SIEMCHILBU 30

1Tualeh Rachel in Jakob ta ahinpieh sih chi akithei in, a sanggamnu a thangsietta a, Jakob kungah, “Ta hing pie in ahisihleh shi mai vang,” achi hi.

2Tualeh Jakob Rachel tungah alungthah ta a, “Na naubu a ga hing phalsah loupa Pasian thaheng ka hiei mah?” achi hi.

3Tuachi’n amanu’n enve, “Ka suohnu Bilhah tanah aum hi, amanu pawl inlen, tuachiin ken zong ama a kipat tate ka nei theisam na dingin, ka pheitunga ta hing nei ding ahi,” achi hi. 4Tuachi’n asuohnu Bilhah a zi dingin apie a, tualeh Jakob in amanu a pawl a. 5Tuachi’n Bilhah agai a, Jakob tapa khat ahing pieh ta hi. 6Tuachi’n Rachel in, “Pasian in ahing vaihawm pieh a, ka aw zong aza a, tapa ahing pie hi,” achi hi. Tuaziehin a min dingin Dan a phuo hi. 7Tualeh, Rachel suohnu Bilhah agai kia a, Jakob tapa anina a neipieh kia hi. 8Tualeh Rachel in, “Hatang pi’n ka sanggamnu ka buon a ka zouta” achi hi, tuachiin amin dingin Naphtali ahisah ta hi.

9Leah in naunei atawpta chi akithei in a suohnu Zilpah a pui a, Jakob zi dingin apie hi. 10Tualeh Leah suohnu zilpah in Jakob tapa khat ahinnpieh hi. 11Tuachi’n Leah in, “Vangphat huoi tei e izaw,” achi hi. Tuachi’n amin Gad ahisah hi. 12Tualeh Leah suohnu Zilpah in Jakob tapa anina ahinnpieh a. 13Tuachi’n Leah in, “Kipah sam ing e, aziehpen numeiten hamphanua hing chi ding uhi.” Achi hi. Tuachi’n amin Asher ahisah ta hi.

14Tualeh Bu lah laiin Reuben apawt khie a, loulai ah zawldei-ai ava mu a, anu Leah kungah ahing tawi hi. Tuachi’n Rachel in Leah kungah, “Hepitah in na tapa zawldei-ai hing hawm in” achi hi.

15Tualeh aman, “Ka pasal na hing lahpieh aneu tham a na ngai amah? Tualeh ka tapa zawldei-ai zong hing lahpieh na sawm nalai amah?” achi hi. Khumin Rachel in, “Ahisihleh na tapa zawldei-ai taangin tuzan ahing luppi ding” achi hi. 16Tualeh nitah lam in Jakob lou a pat ahing pei a, Leah adawn dingin a pei a, tualeh a kungah, “Hing pawl in ka tapa zawldei-ai in ka hing guoizouta hi,” achi hi, tuachiin tuami zan in a luppita hi.

17Tualeh Pasian in Leah ngetna a ngaikhie a, tuachiin amanu agaita a, Jakob dingin tapa ngana ahinnpieh hi. 18Tualeh Leah in, “Ka suohnu ka pasal kunga ka pieh ziehin, Pasian in ka law ahing pie hi,” achi hi; tuachiin amin Issakar aphuota hi. 19Tualeh Leah agai kia a, Jakob dingin tapa a guhna ahinpieh hi. 20Tualeh Leah in, “Pasian in vanken hoitah tah ahing neisah a, tuin tapa guh tah ka nei pieh ziehin ka pasal ka kungah teng taven, achi hi, tuachiin amin Zebulun#Jebulun: Tenna mun china a phuota hi. 21Tua zouin ta numei khat a nei a, amin Dinah aphuo hi.

22Tualeh Pasian in Rachel a theizinga, a thu ngetna angai khiet pieha, anau bu ahonpieh hi. 23Tuachi’n a gaia tapa khat a nei a, “Pasian in simmaw a ka umna hing lahkhiet piehta,” achi hi. 24Tuachi’n amin Joseph#Joseph: Belap pieh china. aphuo hi. “Mangpa’n tapa khat hing belap pieh nalai ding hi,” achi hi.

