NASEPTE 27

Paul Rome khopi zuon a apeina

1Tuachi’n Itali gam a tembaw a ka pei dinguh thu phatsah ahi tahin, Paul leh suongkul taang koite ahiei khu Augustus pawl galkap zahoutupa amin Julius kichipa khut ah akemsah uhi. 2Tuachi’n Asia gam tuipi gei tawn a peiding Adramitium tembaw ah ka tuong ua, ka kipankheta uhi. Aristarkus kichi, Thessalonika khuo a teng Masidonia gam mi khat ka tuonpi uhi. 3Azingni in Sidon ka tung uhi. Tualeh Julius in Paul ahoi bawl a, Paul tahsapna ana pieh theina dingun alawmte kunga zalentaha ahaw ding aphal hi. 4Tuana pat in tembawin ka pei kia ua, hui ahing le lan ziehin Saipras gam lie lam ah ka pei uhi. 5Silisia gam leh Pamphilia lampang tuipi gei zuia ka peisuh nua un, Lisia gam a Mira khopi ka tung uhi. 6Tuanah galkap zahoutupain Itali gam zuon ding Alekzandria tembaw khat amu a, tuanah ahing tuongsah hi. 7Awl-awl in ni tampi ka pei ua, hasatahin Nidas ka tung hamham ua, hui ahat ziehin tangtahin ka pei theita sih ua, Salmone zuon in Kret tuilaisie gam lie lam ah ka pei zawta uhi. 8Hasatah a peisuohin Lasia khopi kunga um tembaw khawlna kilawm kichi mun ka tung uhi.

Tembaw siet ding Paul in athei

9Tuachi’n ni tampi abeita, tualeh tembaw a pei azauhuoi ziehin, anngawlni na ngawn abeita a, Paul in amaute thu ahilta hi. 10“Pute aw, ikhuolzinna tembaw in sietna leh manna nasetah tuoh ding ahi chi ka thei hi, tembaw vante leh atembaw guoh hilouin, ihinna nasan uh azauhuoi ahi,” achi hi. 11Ahivang in, galkap lamkaipa’n Paul gen sangin tembaw hehpa leh aneipa thu agingta zaw hi. 12Tualeh phalbi sunga umna dingin tembaw khawlna mun akitup lou ziehin, atamzawin, tuana kipata kitawldoh a Phoeniks tun teitei a, khuna phalbi sung um ding asawmta uhi. Phoeniks pen Kret tuilaisie gama tembaw khawlmun khat ahia, simtum lam leh maltum lam nga ahi.

Tuipi tungah huipi hat

13Sim hui nem awl awl a ahing lan tahin, adei lam uh muta in akingaituo ua, tembaw henkipnate asut ua, Kret tuipi gei zuiin akitawl uhi. 14Hinanleh hun tomkhat zouin Kret tuilaisie gam a kipat in Euroklidon kichi huipi hattah ahing laang suh hi. 15Tua huipiin tembaw ahing phuta a, hui lah ah ka pei zou nawn sih ua, ka hakheta ua, tuachi’n ahing taw kawikawita hi. 16Tualeh Klauda achi uh tuilaisie gam khat zul zul ah ka tai ua, hasatahin kuong neu khu ka bitsah thei hamham uhi. 17Akaidoh zou un, apanpina khaute azuun ua tembaw nuoi lam ah aviel ua, tualeh Sirtis senel lah ah hing lenlutpi khava chi zauin puonzahnate apuasah ua, tuachi’n ahing mawh taw kawikawita hi. 18Huipi hat in hing mutleeng kawikawi ahiziehin, azingni in tembaw jangsah dingin tembaw vante tuipi ah apaidoh uhi. 19Ani thum niin tembaw vante ka khut ngei un ka paidoh uhi. 20Nitamtah ni leh aasite kilang louin, huipi hattah alaang zinga, hin ding mawngmawng ka ki nem nawn sih uhi. 21Hinanleh sawtpi ann ne lou a, a um nua un, Paul alah uah ahing dinga, “Pute aw, Kret tuilaisie apat kipandoh lou dingin ka thugen ngaikhie uh lachin, tambang sietna leh manna tuoh lou ma ding hive u’chin. 22Tuin lungmuong taha um dingin ka hing ngen ahi, aziehpen na lah uah koiman ahinna amansuo sih ding uh, hinanleh tembaw pen ase ding hi. 23Aziehpen Ama a ka hi a, ana zong ka sep Pasian vansawlsieng tuzanin ka kungah ahing dinga, 24Zau sin Paul, Kaisar mai ah na ding ngei ngei ding hi, tualeh ngaiin, tembaw a na tuonpite zousie zong Pasian in ahing pieh na hita, ahing chi hi. 25Tuaziehin pute aw, lungmuong tahin um un, Pasian ka gingta a, ahing hil bangbangin a um ding hi. 26Ahivang in tuilaisie gam khat ah, ahing sepdoh ngei ngei ding hi, achi hi.

