NASEPTE 28

Malta galkaina leh Paul gul in atuhna

1Tuipi gei a bittah a ka suohtat nua un tua tuilaisie gam khu Malta ahi chi ka theita uhi. 2Agam mite ka tung uah asiem mama ua, guozu a adap ziehin mei ataw ua, ka unpi un ahing na kipahpi mama uhi. 3Paul in singkang lom khat atom a mei a avah leh meisa in ahul ziehin gul khat ahing pawtdoh a, akhut atu a, akikhai denta hi. 4Tuachi’n agam miten Paul khut a gul kikhaiden amutahun, “Tam mipa tuolthat hi ngeingei va, tuipi akipat suohta nanleh dihtah a thukhennain ahin ding phal nawnlou ahita,” achi uhi. 5Hinanleh Paul in tua gul khu meikhua ah athingkhie a, bangma achi sih hi. 6Ahivang in amauten akhut hing pawm ahiei, ahisihleh thakhat a pua a shi pai dingin agingta uhi; hinanleh sawtpi angah nua ua bangma achilou tahin, alungsim uh aheng ua, pasien ahi achi zawta uhi.

Publius pa suhdamna lamdang

7Tua mun khu, tua tuilaisie a mi poimawtah amin Publius kichipa gam ahia, aman ahing na kipahpi a ngainatahin ni thum ahing zintungsah hi. 8Tualeh Publius pa khosih leh santen in ana lum a; Paul akungah avalut a, atunga khut ngain, thu angen a asudam hi. 9Tuachi’n tambanga abawl tahin, tua tuilaisie gam a mi dang natna nei zousie zong ahing pei ua, adam chietta uhi. 10Amauten lam tampi ah koute ahing pahtawi ua, tualeh ka pei kuon un ka poimaw uh ahing guon uhi.

Paul Rome zuon a apeina

11Ha thum nuain, Alekzandria tembaw phalbi sung tua tuilaisie a taam, achiemtena unau piengkop kichi ah ka tuong ua ka peita uhi. 12Sirakus ah ka kinga ua, tuanah ni thum ka taam uhi. 13Tuana pat in ka pei kuol ua, Rhegium ka tung ua, tualeh ni khat zouin sim hui ahing langa, azing niin Puteoli ka tung uhi. 14Tua khuo ah sanggamte ka mu ua, akung ua ni sagi taam dingin ahing hou ua; tuachi’n Rome khopi lam zuon in ka pei zelta uhi. 15Rome khopi a um sanggamte’n ka tanchin uh azah tahun Appii sumsinna mun leh zinbuh thum tandong hing peiin ahing dawn ua, Paul in amaute amu tahin Pasian kungah kipahthu agen a alungmuongta hi. 16Rome khuo ka tun un galkap zahoutupain hentate khu vengmi galkap lamkaipa khutah apekhie a, hinanleh Paul pen vengmi galkap khat toh amatanga a um ding phalna apie hi.

Paul in Rome khuo a Judate akimupina

17Tualeh ni thum nuain Juda lamkaite ahankhawm a, amaute ahing kikhop tahun, Paul in akung uah, “Sanggamte aw, imite leh ipu ipate tawndan kal a bangma ka bawllou vangin, Jerusalem a kipat in henta a piehkhiet ka hita hi. 18A hing etdih nua un, ka tunga shina khop hiel bangma a umlou ziehin ahing hadoh ut uhi. 19#Nasep. 25.11Hinanleh Judaten aniel zieh un, Kaisar kungah ka thu tutlou thei ka hita sih hi; ka nampite hehna a bawl vang ka hi sih hi. 20Tuazieha tam thute a noute toh kimutuo a, kihoulim dinga ka hing hatkhawm mawng ahi; Israelte kinepna zieha tam khainieng a kaan ka hi,” achi hi. 21Tualeh amauten akungah, “Kouten Judia gama kipat, na tungthu ah laithot ka mu sih uh. Tua gam a kipat a tam mun a hing pei unaute koiman na tungthu aselam in bangma agen ngai sih uhi. 22Hinanleh na ngaidan nangma akipat ka za nuom uhi. Aziehpen tam Pawlte gam chin a agensiet uh, ka na thei uhi,” achi uhi.

23Tuachi’n ani ding aguot ua, tua ni ahing tun tahin, ama umna ah mi tampi ahing pei ua, zingmawnga kipat nitah lam dongin akung uah Pasian leenggam thu hilchien in atheisah a, Mosi dan laibu leh guolneite laibute suutpi in Jesu lam ah amaute azawllut sawm hi. 24Kimkhatten athugen agingta ua, pawlkhatten agingta sih uhi. 25Amaute akithutuoh theilou bep un, Paul in thu khat agen zouin akikhenta uhi. Paul thugen khu tami ahi: “Hagau Siengthou in guolnei Isai kam a ipu ipate kunga ana gen khu thudih ahi:

26 # Isai. 6.9,10 Tam mite kungah va pei inlen,

va genin,

zah pen na za ding ua,

na theisiem sih ding uh;

mu pen na mu ding ua,

na theidoh sih ding uh;

27Aziehpen tam mite lungtang angong gawpta a,

abilte uh ahum ua,

tualeh amitte uh asiing uhi;

tuachilouin amit un amu kha ding ua,

alungtang un atheisiem kha ding ua,

tuachi’n ahing kihei ding ua,

ken kana sudam kha ding hi,”

achi khu.

28Tuaziehin Pasian hundamna thu Jentelte kunga sawl ahita a, amauten angaikhe ding uh, chi thei un, achi hi. 29Tam thute Paul in agen zouin, Judate amaute lahah akiniel ua, akikhenta uhi. 30Paul khu kum ni sung vingveng ama innluona ah atenga, ama mu nuom pouma ana kipahpi hi. 31Pasian leenggam thu agen a, Mangpa Jesu Khrist tungthu hangsan tahin ahil zel a, koiman ama akham sih hi.

Currently Selected:

NASEPTE 28: ZOUBSI

Highlight

Copy