NASEPTE 14

Paul leh Barnaba Ikonium ah

1Ikonium khuo a Judate kikhopna inn ah Paul leh Barnaba alut khawm ua, thu agen ua, tuachi’n Judate leh Greekte mi tamtahin agingta ta uhi. 2Hinanleh agingta lou Judaten Jentelte achiilsie ua, unaute gel muda dingin alungsim uh asuhsietpiehta uhi. 3Tuaziehin Mangpa min suongin hangsantah a thu gen in hun sawtpi aum uhi, Ama’n chiemtenate leh sil lamdangte akhut ua bawlsah in, A hepina thu atheisah zel hi. 4Hinanleh khopi sung a mite akilangkhenta ua, pawlkhatten Judate lam apanpi ua pawldang khatten sawltahte lam apanpi uhi. 5Tuachi’n Jentelte leh Judaten avaihawmte u’toh kithuo a zumhuoi taha bawla suonga selup atup lai un; 6Amaun tam thu ana thei ua, Likaonia gam a Listra leh Derbe khuote leh akimvel gamte ah ataita ua. 7Tuanah khantanhoi agenta uhi.

Kengbai pasal khat damsahna

8Tualeh Listra khuo ah kengbai koi ahiei mi khat thahatna neilou in atou a, apien chiil apat kengbai mawng ahia, akengin apei ngai sih hi. 9Tua mipan Paul thugen lunglut tahin angaikhie hi. Tualeh Paul in ama hoitah in a ensaal a, damna ding khop ginna a nei hi, chi athei hi, 10Aw ngaitahin, “Na kengin ding tangin,” achi a, tuachi’n ama akitawm a, akengin apeita hi. 11Paul sil bawl mipiten amu tah un, aw ngaitahin akikou ua, “Likaonia ham in pasiente mihing mel pua a ikung ua hing kum suh ahi uh,” achi uhi. 12Amaute’n Barnaba khu Zeus achi ua, Paul pen thugenpipen ahi ziehin Hermis achi uhi. 13Tuachi’n khopi mai a um Zeus biehinn siempupa’n bawngtalte leh pahkhite kotpi bul ah ahing tawi a, mipite toh amaute gel mai ah kithoina bawl asawm uhi.

14Hinanleh sawltahte Barnaba leh Paul in tam thu a zah tah un, apuonsilte uh abotkeh ua, mipite lah ah kikou pumin atailut ua, 15#Pawt. 20.11; Late. 146.6“Pute, bangding a tam silte bawl na hi uoi? koute zong noute piendan banga mihing ka hi bou uhi, tambang pannabei sil na bawlte ua kipata hing kihei a, van leh lei, tuisuogiet leh asunga sil um zousie siempa Pasian hing kunga na hing kihei theina ding un, khantanhoi ka hing tut uh ahi. 16Aman khanglui laiin namchin amauh ut bang chiet a agamtat ding uh ana phal hi. 17Ahivang in Ama theipina panglouin ana umsah sih a, silhoi bawl in van akipat guotuite leh louhai gaphate ahing pie a, ilungtangte uh neh ding ann leh kipahnain adimsah hi,” achi uhi. 18Tualeh tam thute gen in, amaute kunga kithoina bawl lou dingin akham zou hamham uhi.

Paul suonga sena leh Derbe a taina

19Tuachi’n Antiok leh Ikonium khuo akipat Juda koite ahiei khunah ahing haw ua, mipite athuzaw ua, tuachi’n Paul khu suongin asep ua, ashi hitava achi ziehun, khopi pulam ah akaikhie uhi. 20Ahivang in nuazuite akim a ahing peikhawm lai un, ahing thou a khopi sungah ahing lut kiata hi; tualeh azing ni’n Barnaba toh Derbe lam ah apeita uhi.

Antiok a apeikiana uh

21Tualeh amauten Derbe khuo ah khantan hoi agen ua mi tampi ahil zou un, Listra leh Ikonium tualeh Antiok ah akinuale kiata uhi. 22Gim gentheina tampi thuoh in Pasian leenggam ilut ding mawng ahi chiin nuazuite hinna hagau akhausah uhi. Ginna a umden dingin ahantawh uhi. 23Hattuom chin ah upate aguot ua, ann ngawl a athum nua un, amuon uh Mangpa kungah amaute akemsah uhi.

24Pesidia gam atotsuoh nua un, Pamphilia ah ahing tung uhi. 25Perga khuo a thu agen zou un Attalia khuo ah apei suh uhi. 26Attalia khuo akipat in Antiok zuon in kuongin apei ua, hattuom ten Pasian hepina sunga amaute akepsah ua, anasep zousa uh sem dinga aguotna uh Antiok khuo ahing tungta uhi.

27Tualeh ahing tun un hattuomte ahankhawm ua, Pasian in amaute zanga asil bawl zousie leh Pasian in Jentelte dinga ginna kot ahon pieh dante ahil uhi. 28Tuachi’n nuazuite toh hun sawtpi a um khawmta uhi.

Currently Selected:

NASEPTE 14: ZOUBSI

Highlight

Copy