27Hinanleh Adria tuipi a huipi in asuh atunga ahing sem leng uh azan sawm leh li zanin zankim lai ding velin tembaw heh mite’n gam khat tungding hiin akitheita uhi; 28Tualeh tuithuh dan ate ua, lam sawmni hiin athei ua, gamla deu apei nua ua ate kia u’leh lam sawm leh nga, hiin athei uhi. 29Tuachi’n suongpi phuhkhah ding azau ziehun, tembaw mei lamah sia-ka#Sia ka Sap ham in anchors li akhie ua khovah ngah in thu angenta uhi. 30Tualeh tembaw hehmiten tembaw mai lam a sia kate khie kipangin kuongneu khu tuipi ah akhaikhie ua, tembaw taisan atum uhi. 31Paul in galkap lamkaipa leh galkapte kungah “Tam mite kuonga a umden sih u’leh, na bit sih ding uh,” achi hi. 32Tuachi’n galkapte’n kuongneu khaute asattan ua, akesuh sahta uhi.

33Khovah kuonin Paul in a unpi un ann ne dingin asawl a, “Tuni ann ngawl a na ngah ua, bangma ne lou a na umna uh ni sawm leh ni li ahita. 34Tuaziehin ann ne dingin ka hing ngen ahi; tam pen na hinna ding uh ahi, noute koiman asam zang khat zong amansuo sih ding,” achi hi. 35Aman tam thute agen zouin tanghou ala a, amaute zousie masangah, Pasian kungah kipahthu agen a, tanghou abalkeh a, ane panta hi. 36Tuachi’n amaute ahing kithakhausah ua, ann ane chietta uhi. 37Tualeh tembaw sunga um zousie ka unpi un za ni leh sawmsagi leh guh ka hi uhi. 38Tualeh ann aneh kham zou un tembaw jangsah dingin mangbute tui lah ah apaita uhi.

Tembaw asie a mite asuohta uh

39Zing khuo ahing vah tahin, agam chin athei ta sih ua, hinanleh tembaw khawlna pieutah nei tuipi pang khat amu ua, ahithei liei leh khuna tembaw tawllut atum uhi. 40Amauten sia kate akhesuh ua, tuipi ah anuasie ua, tualeh tembaw heina puonjahte asut ua, amailam a puonjahpen hui sem dingin azahtou ua, tuachi’n pieutah lam zuon in apei uhi. 41Tuachi’n tuilienpi ni kisuhtuona ah ka lut kha ua, tembawin lei asusah ta ua, tembaw mailam lei ah akiphut detta a, suhling guollouin a umta hi, ameilam pen tuihuol ahat zieh in akehta hi.

42Galkapten saltangte tuizap a galkai umkha va uh, achi zieh un, tha atumta uhi. 43Hinanleh galkap lamkaipa in, Paul hundam a ut ziehin, asil tup uh akhaam a, tuizap siem pouma tuipi a tawmdoh a, pieutah a galkai masa dingin thu apie hi. 44Tualeh adangte pawl khat kuong dang tungah pawl khatte tembaw sie singpeh ahiei a tuong a galkai dingin thu apie hi. Tuachi’n a unpi un bit tahin agalkai chiet ta uhi.

Currently Selected:

NASEPTE 27: ZOUBSI

Highlight

Copy