NASEPTE 13

Barnaba leh Saul sawlkhiehna

1Antiok khuo a hattuom umte lah ah, guolneite leh thuhil siete a um uhi: Amaute khu Barnaba, Nigar kichi Simeon, Sairin khuo a mi Lusia, vaihawmpa Herod toh khang khawm Manaen leh Saul te ahi uhi. 2Amaute Mangpa nasem a ann ngawl a aumlaiun, Hagau Siengthou in, “Barnaba leh Saul amaute ka hatna zieh sem dingin, kei a dingin hing setuompieh un,” achi hi. 3Tuachi’n ann ngawl a thungetna anei zou un, Barnaba leh Saul tungah akhut uh anga ua, asawlkheta uhi.

Paul Missionary khuolzinna masapen

4Tuachi’n Hagau Siengthou in asawldoh bangin Seliusie khuo ah apeisuh ua, tuana kipat in Saipras#Saipras-Kupra zong akichi hi. Kupros (Greek) lam zuonin kuongin apeita uhi. 5Tualeh Salamis khuo atuntahun Judate kikhopna innte ah Pasian thu agen uhi. Amaun Johan zong amauh panpi dingin azawpi uhi.

Bar Jesu toh kibuoina

6Tuin Saipras tuikul gam tuonsuohin Paphos khuo ah atung ua, khunah dawisiem guolnei tahlou, Juda mi khat atuoh kha ua, amin Bar Jesu ahi. 7Tua mipa pen, gam uhpa Sergius Paulus mi piltah khat nasem a akunga um ahi, tua gam uhpa’n Pasian thu azah ut ziehin Saul leh Barnaba ahansah hi. 8Hinanleh dawisiem Elima in, (Elima pen ama uh ham a Bar-Jesu min khiehna ahi) gam uhpa’n gintatlousah tumin, amaute ana doudal hi. 9Tuachi’n Saul (Paul zong akichi hi) Hagau Siengthou a dimin Elim a a ensaalden a, 10“Aw nang milepchie leh hoilouna chintenga dimpa, nang dawimangpa tapa, nang dihtatna zousie melmapa, Mangpa lampi tangtahte heikawi tawplou ding na hiei mah? 11Ngai in, tuin Mangpa khut na tungah ahing tuta hi, na mit ataw dinga bangtan ahiei ni vah mu louin na um ding” achi hi. Tuachi’n thakhat in, tuimei bang miel atungah ahing kie a, akhut a; kai ding mi suiin akimai kawita hi. 12Tuachi’n gam uhpa’n tua sil kibawl amu tahin Mangpa tungtang thu kihilna lamdangsain agingta ta hi.

13Tuachi’n Paul khu alawite toh Paphos khuo apat in apei ua, Pamphilia gam a Perga khuo ahing tung ua, tualeh Johan in amauh nuasiein Jerusalem ah akinuale kiata hi.

Paul in kikhopna inn a athugen patna

14Hinanleh amaute Perga khuo akipat in Pisidia gam a Antiok khuo atung ua, tualeh khawlni in kikhopna inn ah alut ua, atou uhi. 15Dan laibu leh guolneite laibu asim zou un, kikhopna inn vaihawmte’n amauh achiel ua, “Mite leh unaute aw, mipite a ding hanthawnna thu gen ding na nei uleh gen un,” achi uhi. 16Tuachi’n Paul adingtou a, amaute akhutzapa, “Israel mite leh nou Pasian zaudan siem mite aw, ngai un. 17#Pawt. 1.7; Pawt. 12.51Tam Israel mite Pasian in ipu ipate ana tel a, Izipt gam a mikhuol banga ataam lai un, amaute atawisanga, aban thahat in apuidoh kia hi. 18#Kisim. 14.34; Danp. 1.31Kum sawm li sung vingveng gamdai a, agamtatna uh ana thuoh teitei hi. 19#Danp. 7.1; Josh. 14.1Tualeh Kanaan gam a nam sagite asuhmang zouin, agam uh, ama ua dingin ahawm piehta hi. 20#Vai. 2.16; 1 Sam. 3.20Tuami nuain kum zali leh kum sawm nga sung vaihawm mite apie a, guolnei Samuel hun chieng dongin. 21#1 Sam. 8.5; 1 Sam. 10.21Tuami nuain leeng khat ana ngen ua, tuachi’n Pasian in Benjamin nam a mi khat Kish tapa Saul apie a, aman kum sawmli sung vai ahawm hi. 22#1 Sam. 13.14; 1 Sam. 16.12; Late. 89.20Tualeh ama a lahdoh nuain aleengpa dingun David atungdoh ta hi; Pasian in tua mipa thu theipi in, Jesse tapa David ka lungtang bang puo mi ka mudohta, aman ka deilam abawl ding, achi hi. 23Tam David hahlesuonte lah ah Pasian in athuchiemsa dungzuiin Israelte kungah Hundampa Jesu atung dingta hi. 24#Mak. 1.4; Luk. 3.3Jesu ahing tun masangin Johan in Israelmi zousie kungah Kisiana baptisma ana hil masata hi. 25#Jn. 1.20; Mat. 3.11; Mak. 1.7; Luk. 3.16; Jn. 1.27Johan in anasep azaw kuon lai in, nouten kei koi hi dingin na hing ngaituo uoi? Ama hilou ka hi. Hinanleh ngai un, ka nua ah mi khat hing pei ding ahi, Kei pen akedap khau sutpieh taah zong ka hi sih hi, achi hi.

