SIEMCHILBU 26

Abraham thuhun Isak in asukip

1Tualeh tua gam a Abraham damlai a kiel tung masapen chilou, kiel dang khat ahing tung kia a, tualeh Isaak Philistinte leengpa Abimelek kungah Gerar ah ava haw a. 2Khumin Mangpa a kungah akilah a, a kungah, “Izipt gamah peisuh sinlen, gam ka hing hilding ah teng in. 3#Siem. 22.16-18Tam gamah umtadi inlen, ka hing umpi dinga ka hing guolzawl ding hi, tualeh nang leh nahah nasuonte kungah, tam gam zousie hing pevangin napa Abraham kunga ka kichiemna pen ka sukip ding hi. 4Tualeh nahah nasuonte van a aasi za in pungsah vangin, nahah nasuonte kungah tami gam zousie pevangin, tualeh nahah nasuonte vangin leitung nam zousie guolzawl in umva uh. 5Abraham in ka thu a manga, ka thuhilte, ka thupiehte, ka thuguotte leh ka dante azui ziehin,” achi hi.

6Tuachi’n Isaak Gerar ah ateng ta hi. 7#Siem. 12.13; 20.2Tualeh khuna umten azi tungtang adong ua, aman, “Ka sanggamnu ahi” achia, amel ahoiseng ziehin, Rebekah ziehin tam khomiten hing that khava uh chiin, ka zi ahi achi ngam sih hi. 8Tualeh hichi ahing hia, khuna hun sawtpi aum nuain, Philistinte leengpa Abimelek in kotta a ahing dahleh, ngaivawi, Isaak in azi Rebekah anou lai amu a; 9Tuachi’n Abimelek in Isaak ahan a, “Ngaivawi, na zi hinapi, bang dinga ka sanggamnu ahi nachi ahiei?” achi hi. Khumin Isaak in a kungah, “Ama ziehin shi khavang kachi zieh ahi,” achi hi.

10Tualeh Abimelek in, “Ka tung ua tam sil nabawl bang chidan ahiei? Mikhat in na zi ana luppi maithei asiei mah? Tuachi’n ka tung uah siemmaw hing tangsah thei nahi” achi hi. 11Tuachi’n Abimelek in, “Koizong tam mipa ahisihleh a zi sukha pouma suhlia tei tei ding ahi,” chiin amite zousie thu apie hi.

12Tuachi’n Isaak in tua gamah bu a chiinga, tuami kumin ale za anei a, Mangpa’n a guolzawl hi. 13Tuachi’n ama ahing thupi mama ta a, nasahtah a mi thupi hikhop hiel in ahing lawching deudeu hi. 14Tuaziehin aman belam hon leh bawnghon leh suoh tampi anei a, tuachi’n Philistinten athang sietta uhi. 15Tuachi’n apa Abraham damlai a apa suohten tuikhuh ataw zousie uh Philistinten ahuh bing pieh ua, lei avuadim sieng uhi.

16Tualeh Abimelek in Isaak kungah, “Ka kunga pat peimang doh in, kou sangin na thupi zawta hi achi hi.” 17Tuachi’n Isaak tuana kipat in apawt kheta a, Gerer phaihawm ah apuon inn azah a, tuanah atengta hi. 18Tualeh Isaak in apa Abraham damlai a a tuikhuh tawte uh atou kia hi. Abraham shi nua a, Philistinten ana huhdim pieh sieng uh ahi. Tualeh apa’n ana minvawsa bang chietin amin uh ahisah denta hi.

19Isaak suohten zong phaihawmah tuikhuh atou ua, tuanah tui nahnei khat amu uhi. 20Hinanleh Gerar khuo a ganchingten, “Kou tuikhuh ahi” chiin Isaak ganchingte akihaupi uhi. Tuachi’n ama toh akiniel ziehun tua tuikhuh min Esek#Esek: Kidemna, kiselna, kimelmatna china ahi achita uhi.

21Tuachi’n amaun tuikhuh dang atoukia ua, tua zong a tupieh kia ziehun akihau ua, tuami min Sitnah#Sitnah: Kimudana achita uhi. 22Tualeh khummun akipat in akisuon a, tuikhuh dang atou kia a, tuapen atu nawnsih ua, sel zong akiselpi nawnsih uhi. Tuaziehin tammun min khu Rehoboth#Rehoboth: Mun lien, mun kiching, Inndan lienpi china achita hi, “Tuin Mangpa’n ei a dingin mun kiningchingtah ahing bawl piehta a, tamgam sungah chi tampi isuong ta ding hi” achi hi.

23Tuachi’n tuana pat in Beersheba a zuonta uhi. 24Tualeh khum zan mama in Mangpa, a kungah ahing kilah a, “Kei, na pa Abraham Pasian ka hi, zau vawt sin ka hing umpi zing hi; hing guolzawl vangin hinanleh ka suoh Abraham ziehin na hah nasuon ka hing pungsah ding hi,” achi hi. 25Tualeh aman khunah maitam a bawla, Mangpa min a han a, biehbuh zong a jah a, tualeh Isaak suohten tuikhuh atouta uhi.

26 # Siem. 21.22 Tuachi’n Gerar akipat in Abimelek, a guolte lah a mikhat Ahuzath toh a galkap pawla lamkai lienpen Phikol toh a kungah ahing apei ua. 27Tualeh Isaak in a kungah, “Na hing muda ua, na kung ua kipat na hing nawdoh uh hitalou ka hiei amah? Bang chidan a ka kunga hing pei na hi uoi?” achi hi.

28Tualeh amaun, “Mangpa na kungah aum chi ka thei chien uhi. Tualeh ikikaal uah kou leh nang kikaal ngei ah kichiemna neiin nang toh thuhun khat bawlvai kachi uhi.’ 29Na siet na ding ka bawl lou ua, silhoi loungal na tunga bangma ka bawl lou ua, hamuangtah a kahing sawlmang doh bang un, kou sietna ding mawngmawng na bawl louna dingin, tuin nang pen Mangpa guolzawl in na umta hi,” achi uhi. 30Tuachi’n ama’n ama ua dingin annkuong a luipieh a, ne in adawnta uhi. 31Tualeh zingmawng matah in athou ua, akichiem tuoh ua, tuachiin Isaak in asawl khie a, lungmuong tah in apeita uhi.

32Tualeh hichi ahing ahia, tuami ni mamain Isaak suohte ahing pei ua a kungah, tui tawdoh thu ahing hil ua, a kungah “Tui ka muta uhi” ahing chi uhi. 33Tuachi’n aman tuami Sheba achita hi. Tuaziehin tua khopi min khu tuni tanin Beersheba akichi hi.

34Tualeh Esau kum sawmli a upa ahi in Hitmi Beeri tanu Judith, leh Hitmi Elon tanu Basemath zi in anei hi. 35Tuate khu Isaak leh Rebekah lungsim sugimte ahi uhi.

Currently Selected:

SIEMCHILBU 26: ZOUBSI

Highlight

Copy