Jakob leh Laban kihouna

25Tualeh hichi ahing ahia, Rachel in Joseph anei zouin Jakob in Laban kungah, “Ka umna mun leh gam lam a ka pei theina dingin hing sawl kheta’n achi hi. 26‘Na nasep a ka lawdoh ka zite leh ka tate hing pienlen, hing peisah ta in; na nna ka hing seppieh dan lah na thei ngal a,” achi hi.

27Tualeh Laban in a kungah, “Na mitmu a deisahna katan leh hepitahin khawl tadi in; aziehpen nangma vangin Mangpa’n kei ahing guolzawl chi theina ka nei hi, achi hi. 28Tuachi’n Laban in na law ding guot inlen, hing hil in hing pevang” achi hi.

29Tualeh Jakob in a kungah, “Na nna ka hing seppieh dan leh ka kunga na ganta bang chium ahiei? chi na thei asiei mah, achi hi. 30Ka hing pei masangin tawmnoukhat na nei a, tu’n tampi in a pungta hi. Tualeh Mangpa’n ka hing pei a pat in a hing guolzawl a, hinanleh bangchih chieng in ahiei keima innkuonte dinga ka sep khiet sam ding,” achi hi.

31Tuachi’n aman, “Bang ka hing pe diei?” achi hi, tualeh Jakob in “Bangma hing pe sin, tami na hing bawlpieh ding leh na gan honte vengin ka ching kia ding hi,” achi hi.

Jakob ganhonte apung

32Tuni’n na ganhonte kava enkhe dinga, Belam hon lah a avom pawl nah mama te leh avom pawl chiptep leh avom pouma leh Kel lah a akang pawl nah mama te leh apuong pawl chiptepte atuom in ka la kheding a, tualeh tuban tuabanga hing pieng pouma ka law ding ahi ding hi achi hi. 33Tuachi’n tubansie na mitmu a um ka law tungtang thu a, na hing pei hun chieng in ka dihtatnain ahing dawnpieh mai ding hi. Kel lah a apuong pawl nah mama lou leh apuong pawl chiptep lou leh belam laha, avom lou ka kunga namu teng ka guhin ngaisun maiin achi hi.

34Tuachi’n Laban in, “Hoi e! na gen bang hita venleh” achi hi. 35Tuachi’n tuami ni mama in keltal akaanga azing a pawlte leh akaang pawl chiptepte leh kelnu aha-pawl leh akaang a giel chiptepte leh a kaanna um pouma, belam lah a avom zousie toh apui tuom a atapate khutah apie a. 36Tualeh ama leh Jakob kikaal ah nithum lam aum sah a, tualeh Jakob in Laban ganhon um teng ahata hi.

37Tualeh Jakob in hieng sing, zuonmuot sing leh sesing tuoite chiengpum dingin ala a, ahaw akhoh ngou chiet a, a chienga angou umte akilang sah hi. 38Tualeh achieng haw khawte pen, Tui dawn dinga ahing pei chieng ua, agai thei na ding un, ganhonte tui dawnna kuong leh tui luonna ah, a belamte mazawn ah akoi hi. 39Tuachi’n ganhonte chieng zawn ah a hing gaita ua, a zinga pawlte bang aha pawl mama te bang, apawl chiptepte bang, ahing nei kheta uhi.

40Tualeh, Jakob in belam noute atuom in a koi a, tualeh ganhonte Laban ganhon lah a, adung pawl leh apuong teng lam angasah a, tualeh ama ganhonte atuom koi zel a, Laban ganhon lah ah akoi sih hi.

41Tualeh, hichi ahing hi a, gan hat deute ahing gai pat chieng un, Chieng lah apat agai theina dingun, Jakob in tui luonna ah gantate mu dingin Chiengte akoi zel hi. 42Hinanleh ganta zawngkhal deute akoi sih hi, a zawngkhalte Laban a ahia, a hatte Jakob a ahizel hi. 43Tuachi’n amapa hatangpi in ahing pungta a, gantate, Suohnute, suohpate, sangawngsaute leh sabiltungte tampi ahing neita hi.

Currently Selected:

SIEMCHILBU 30: ZOUBSI

Highlight

Copy