SIEMCHILBU 32

Jakob Israel kichi ta

1Tuachi’n Jakob apei zel a, Pasian vansawlsiengten ana lamdot uhi. 2Tualeh Jakob in amauh amu tahin, tamte pen “Pasian galkapte ahi uh,” achi a tuachiin tuami mun khu Mahanaim achi hi.

3Tuachi’n Jakob in Seir gam a Edom langa a upa Esau kungah thangkou asawl masa hi. 4Tualeh akung uah, “Ka mangpa Esau kungah tambangin vagen un, na suoh Jakob in tambangin agen hi, Laban kungah mikhuol in kava um a, tudongin ka um hi. 5Bawngtalte, sabiltungte gan honte leh suohnute leh suohpate ka nei hi. Tuachi’n na mitmu a hepina ka mu theina dingin, ka mangpa hil dinga mi ka hing sawl ahi,’’ chi in vagen un, chiin amauh thu apie hi.

6Tuachi’n thangkoute Jakob kungah, “Ahing kile kia ua, na upa Esau kung kava tung ua, amazong pasal zali toh nang lamtuo dingin ahing pei hi” achi uhi. 7Tuachi’n Jakob azau seng senga, a lungkhamta hi. Tuachi’n a kunga mipi umte, Belam honte, Bawngtalte leh Sangawngsaute pawl ni in a khena. 8Tualeh “Esau pawlkhat kung a ahing pei a, a tha taah a ahileh a pawldang pen a suohta ding” achi hi.

9Tuachi’n Jakob in, “Aw! Ka pa Abraham Pasian leh ka pa Isaak Pasian, ka kunga, ‘na gamlam leh na tanaute kungah pei kia inlen, hoitahin hing bawl vang chipa Mangpa.’ 10Na suoh tunga na latsah hepinate lah leh thutahte lah a a neupen zong tangtah ka hisih, ka chiengkhut toh tam Jordan gal ka kaia, tuin pawl ni ka hita uhi. 11Hepitahin ka upa khut apat, Esau khut apat, in hing hundohin, numei naupang puma ahing na tha khah ding ka zau hi. 12#Siem. 22.17Tualeh nangman, hoitahin ka hing bawl dinga nahah nasuonte Tuipi a pieunel sim senglou bangin bawl vang na chi hi,” achi hi.

13Tuachi’n khum zan in khum munah a gieha, tualeh aneitah laha pat a upa Esau nuomman ding alakhie a; 14Kelpi za ni, keltal sawmni; Belampi za ni leh Belamtal sawmni toh. 15Sangawngsau nawi suhlai sawmthum leh anoute toh, Bawngpi sawm leh Bawngtal sawmni, Sabiltungpi sawmni leh Sabiltungnou sawm; 16Tuachi’n tuate atuom chiet in asuohte khutah a kemsah a, asuohte kungah, “Ka masang ah pei galkai unlen, pawl chin akaal umsah zel un” achi hi. 17Tualeh aman amasapen kungah, “Ka upa Esau in ahing kituohpi a, na kunga koi na hiei? heia haw ding na hiei? Tualeh na masanga umte koite ahi uoi? chia ahing doh leh; 18A kungah, na suoh Jakob a ahi uh, ka mangpa Esau kunga nuomman a apieh dinga ahing hah ahi; tualeh ngai in, ama zong ka nua uah aum hi, na chi ding hi,” chi in thu apie hi. 19Tualeh aman a nina leh athumna leh ganhon hawlte zousie kungah, “Esau na mu chieng un hichibang main na chi ding uhi. 20Tualeh ngaivawi, na suoh Jakob ka nua uah aum hi chi chiet un chi’n thu apechiet hi. Aman “Nuomnante ka masangah pei leh a lung ka damsah dinga, tuazou chiengin amel mu vang, tuachi’n ana hing kipahpi khamaw sih ding hi,” achi hi. 21Tuachi’n nuomman khu a masangah apei galkai sah a, amapen tua zan in apawlte lah ah agieh hi.

22Tualeh zan in a thou a, a zi tegel leh a suohte ni leh a tapa sawm leh khatte puiin Jabbok luita kaina ah a kaipi ta hi. 23Tualeh amauh a zawpi a, lui agalkai sah a, anei zousie zong agal kaisah hi.

Jakob in Vansawlsieng a kibuonpi

24 # Hos. 12.3,4 Tuachi’n Jakob amatangin aumta a, tualeh mi khat in phalvah dongin a kibuonpi hi. 25Tualeh azou sih chi akithei in, akhelpi gu kituona atham pieha, tuachiin akibuon laiun Jakob khelpi gutuona akilawi ta hi. 26Tuachi’n Aman “Hing ha in, khuo vah ding ahita,” achia, Jakob in “Na hing guolzawl masangsie hing ha vawt sihvang” achi hi.

27Tuachi’n Aman a kungah, “Na min bang e?” achi hi, Aman “Jakob” achi hi. 28#Siem. 35.10Tualeh Aman, “Na min Jakob kichi nawn sih vanin, Israel#Israel: Pasian Mangpen tapa china or Pasian toh kibuon china ahing kichi tading hi. Nangman Pasian leh mihing na buona, na zouta hi” achi hi.

29 # Vai. 13.17,18 Tualeh Jakob in, “Hepitahin na min hinghil vawi” chi in a donga, Aman “Bang zieh a ka min na hing doh ahiei?” achi a, tuachiin tuamun ah ama aguolzawl ta hi.

30Tualeh Jakob in tuamun min Peniel#Peniel: Pasian mel or Pasian maitang china achita hi. “Pasian kimaituo in ka mu a, ka hinna ahing khawipieh nahlai ziehin,” achi hi. 31Tualeh Penuel a galkai lai in nisa in ama ahing khawta a, a khelpi ziehin abaita hi. 32Tuaziehin tuni dongin Israel taten malpi gu kituona a sa pangpan um ane ngaisih uhi. Jakob malpi gu tuo a, a pangpan laitah akhoi pieh ziehin.

Currently Selected:

SIEMCHILBU 32: ZOUBSI

Highlight

Copy