NASEPTE 11

Peter in Jentelte lah a anasep agupna

1Tuin Judia gam a sawltahte leh unau umten Jentelten zong Pasian thu apomta uh chi azata uhi. 2Tualeh Peter Jerusalem a ahing tuntou tahin, teptante lah a gingtuten Peter ana kinielpi uh a, 3“Nang teptanlou mite lah ah na va haw a, amaute toh na ne khawm hi,” achi uhi. 4Hinanleh Peter in sil umdan abul akipat aban banin akung uah ahilchien hi.

5“Joppa khuo a thungen a ka um laiin, mengmu bangin ka um a, manglam bangin puon bawm lienpi bang aningli a kikhi, van akipat a hing kikhaikhesuh ka mu a, ka kungah ahing tung hi. 6Tua khu ka en kilkel a ka ngaituo a, leitunga ganhing kengli neite, gamsate, ganhing bohvahte leh tunga leeng vate, ka mu hi. 7Tualeh aw khat ka za a, ka kungah Peter thou inlen, gou inlen, nein, achi hi. 8Hinanleh ken, hilou e Mangpa, asienglou leh abua mawngmawng bangma ka kam ah bangchih laiin zong alut ngai sih hi ka chi hi. 9Hinanleh van akipat aw in, Pasian in asuhsiengsa nang sienglou chi sin, ahing chi hi. 10Hichibang ngen thum vei ahing um a, tua zouin van lam ah akikhaitou kiata hi. 11Tua hun laitah in, mi thum Kaisaria apat a ka kunga ahing sawl uh, ka umna inn mai ah ana ding uhi. 12Tuachi’n Hagau in bangma ginglel loua amaute zui dingin ahing hil hi. Tuathamlouin tam sanggam guh ten zong ahing zui uhi. 13Tualeh aman ka kungah, a inn sunga Vansawlsieng vading amu dan leh, vansawlsiengin akunga Joppa khuo ah mi sawl inlen, amin Simon Peter kichipa hansah in. 14Aman thu ahing hil dinga, tua thu in nang leh na innkuonpite hundam in na um ding uh, achi dan zong ahing hil hi. 15Tuachia thu ka gen pat leh, Hagau Siengthou itung ua ahing tun chiil lai mabangin, atung uah ahing tungta hi. 16#Nasep. 1.5Tuachi’n Mangpa thugen, Johan in tuiin ahing baptis a, hinanleh nouten Hagau Siengthouin baptisma na hing tang ding uh, achi khu ka theidohta hi. 17Tuaziehin eiten Mangpa Jesu Khrist igintat ua Pasian in ahing pieh tua silpieh bangbang amaute kunga apieh nuain Pasian niel viel ding kei leltah koi ka hiei?” achi hi. 18Amauten tam thute azah tahun, asipta ua, Pasian aphat zawta uhi. “Tuachi’n Pasian in Jentelte zong hing dingin kisia a lungheisah ata ve maw,” achi uhi.

Antiok khuo a hattuomte

19 # Nasep. 8.1-4 Tuin Stephen abawlsiet zieh ua tai thangte khu Phoinisia gamte, Saipras gamte leh Antiok khuo tan dongin azin ua, Judate chilou koima kung ah thu agen sih uhi. 20Hinanleh alah ua mi pawl khatte pen Saipras leh Sairin khuo a mite ahi ua, tua miten Antiok khuo atun un, Greek mite kungah thu agen ua, Antiok ah Jesu Khrist khantanhoi thu ahilta uhi. 21Mangpa khut in amaute a umpi a, tualeh mi tampiin agingta ua, Mangpa lam angata uhi.

22Tuachi’n tam thute Jerusalem khuo a um hattuomten azata ua, tualeh Antiok tandong va haw ding in Barnaba asawl uhi. 23Ama ava tun tahin Pasian khotuona amu a, akipah mama a, alungtang zousie ua kukal tah a, Mangpa a gin um zing dingin amaute ahantawhta hi. 24Aziehpen ama mi hoitah ahia, Hagau Sienthou leh ginna a dim ahi. Tuachi’n mi tamtah Mangpa lam ah akibelapta uhi. 25Tuachi’n Barnaba khu Saul sui dingin Tarsas khuo lam zuon in akuonkheta hi. 26Tualeh Barnaba in Saul amu tahin, Antiok khuo ah ahing zawpi hi. Tualeh hichi ahing hi a, kum khat sung hattuomte toh akikhawm ua, mi tampi thu ahil uhi. Tualeh Antiok khuo a nuazuite khu Khristian akichi masa pen uhi.

Antiok khuo a hattuomten Jerusalem ah panpina ahah uh

27Tualeh tua hun lai in, guolnei pawlkhat Jerusalem khuo akipat in Antiok khuo ah ahing haw uhi. 28#Nasep. 21.10Tuachi’n alah ua mi khat amin Agabus kichipa adingdoh a, leitung pumpi ah kiel tung ding ahi chi’n Hagau hil in, atheisahta a, tua kiel khu Klaudia Kaisar hun lai in ahing tung hi. 29Tuachi’n nuazuiten angapdan chiet un, Judia gam a unau umte kungah panpina hah a sawm uhi. 30Tua bangin abawl pai ngal ua, Barnaba leh Saul khut ah, upate kungah ahahta uhi.

Currently Selected:

NASEPTE 11: ZOUBSI

Highlight

Copy