SIEMCHILBU 27

Isaak in Jakob aguolzawl

1Tualeh hichi ahing ahia, Isaak ahing tehta a, khomu theilou khop in amit ahing miel gawpta a, atapa upapen Esau a han a, a kungah, “Ka tapa” achi hi, tualeh aman, ngaiin “Tanah ka um hi” achi hi.

2Tualeh aman, “Ngaivawi, tuin ka teh sengta a, ka shi ni ding lah ka thei sih hi. 3Tuaziehin hepitahin na hiemzah, na thaltang bawm leh na thalpi la inlen, gam vavah inlen sakhi hing matpiehin. 4Tualeh ka du dan tahin me tuitahin hing bawl inlen ka kungah hing tawi in, ka shi masanga ne a ka hing guolzawl theina ding in” achi hi.

5Tualeh Isaak in atapa Esau ahoupi lai, Rebekah in anaza hi. Tuachi’n Sakhi man a hing paw dingin Esau akuonta hi. 6Tuachi’n Rebekah in atapa Jakob kungah, “Ngaivawi, na pa’n na u Esau ahoupi lai ka za a, akungah. 7‘Sakhi hing va puohpieh inlen, me tuitah hing bawlpieh in, ka neh a ka shi masanga Mangpa kunga ka hing guolzawl theina ding in, chia agen kaza hi.’ 8Tuaziehin ka tapa ka hing thupieh bangin ka thu mangin.’ 9Tuin ganhon lah ah vapei inlen, Kelnou hoitah ni hing lain, napa dingin adu dantah in me tuitah ka bawl piehding achi hi. 10Tuachi’n tuami ane a, ashi masang ngei a nang ahing guolzawl theina dingin, na pa kungah nava tawi ding hi,” achi hi.

11Tualeh Jakob in anu Rebekah kungah, “En in, ka upa Esau mi mul hau ahia, keipen mi vun mam kahi achi hi. 12Ka pa’n ahing na zut kha thei hi, tua hileh ama ngaiin mi solpa ka bang dinga, guolzawl malahin samsiet kisui kawi ka bang kha zawsih ding amah?” achi hi.

13Hinanleh anuin a kungah, “Na kisamsietna khu ka tungah tuzaw heh, ka tapa ka thu mang mai inlen, hing valah piehin,” achi hi. 14Tuachi’n a pei a ava lata a, anu kungah ahing tawi a, tualeh anu in apa dudantah in me tuitah abawl piehta hi. 15Tuachi’n Rebekah in atapa upapen Esau puon hoipen, a kunga inn sunga um khu ala a, atapa a naupang zaw Jakob a silsah ta hi. 16Tualeh Kelnou vun khu akhut leh angawng mamna mun ah a koia, 17Tuachi’n me tuitah leh tanghou a bawlte khu atapa Jakob khut ah apie a, 18Tuachi’n apa kungah ahing pei a, “Pa aw”; achi hi, Aman, “Tanah um ing ei, koi na hiei? ka tapa,” achi hi.

19Tualeh Jakob in apa kungah, “Na tapa upapen Esau ka hi, na hing sawl bangin ka bawl zouta hi; hepitah in hing thou inlen, na hing guolzawl theina dingin ka Sakhisa ne vawi,” achi hi.

20Hinanleh Isaak in atapa kungah, “Ka tapa, bangchidan a hiei? hing manlang na va-ia chie?” achi hi. Tualeh aman, “Mangpa na Pasian in ahing lawchinsah zieh ahi” achi hi.

21Tuachi’n Isaak in Jakob kungah, ka tapa, “Hepitah in hing naivawi, ka tapa Esau na hi tahtah nai? kahing zutding hi” achi hi. 22Tuachi’n Jakob in apa Isaak anai a, aman ana zut a, Tualeh “A aw pen Jakob aw ahia, hinanleh akhut pen Esau khut ahi” achi hi. 23Tualeh a khutte a upa khut banga amul ziehin athei khen tasih a, tuachi’n ama a guolzawl ta hi. 24Tuachi’n aman, “Ka tapa Esau na hi ngel nai mah?” achi hi, tualeh aman “Hi ma inge” achi hi.

25Tualeh aman ka kungah, “Hing tawiin ka hing guolzawl theina dingin, ka tapa Sakhisa ka ne ding hi” achi hi. Tuachi’n a kungah ahing tawi nai a, aman aneta hi; tualeh uain zong a hing tawia a dawnta hi. 26Tuachi’n apa Isaak in a kungah, “Tuin hing nai inlen hing tawp in ka tapa” achi hi. 27#Heb. 11.20Tuachi’n aman ava nai a atawpta hi. Tualeh aman a puon gimnam aza a, a guolzawlta hi, tualeh “Envawi, ka tapa gimnam pen Mangpa guolzawl gam gimnam abang hi. 28Tuaziehin Pasian in van daichimte leh lei hoinate, thaunate leh bu leh uoiin tampi hing peta hen. 29#Siem. 12.3Midang dangten na nna sem henlen, nam tuom tuomte na masangah kun uhen, na unaute tungah leeng in pang inlen, na nu tate na masangah kun uhen, tualeh hamsie hing lawte hamsiet in um henlen, ahing guolzawlte guolzawl in um uhen” achi hi.

