa uh nna ka sep piehta chi na thei uhi. 7Tualeh na pa un hing sol in kalaw sawmvei tah ahing suh lamdang pieha, hinanleh Pasian in ka siet na ding abawl aphal sih hi. 8A pawl zousie na law ding ahing chi chiengin gan zousie in ha pawl a pawl ahing nei ua, adung pawlte na law ding ahing chi chiengin a dung pawl ahing nei zel uhi. 9Tuabangin Pasian in na pa uh gante lah pieh in kei ahing pie hi.

10Tualeh hichi ahing hia, ganhonte ahing gai pat chieng un ka dahtoua ngaivawi, ka mangin belam talte ganhon ha pawl a pawl leh adung pawlte leh apawl chiptepte tunga kikhap ka mu hi. 11Tualeh Pasian vansawlsiengin ka mangin ka kungah, Jakob ahing chia, tualeh keiman, tanah ka um hi ka chi hi. 12Aman dahkhien len envawi, ganhonte tunga kikhap belam talte khu adung pawlte, ha pawla pawlte, tualeh apawl chiptepte bang ahi uhi. Tualeh Laban in na tunga abawl zousie ka muta hi. 13#Siem. 28.18-22Kei khu suongphu sathau na buohkhumna leh ka kunga na kichiemna, tua Bethel Pasian khu ka hi. Tuin kisa inlen tam gam a kipat pei inlen, na pienna gam lamah peikia tain achi hi,” achi hi.

14Tuachi’n, Rachel leh Leah in adawng ua, a kungah “Ka pa uh inn ah kouma ding tanvou leh gouluo ding leh gou tanding aum nalai amah? 15Koute mikhuol bang giap a, hing bawl hilou ahiei mah? A hing zua zouta a, ka man uh zong ane zou siengta hi. 16Pasian in ka pa ua kipat a tam hausatna alah khiet zousie ei leh i tate a ahi, tuachiin tuin Pasian in na kung a aget pouma bawl in” achi uhi.

17Tuachi’n Jakob akipan khie a, atate leh azite sangawngsau tungah a tuongsah a, 18Tualeh Kanaan gam a, apa Isaak kunga pei dingin a ganta zousie leh Padan-Aram a kholkhawmte, aneilelam zousie apeipi sieng hi. 19Tualeh Laban a belam mul met dingin akuonta a, Rachel in a pa milimte aguhpieh hi. 20Tuachi’n Jakob Siriami Laban theilou kal in aguhin akihem manga, a pei ding thu ahilsih hi. 21Tuachi’n anei zousie toh a taimang ta a, tualeh thouin luipi #Luipi agalkai: Euphrates luipi agalkai china ahi a galkai a, Gilead tanglam zuonin a peita hi.

22Tualeh ani thum ni’n Jakob a taita chi Laban ahil uhi. 23Tuachi’n aman a unaute a zawpi a ni sagi lamtan a nuadel ua, tuachiin Gilead tang ah a phata uhi. 24Tualeh Pasian khu Siriami Laban kungah, zanin a mangin ahing pei a, a kungah, Jakob kungah “Ahoi hi in asie hitaleh bangma genlou dingin pilvangin,” achi hi. 25Tuachi’n Laban in Jakob a nuaphah ta a. Tuin Jakob in a puon inn tangah a zah touta a, tualeh Laban in zong a unaute toh Gilead singtang gam ah a zah uhi.

26Tualeh Laban in Jakob kungah, “Na silbawl bang chidan ahiei?” ka theilou kaal a na kigelmanga, ka tanute zong namsau galmat banga na puimang mawh? 27Bang dinga a guh a taimang a, ka kunga kipat a kipahtah leh late, khuongte leh tumging tetoh ka hing hahkhiet theina dinga hing hillou na hiei? 28Tualeh ka tapate leh ka tanute ka tawp ding hing phallou na hiei? na nasep a mothuoi seng hi. 29Na sietna ding bawl thei ka hia, hinanleh na Pa Pasian in za nitah in ka kungah Jakob kungah ahoi hi in asie hitaleh bangma gen lou dingin pilvangin chiin a hing houpi hi. 30Tualeh tuin na pa inn na ngai seng zieha pei na hitah lezong, bang dinga ka Milim pasiente na hing guhpieh ahiei?” achi hi.

31Tuachi’n Jakob in a dawnga, Laban kungah, “Na tanute pauhat thuin hing lahpieh khavateh ka chia, ka zau zieh ahi” achi hi. 32Koi koi hinanleh na milim pasiente na muna pouma hing sih heh, I unaute mitmu a bang ahiei na neisa ka kunga um en chien inlen kilah in achi hi. Tua milim pasiente Rachel in aguh lam Jakob in athei lou zieh in.

