PAWTDOHNA 4

Hing tahsang sih va uh

1Tuachi’n Mosi in adawnga, ahi vangin, “Ngaivawi, ahing tahsang sih ding ua, ka thu zong a ngaikhe ut sih ding uh: Mangpa na kungah kilah sihva achi ding zieh un,” achi hi.

2Tuachi’n Mangpa’n akungah, “Na khut sunga khu bang ahiei?” achi a, aman “Chiengkhut” achi hi.

3Tuachi’n Aman “Tuol ah khesuh vawi” achia, tuachi’n tuol a khieh suh leh gul asuohta hi, tuachi’n Mosi ataita hi. 4Tuachi’n Mangpa’n Mosi kungah “Na khut zandoh inlen amei ah man in” achi hi. Aman akhut azandoh a amat leh akhut ah chieng ahing suoh kia ta hi. 5“Tuachia amaun apu apate uh Mangpa Pasian Abraham Pasian, Isaak Pasian leh Jakob Pasian, na kungah ahing kilah hi chi, atahsan theina ding uh ahi.”

6Tua ban ah Mangpa’n akungah tu’n, “Na khut na awmah koi in” achia, tuachi’n aman akhut a awm ah akoi a, tualeh alahdoh tahin ngaivawi, akhut apha a vua abang tahi. 7Tualeh aman “Na khut na awmah koi kia in” achia, tualeh aman akhut a awmah akoi kia a, tualeh a awm apat alah doh leh, ngaivawi, achi dang ahing bang kia ta hi. 8Tuachi’n “Tambang ahing hiding, nang ahing gintat lou ua,” chiemtena khatna aw zong angaikhiet nuom sih u’leh, chiemtena nukhia pen aw, a gintat na ding uh ahi ding. 9Tualeh tambang ahing hi dinga, tam chiemtena nite a gintat lou ua, na aw zong angaikhiet tuom sih u’leh, lui apat tui na la dinga tuolgum tungah nasung ding, tualeh lui a kipat a, na tui lah khiet khu tuolgum ah sisan ahing suoh ding hi, a chi hi.

10Tuachi’n Mosi in Mangpa kungah, “Aw Mangpa, mi dangnal ka hi sih a, masang lai apat leh na suoh nang houpi nua in zong thu gen siem ka hi ngaisih a, tualemahin mi ham awh leh dang nal lou kahi,” achi hi.

11Tuachi’n Mangpa’n akungah “Mihing kam bawl koi ahiei? Ahisihleh ham theiloute, bil bingte, mutheinate, mittote, koi bawl ahiei? Keima Mangpa’n ka bawl hilou amah? 12Tuaziehin tu’n pei inlen, na kam ka umpi dinga, na gen ding kahing hil ding hi,” achi hi.

13Hinanleh ama’n ka hing ngen hi, “Aw ka Mangpa, midang sawl zaw mai in” achi hi.

14Tuachi’n Mangpa lungthahna, Mosi tungah a kuongta a, akungah, “Levimi Aaron na sanggampa umlou ahiei mah? Ama mi kamsiem ahi chi ka thei hi. Ngaiin nangma hing lamtuo dingin ahing kuon hi, tualeh nang ahing mu chiengin akipah mama ding hi. 15Tuachi’n nangman akungah thu na gen dinga, akam ah thu na mop ding hi, tualeh na kam leh akam umpi vangin, na bawl dinguh kang hil zel ding hi. 16Tuachi’n ama khu mipite kunga, na thu genpa hivan in, ama khu nanga dingin na kam ahi dinga nang pen ama adingin a Pasian bang na hiding hi.

Izipt gam a Mosi apei kiana

17Tualeh na khut in tam chieng na tawi dinga, tuatoh chiemtenate na bawl ding hi,” achi hi. 18Tuachi’n Mosi apei a, asungpa Jethro kungah ahing kile kia a, akungah “Izipt gam a um ka unaute kunga peikia ding leh adamna uoi mah chi va-en dingin hing hawsah in chin ka hing ngen hi,” achi hi. Tuachi’n Jethro in Mosi kungah “Lungmuong tahin peita’n” a chi hi.

19Tualeh Mangpa’n Midian gam a Mosi kungah, “Pei inlen Izipt gamah kilekia ta’n nang hing tha sawmte a shi siengta uhi,” achi hi. 20Tuachi’n Mosi in a zi leh atapate azawpi a, sabiltung tung ah atuong sah a, Izipt gam langah ahing kile kia ta uhi. Tualeh Mosi in Pasian chieng a khut ah atawi hi.

21Tualeh Mangpa’n Mosi kungah, “Izipt gam a kile kia dinga na pei chiengin, na khuta ka koi tua sil lamdang zousiete, Pharaoh masang ah bawl teitei in, hinanleh a lungtang ka sukhau dinga, mipite apeisah lou na dingin. 22Tualeh nangman Pharaoh kungah, Mangpa’n Israel khu ka tapa ahia, ka ta masapen ahi, achi hi. 23#Pawt. 12.29Tualeh na kunga ka gen ahi, ka nna ahing seppieh thei na dingin, ka tapa peisah in, na peisah nuom sihleh, ngaivawi na tapa, nata masapen that ding kahi,” achi hi va chiin.

Mosi tapa teptanna

24Tuachi’n lampi a giehbuh ah tambang ahing hita a, Mangpa’n Mosi ahing kimupi a, tha dingin asuita hi. 25Tualaitahin Zipporah in suong hiem khat ala a, atapa tep atan khie a, Mosi kengbul ah apai a, “Kei dingin sisan suo pasal na hi chienvawt hi” achi hi. 26Tuachi’n Mangpa’n apeisanta a, khumin Zipporah in Teptan ziehin sisan suo pasal na hi, achi hi.

27Tualeh Mangpa’n Aaron kungah, “Mosi kimupi dingin gamdai ah vapei in” achi hi. Tuachi’n apeita a, Pasian muol ah ava kimupi a, atawp ta hi. 28Tuachi’n Mosi in Aaron kungah ama sawlpa Mangpa thu zousie leh sil lamdang abawl dinga, athupieh zousie ahil tahi. 29Tuachi’n Mosi leh Aaron apei ua, Israel tate upa zousie ahan khawm ua, 30Tuachi’n Aaron in, Mangpa’n Mosi kunga, athugen zousie a gen a, mite masangah chiemtenate abawl hi. 31Tuachi’n miten ana gingta ua, tualeh Mangpa’n Israel tate ahing ve a, athuohgimnate u’zong ahing enta chi azah un, alu uh akunsah ua, Pasian a bie uhi.

Currently Selected:

PAWTDOHNA 4: ZOUBSI

Highlight

Copy