Isau in Isaak guolzawlna anget

30Tualeh hichi ahing hi a, Isaak in Jakob a guolzawl zou tahin, Jakob apa Isaak apat a apeikhiet zou laitahin, a upa Esau sabeng ahing tung a. 31Tualeh aman zong me tuitah a bawla, apa kungah ahing tawia, tualeh apa kungah, “Pa aw, thou inlen, na hing guolzawl thei na dingin na tapa Sakhisa ne vawiin” achi hi. 32Tualeh apa Isaak in a kungah, “Koi na hiei? achi hi, aman na tapa upapen Esau kahi” achi hi.

33Tuachi’n Isaak nasatah in achitun a, tualeh apa Isaak in a kungah, “Sakhi va man a ka kunga hing tawia, tualeh na hing tun masanga ka na neh zou a ka guolzawl pa koi ahiei? Heisungah aumtai? Hinanleh ama guolzawl in aum ta ve ve ding” achi hi. 34Tualeh Esau in apa thugente azah tahin, hase seng sengin hatang ka-in akapta hi, tualeh a kungah “Pa aw, kei zong hing guolzawl ve” achi hi.

35Hinanleh aman, “Na naupan ahing sol a, na guolzawlna akilah mangta hi” achi hi. 36#Siem. 25.29-34Tualeh aman, “Amin Jakob kichi dih va-ia tei e izaw? Nivei ahing suomna ahita hi, uzaw ka hina ahing lah pieha, ngaivawi, tuin ka guolzawlna tan ding ahing lapieh kiata hi,” achi hi. Tualeh aman, “Kei dinga guolzawlna hing khetpieh talou na hiei mah?” achi hi.

37Tuachi’n Isaak in a dawnga, Esau kungah, “Ngaivawi, ama pen na mangpa dingin ka bawlta a, a unaute zousie asuoh dingin ka peta hi. Tualeh bu leh uain in ama ka vahta hi. Tuin nang a dingin bang kang bawlpieh ding ata diei, ka tapa” achi hi. 38#Heb. 12.17Tualeh Esau in apa kungah, “Pa aw, guolzawlna khat mai mai amah na nei? Aw pa, kei zong hing guolzawl ve, aw pa,” achi hi. Tuachi’n Esau aw ngaitahin ahing kapta hi. 39#Heb. 11.20Tuachi’n apa Isaak in a dawnga, a kungah “Ngaivawi, na umna ding lei hoinatah leh tunglam a van daichimte kiehna ahi ding’ achi hi. 40#Siem. 36.8; 2 Leeng. 8.20Na namsau in na hing dinga, na naupa nna nasem dinga: tualeh hichi ahing hi dinga, thuneina na hing nei chiengin na ngawng apat in a hahkol na thing kheta ding hi,” achi hi.

41Tuaziehin Esau in Jakob apa’n ana guolzawl taah ziehin amuda a, tualeh Esau in a lungsim in, “Ka pa lah shibai tavan, tuachiengin ka nau Jakob ka that mai ding hi.” Achi hi.

42Tualeh tam atapa upapen thugen Rebekah kungah hil in aumta a, tuachiin aman mi a sawl a, atapa naupang zaw Jakob ahan sah a, a kungah, “Ngaivawi, na upa Esau in na tungthu ah nangma tha hing sawm in akihenem hi.’ 43Tuaziehin ka tapa, tuin ka thu mangin, thou inlen, Haran a ka sanggampa Laban kungah taiin.’ 44Tualeh na upa lungthahna adai masangin a kungah ni tamlou khat va umin.’ 45Na u thangpaina na tunga a dai a, a tunga na sil bawlte a mangngil masang sien, tuachiengin mi hing sawl vangin, tuana kipat ka hing puikhesah ding hi, bang dingin ni khat thuin na ni un ka hing taan diei?” achi hi. 46Tualeh Rebekah in Isaak kungah, “Heth tanute ziehin hin ka chimtah mama hi; Jakob zi dinga tam gam nungah Heth tanute bang aneikia nahlai levang kei dingin hin bang a phatuom diei?” achi hi.

Currently Selected:

SIEMCHILBU 27: ZOUBSI

Highlight

Copy