33Tualeh Laban in Jakob puon inn leh Leah puon inn leh suohnu nite puon inn ah a lut a, hinanleh amu sih hi. Khumin, Leah puon inn apat peikhie in Rachel puon inn ah alut hi. 34Tualeh milimte pen Rachel in analah ahia, sangawngsau van lah ah akoi a ana toukhum a. Tualeh Laban in a puon inn zousie aphele a amusih hi. 35Tualeh amanu’n a pa kungah, “Na masanga ka dinkhiet theilou ziehin ka mangpa lung himaw sin, numei ngaina ka nei zieh ahibou hi,” achi hi. Tualeh aman a sui a hinanleh milimte amu zou sih hi.

36Tuachi’n Jakob a lungthah a, Laban a houseta hi. Jakob in Laban kungah, “Bang e ka gamtat khielna? Ka mawna bang ahiei? tambang va-ia a thangpai a nang nuadel ta lawm? 37Ka vanteng a un a phele ta chin a, na innsung neitah bang e na mu? Eigel kikaal a thu khensat dingin ka unaute leh na unaute masangah koi in; 38Kum sawmni vingveng na kungah ka umta a, na belam pite leh na kelpiten nou anei khiel ngai vawtsih hi. 39Gamsa pelupte lah na kunga hing tut lou in, keiman aluongman ka toizel hi. Sun a kigu hi in, zan a kigu hitaleh na hing dinsah zel hi. 40Tambangin ka umzing hi, sun a kholum leh zan a khovot in a hing sugenthei mama a, imutna hun zong ka mu ngaisih hi. 41Tambangin kum sawmni vingveng na inn ah ka uma, na tanu nite thalaw in kum sawm leh kum li na nna ka sema, na ganta thalaw dingin kum guh na nna ka sema, tualeh kalaw sawm veitah na hing suh lamdang pieh nalai hi. 42Ka Pa Pasian, Abraham Pasian leh Isaak zauna ka kunga umlou hileh tuin zong saguohin hing sawl khe ngei ngei ding na hi. Pasian in ka genthei thuohna leh ka khut sepgimna amu a, zani zan a ahing phawh ahi” achi hi.

43Tualeh Laban in a dawnga, Jakob kungah, “Tam tanute pen keima tanu ahi ua, tam naupangte zong keima naupangte ahi uhi. Tam gantate zong keima gantate ahi ua, tualeh na mu zousie zong kei a ngen ahi. Ka tanute tung leh atate uh tungah bang ahiei tunia ka bawlthei ding? 44Tuaziehin hing pei in tuin, kei leh nang kikaal ah thuhun bawl vaiin tuamipen nang leh kei kikaal a ahing theipitu hisah vai,” achi hi.

45Tuachi’n Jakob in suong khat ala a, tua suong pen aphutta hi. 46Tualeh Jakob in a unaute kungah, “Suong tomkhawm un,” achia, tuachiin suong ala ua, asepvum ua, tua avum ah ann ane uhi. 47Tualeh Laban in suong kisepvum khu Jegar-Sahadutha#Jegar-sahadutha: Aramaik-a kisepvum theipitu china achia, hinanleh Jakob in Galeed#Galeed: Heb-kichieng ditdet theipitu Ahisih leh theisahna ding a ki chieng (T.E.V.) achi hi. 48Tualeh Laban in, “Tam suong kisepvum pen tuni in nang leh kei kikaal a ahing theipi ahi,” achia, tuaziehin amin Galeed a kichi hi. 49Tualeh Mizpah#Mizpah-Etkhiehna khuom. (k) Techi: atheipi-’witness’ (Eng) zong akichi hi. Aziehpen Laban in i kikhen hun chiengin “Mangpa’n kei leh nang hing veng tuoh ta hen. 50Ka tanute na suh gentheia, ahisihleh ka tanute loungal zi dang na nei leh koima i kungah aum sih, en in, nang leh kei kikaal ah Pasian ahing theipi hiheh” achi hi. 51Tuachi’n Laban in Jakob kungah, “Nang leh kei kikaal a ka suong sevum en inlen suong kiphut en in, achi hi. 52Sietna bawl dingin tam suong sevum kanin nang lam ah hing galkai sih vangin, nangzong tam suong sevum leh tam suongphu na hing galkai lou ding ahi, achi hi. Tam suong sevum atheipi ahia, tam suong phuzong ahing theipi ahi. 53Abraham Pasian leh Nahor Pasian, apa uh Pasian in i kikaal ah thu khenta heh” achi hi, tualeh Jakob in apa Isaak in a giin, Pasian min lou in akichiem ta hi. 54Tuachi’n Jakob in muol tungah kithoina a bawl a, a unaute ann ne dingin ahan hi. Tuachi’n ane ua, zankhuo in taang tungah a giehta uhi. 55Tualeh zingmawng matah in Laban a thou a, a tapate leh a tanute a tawpa a guolzawl hi. Tuachi’n Laban a peita a, a umna mun ah ahing tung kiata hi.

Currently Selected:

SIEMCHILBU 31: ZOUBSI

Highlight

Copy