NASEPTE 26

Agrippa mai ah Paul in adihna agen

1Tuachi’n Agrippa in Paul kungah, “Na dihna thu na gen thei hi,” achi hi. Tuachi’n Paul in akhut azah a adihna thu agen panta a; 2“Lengpa Agrippa aw, Judaten ahing hehna zousie ah ka dihna thu tunia na mai a ka gen thei ding ziehin hampha ka kisa hi; 3Adiehin, Judate toh kisai tawndan leh thubuoi zousie thu a pil mama na hi ziehin hampha ka kisa hi. Tuaziehin ka thu lungduoi tah a hing ngaikhiet pieh dingin ka hing ngen hi.

4“Ka naupan lai akipat Jerusalem khuo a keima chi leh namte lah a ka hindan leh ka khankhiet dan achiil akipat, Judate zousie in athei uhi. 5#Nasep. 23.6; Phil. 3.5Achiil akipat in ka tanchin athei uhi, ka sakhuo dan ua akulmut pen dungzui a, hinkhuo na zang Pharisai ka hi chi a ut uleh agen thei tham ding uhi. 6Tualeh tuin, Pasian in ka pu ka pate uh kunga thuchiem ana bawl kineppina ziehin, thukhenpieh a umin ka ding hi. 7Tua thuchiem kinem in ka minam uh nam sawm leh nam ni ten, sun leh zan in Pasian nna phatuomngai tah in ka sem uhi. Lengpa Agrippa aw, tam kinepna ziehin Judate’n ahing heh uh ahi. 8Pasian in mishite akaithou chi bang dinga nouten gintat huoilou a ngaituo na hi uoi?

9 # Nasep. 8.3; 22.4,5 “Keima mama in zong Nazareth Jesu min dou a sil tampi bawllou theilou in kana kingai hi 10Tuabangin Jerusalem khuo ah zong ka na bawl zel hi. Siempu liente akipat in thuneina lai muin misiengthoute tampi suongkul ah ka khum hi, tualeh amauh atha lai un, phasahpi lam ah ka na pang zel hi. 11Tualeh kikhopna inn chin ah amaute ka gawt zel a, Jesu min gensiet sah teitei ka tum hi; tualeh atung uah ka lungthah sengsenga, amaute gawt dingin gamdang khopite nangawn ah ka kuon zel hi.

12“Tuabang bawl dingin, siempu liente akipat thuneina muin, asawlna lai uh tawi in Damaska khopi zuon in ka pei hi. 13Lengpa aw, lampi a ka pei laiun, sunkim laitahin van a kipat in vah ni sanga vahpha zaw, kei leh ka zawpite kim a ahing taang ka mu hi. 14Ka unpi un tuol ah ka pua ua, Hebru ham in Saul, Saul, nang bangdinga hing sugenthei na hiei? Kilna sia zumte peh nanga dingin ahasa hi, chi a hing houpi aw khat ka za hi. 15Tuachi’n ken, koi na hiei Mangpa? Ka chi a, tualeh Aman na suhgenthei Jesu ka hi, achi hi. 16Hinanleh thou inlen na kengin dingin, tam na sil mute leh na kunga ka hing musah nahlai dingte, theipitu hi ding leh nna sem dinga hing bawl dingin na kunga hing kilah ka hi. 17Judate leh tua ka hing sawlna Jentelte khut a kipat ka hing hundoh ding. 18Jentelte mit suvah ding leh miel apata vahlam ngasah dingin, tualeh Setan thuneina apat Pasian lama akihei theina ding u’leh khelna ngaidamna amu theina ding u’leh kei ahing gintat zieh ua, kisusiengte lah a goutan anei theina ding uh ahi, achi hi.

19“Tuaziehin, Aw leengpa Agrippa, vanlam kilahna thumanglou in ka um sih hi. 20#Nasep. 9.20,28,29Hinanleh amasa penin Damaska khuo a mite kungah, tuachi’n Jerusalem khuo a mite kungah, tuaban ah Juda gam pumpi a mite kungah, tualeh Jentelte kung ah zong, akisia ua Pasian lam a akihei ua, kisiana toh kituoh nna asepna dingun ka genzah ta hi. 21Tamte ziehin Judaten biehinnpi ah ahing man ua, tha ahing tum uhi. 22Pasian a kipat panpina ka mu ziehin, tuni tan in mi neute leh mi liente kungah theipina thu gen in ka ding na lai hi. Guolneite leh Mosi in hing tung ding ahi chi a agente uh chiloungal thudang ka gen sih hi. 23#1 Kor. 15.20; Isai. 42.6; 49.6Khrist in genthei athuoh dinga, mishite lah a thoukia masapen ahi dinga, tualeh Judate leh Jentelte kunga vah amusah ding, chi thu ahi, achi hi. 24Paul in tambanga adihna thu agen lai in, Festus in aw ngai tahin, “Paul amaw hita teh, na siemna in hing su maw gawp ahita,” achi hi.

25Hinanleh Paul in “Zatat huoi Festus aw, amaw ka hi sih hi, thudihtah leh pilna thu gen ka hi zaw hi. 26Tam thute akunga leengpa’n zong athei hi, tuazieh in akung a zau lou a ka genna a hi, tam silte akungah bangma im ahisih chi ka thei hi, tam silte aningkawma kidap bawl ahi sih hi. 27Lengpa Agrippa aw, guolneite thu na gingta ei? Na gingta chi ka thei hi,” achi hi. 28Tuachi’n Agrippa in Paul kungah, “Hun tomnou sungin Khristian hing suoh sah tum na hi” achi hi. 29Paul in, “Tom in sawt taleh, nang maimai hilou in, tuni a ka thu za zousie keima banga um dingin, Pasian kungah ka ngen hi, tam kolte vang bun louin,” achi hi.

30Tam thute agen zoutah in, leengpa leh uhpipa leh Bernisi tualeh akunga toute zousie zong ading chiet uhi. 31Tualeh atuom a apawtdoh nua un, akihou ua, “Tam mipa’n shina leh kolbuna khop hiel, sil bangma abawl sih hi,” achi uhi. 32Tuachi’n Agrippa in Festus kungah, “Tam mipa’n Kaisar kunga a thu tut sawmlou hileh hakhiet thei mai ding hiven,” achi hi.

Currently Selected:

NASEPTE 26: ZOUBSI

Highlight

Copy