PAWTDOHNA 5

Pharaoh masangah Mosi leh Aaron a ding uh

1Tualeh tuate zou in Mosi leh Aaron Pharaoh kungah ava pei ua akungah, “Israelte Mangpa Pasian in tam bangin agen hi, gamdai a kei a dinga Pawi abawl thei na dingun ka mite pei sahin achi hi,” chiin, achi uhi.

2Tualeh Pharaoh in “Israelte peisah dinga athu kaman ding Mangpa khu koi ahiei? Tua Mangpa ka thei sih hi, Israelte zong peisah sihvang,” achi hi.

3Tuachi’n amaun “Hebrute Pasian in a hing kimupi a gamdai ni thum lam ah hing peisah inlen ka hing ngen uhi, Mangpa ka Pasian uh kungah kithoina hing bawlsahin, tua ahisihleh ka tung uah, natpi ahiei namsau ahiei ahing tungsah kha ding hi,” achi uhi.#Nithumlam-mel-60 or 96 km

4Tuachi’n Izipt leengpa’n a kung uah “Bang dinga nou Mosi leh Aaron in mipite a nasepna ua kipat khawlsah na hi uoi? na nasep uh vakisep khin khian un,” achi hi. 5Tualeh Pharaoh in “Ngaiun, gamsung a mite ahing tam sengseng ta ua, tualeh a puohgih ua pat na khawlsah ta mawh ua,” achi hi.

6Tuachi’n tuami ni mamain nasep vengtute leh houtute tambangin thu apie hi. 7“Tumasang lai bangin tamite atehlei bawlna dinguh, Pawl penawn sih un, amaute kuon uhenlen pawl kitomkhawm uheh. 8Tualeh tumasanga atehlei bawl za ma uh atung uah na phut ding ua, na suh kiem pieh vawtlou ding uh ahi, athasiet man uh ahi, tuazieh a, ka Pasian kung uah va kithoi va ung achi uh ahi. 9Gimtah a asep thei na dingun mite tung ah nna tamsem guon unlen, tualeh thuginalou ngaisah da uheh,” chin thu apie hi.

10Tualeh nasem vengtute leh houtute apawtdoh ua, mipite kungah, “Pharaoh in pawl ka hing penawnsih ding hi, achi hi. 11Nouma pei unlen na mu theithei na uah, pawl kilahkhawm un, hinanleh nana sep uh bangma a ki kiem sah tuom sih ding hi,” ava chita uhi. 12Tuachi’n mite bu pawl taanga bu kungbulte lakhawm dingin Izipt gamsungah akithezahta uhi. 13Tualeh nasep vengtuten, “Tumasanga bupawl hing kipieh lai mabangin, na nasep uh, na nichin nasep uh zou kin un” chi’n anaw uhi. 14Tuachi’n Pharaoh nasem vengtuten Israel tate lah a houtu dinga aguotte uh khu avuo ua, “Bang dinga tumasanga banga zani leh tuni tan a na tehlei bawlte uh zoulou na hi uoi mah?” chi’n a phuut uhi.

Israel ten Mosi anuol uh

15Tuabepin Israeltate lah a, upate ahing pei ua, Pharaoh kungah akap ua, “Bangdinga na suohte nang hichi bawl tahlawm ahiei? 16Na suohte lah bupawl ahing pe nawn sih ua, ka kung uah tehlei khengun ahing chi uhi. Ngaivawi, na suohte ahing vuo uhi, hinanleh adih lou khu na mite ahi,” achi uhi.

17Hinanleh aman akung uah, “Thasie na hi uh, thasie na hi uh, tuazieha hing pei sah inlen Mangpa kung ah hing kithoi sah in na chi uh ahi. 18Tuaziehin tu’n pei unlen nna vasem un, bupawl vang ang kipe sih ding a, hinanleh tehlei na khen ding ua kibituh za pen na pieh ding uh ahi,” achi hi. 19Tualeh “Na nichin nasep un, na tehlei khente uh, nakiem sah thei tuom sih ding uh,” achitah in, Israel tate upaten atansiet dan uh athei ta uhi.

20Tuachi’n Pharaoh kunga kipat ahing pawtdoh tah un, amaute toh kimu dinga na ngah Mosi leh Aaron toh akimu ta uhi. 21Tualeh amaun akung uah, “Mangpa’n nou hing enkhie henlen, vai hing hawm piehta hen, Pharaoh leh asuohte mitmu ah, huot huoi nang suota ua, koute tha na dinga a khut ua namsau na tawisah tah zieh un,” achi uhi.

Pasian kungah Mosi lungkimlou

22Tuachi’n Mosi Mangpa kunglam ah akile kia a, “Aw Mangpa bang ding a tam mite hichi banga hoilou tah a na bawl ahiei? bang dinga kei nang sawl ahiei? 23Na min a Pharaoh kunga thugen dinga ka va pei apat aman tam mite tungah sil gilou abawlta a; nanglah na mite na puidoh vawt sih hi,” achi hi.

Currently Selected:

PAWTDOHNA 5: ZOUBSI

Highlight

Copy