26“Mite leh Abraham hahlesuon ka sanggamte leh na lah ua Pasian giing Jentelte aw, na kung uah tam hundamna thu ahing kihah hi. 27Jerusalem khuo a tengte leh avaihawmte un Jesu ana theilou zieh un, ahisihleh khawlni chin a asim khiet uh guol neite thugente theilou in Ama siemlou tangsah in, tua thute ana tang tungsahta uhi. 28#Mat. 27.22,23; Mak. 15.13,14; Luk. 23.21-23; Jn. 19.15Amauten ashina ding khop azieh atungah bangma mu sihnan u’leh zong, Pilat kungah tha dingin angen teitei uhi. 29#Mat. 27.57-61; Mak. 15.42-47; Luk. 23.50-56; Jn. 19.38-42Amaun atungtang thu na kigielsa zousie asuhtangtun nua un, singdawn akipat Ama alakhie ua, han ah asielta uhi. 30Hinanleh Pasian in mishi lah akipat Ama akaithou kiata a, 31#Nasep. 1.3Tualeh amatoh Galili gam akipat a Jerusalem khuoa apeipitoute kungah ni tampi sung akilah hi; tua mite khu mite kunga athu theipi mite ahi uhi. 32#Late. 2.7Tualeh Kouten zong ipu ipate uh kunga ana chiemsa, tua khantan hoi kipah huoi ka hing hil uhi. 33Pasian in Jesu akaithou kiana tungtawn in, tua thuchiem ei a tate adingin atangtungsahta hi. Late nina ah zong:

Nang ka tapa na hi a,

tuni in kang hingkheta hi,

chia gel bangin.

34 # Isai. 55.3 Muotna mun a kilekia nawnlou dinga, Pasian in Ama mishi lah akipat akaithaw thu tambangin agen hi:

David kunga guolzawlna Siengthou leh,

muonhuoi kachiem,

Nangma ka hingpe ding hi,

chiin.

35 # Late. 16.10 Tuaziehin Aman late dang khat ah,

tambangin agiel hi,

Nang na misiengthoupa khu,

amuotmang ding na phal sih ding hi,

achi kia hi.

36Aziehpen David in Pasian deina banga ama khanga mite adinga nna asep zouin ashi a apu apate kungah akivui a amuot mangta hi. 37Hinanleh Pasian in akaithoupain muotmangna amu sih hi. 38Tuaziehin ka unaute aw, theiun, tam Jesu tungtawn a khelna ngaidamna thu noute kunga gen ka hi uhi. 39Tualeh koipou agingta pouma khu, Mosi dan a siem natan zou louna uh sil zousie a kipat siemtansahin a um hi. 40Tuaziehin pilvang un, tuachilouin guolneite laibu a thu kigen na tung uah ahing tung kha ding hi.

41 # Haba. 1.5 Nou mi simmaw hatte en un,

lamdangsa unlen,

Mangthai un;

Aziehpen na damsungun,

nna khat ka sem a,

tua nasep khu noute hing kihil nanleh,

na gingta vawtsih ding uhi,

chiin ana gen uhi,”

achi uhi.

42Kikhopna inn apat Paul leh Barnaba apawtdoh laiun khawlni kia chienga tam thute gen nalai dingin mipiten angen uhi. 43Mipi kikhawmte akikhenzah tahun, Judate tampi leh Juda biehdan zui Pasian a kipumpieh lah a mi tampi in Paul leh Barnaba azui ua, Paul leh Barnaba in amauh ana ahoupi ua, Pasian hepina a um ngitnget dingin amauh ahantawh uhi.

Paul in khawlni kia a athugen

44Tualeh khawlni kia in, khopi sunga mi zousie akhojang phiel un Pasian thu ngaikhe dingin ahing kikhawm uhi. 45Hinanleh Judaten mipite amu tah un, thangsietna in adim ua, Paul thugen akal ua, agensie uhi. 46Tuachi’n Paul leh Barnaba in hangsan tahin agen uhi. “Noute kunga Pasian thu gen masah ding mawng ahi a, hinanleh nouten na nial ziehun, kumtawn hinna tang taahlou a na kibawl ziehun, ngai un, Jentelte lam ka ngat a uhi.

47 # Isai. 42.6; 49.6 Aziehpen Mangpa’n koute tambangin thu ahing pie hi:

Jentelte adinga vah hiding leh,

kawlmong donga hundamna tun dingin,

ka hing guot hi,”

achi hi.

48Jentelten tam thu azah tahun akipah sengseng ua Mangpa thu atawisang uhi. Tualeh kumtawn a hing dinga guot taphot in agingta ta uhi. 49Tuachi’n Mangpa thu khu tua gamkai pumpi ah adalzahta hi. 50Hinanleh Judaten tua khopi a Pasian a kipumpieh leh numei zatat huoite leh khopi sunga mipi lamkaite achiilsie ua, Paul leh Barnaba abawlsie ua, agam ua kipat anotdoh sahta uhi. 51#Mat. 10.14; Mak. 6.11; Luk. 9.5; 10.11Tuachi’n Paul leh Barnaba in akephang tung ua leivui bangte athingkhie ua, Ikonium khuo ah apeita uhi. 52Tualeh nuazuite khu lungnopna leh Hagau Siengthou in adimta uhi.

Currently Selected:

NASEPTE 13: ZOUBSI

Highlight

Copy