NASEPTE 12

Herod in Jakob athana

1Tua hun lai in leengpa Herod in hattuom pawlte bawlsiet tumin akhut ahata hi. 2Tuachi’n Johan sanggampa Jakob khu namsauin athatta hi. 3Tualeh tam asilbawlten Judate akipahsah chi a mu ziehin, Peter zong mat asawm nalai hi. Tua hun khu tanghou tolsawlou pawi hunlai ahi. 4#Pawt. 12.1-27Tuachia Peter amat tahin suongkul ah akhum a, galkap lili a kipawl pawl li in aveng sah a, peikan pawi zou chienga mipite kunga puidoh a sawm hi.

Lamdangtah a suongkul apat Peter pawtdohna

5Tuaziehin Peter suongkul ah akoi tadi a, hinanleh ama a dingin hattuomten Pasian kungah tawlnga louin thu angen uhi. 6Herod in apuidoh ding ni, zanlai in Peter khu galkap ni kikaal ah khainieng ni a hensa in a imu hi, tualeh veng miten zong kotkhah bul a dingin suongkul aveng uhi. 7Ngai vawi, Mangpa vansawlsieng khat akungah ahing dinga, suongkul sungah vah ahing taangta a, vansawlsiengin Peter pang bengin aphawng a, “Kintahin thou in,” achi a, tualaitahin asia khainieng bute akhut apat aketa hi. 8Tuachi’n vansawlsiengin akungah, “Na kawng gah inlen, na kedap but in,” achi hi. Aman tuabang in abawlta hi. Tualeh vansawlsiengin akungah “Na puon sil inlen hing zui in,” achi hi. 9Tuachi’n Peter apawta, azuita hi; vansawlsieng silbawl khu atahtah ahilam athei sih a, mengmu akisa hi. 10Vengmite dinna mun khatna leh nina apel nua un, khopi lutna sia kotpi atungta uhi; tua kotpi khu amaute gel a dingin ama leh ama ahing kihong a, tuachi’n apawt ua, gawlzing khat azui lai un, vansawlsiengin thakhat in apeisanta hi.

11Peter ahing khophawh bepin, “Mangpa’n vansawlsieng ahing sawl a, Herod khut leh Juda mite kinepna zousie akipat in ahing hundohta chi ka theichienta” achi hi. 12Tuachi’n tua sil angaituo nua in, John Mak nu Mari inn ah ava pei a, tuanah mi tampi thungetna neiin ana umkhawm uhi. 13Peter in kotkhah akiu tahin, amin Rhoda ki chi nungah khat adawng dingin ahing pei hi. 14Peter aw ahi chi athei tahin, akipah seng ziehin kot hong louin innsung lam ah atailut a, Peter kot khah bul ah ading hi, chiin ava gen hi. 15Amaun akungah, “Amo na hita,” achi uhi. Hinanleh amanu’n atahtah ahi, achi tei tei hi. Tuachi’n amauten “Vansawlsieng hiva” achi uhi.

16Peter in kot akiu kiu nalai a, tualeh kot ahon tahun, ama amu ua, lamdang asa mama uhi. 17Hinanleh Peter in amaute sip dingin akhutzap a, Mangpa’n suongkul apat ama apuidoh dan amaute ahilta hi. Aman “Pei unlen tam thute Jakob leh asanggamte kungah va hil un,” achi hi. Tuachi’n apawt a mundangah apeita hi. 18Tuachi’n zingmawng ahing hitah in, Peter hei a um ahiei chiin galkapte buoi chitahin abuoita uhi. 19Herod in Peter asui a, amulou tahin avengmite a endih a, tha dingin thu apeta hi. Herod pen Judia gam akipat Kaisaria khuo ah apeisuh a khunah a umden ta hi.

Herod shina

20Tuin Herod khu Tai-ar leh Sidon khomite tungah alungthah mama a, hinanleh agam miten tua leengpa gam a kipat neh leh dawn la zel ahiziehun kithutuoh tahin ahing pei ua, leengpa inn sung vaisaipa Blastus lawmbawl in kilemna ngen in a kungah ahing pei uhi. 21Tuachi’n ani chiem ni in, Herod in aleengpuon sil in aleengtoupha tungah atou a, akung uah thu agen hi. 22Tualeh mipite akikou ua, “Tam pen pasien aw ahi, mihing aw ahisih,” achi uhi. 23Herod in Pasian thupina apieh lou ziehin, Mangpa vansawlsieng khat in asat a, hutin ane a ashita hi.

24Hinanleh Pasian thu pen akhang semsem a, apung zel hi. 25Tualeh Barnaba leh Saul in anasep uh azaw tahun Jerusalem apat akile kia ua Johan amin tah Mak kichipa azawpi uhi.

Currently Selected:

NASEPTE 12: ZOUBSI

Highlight

Copy