MARK 9
9
1Ilaxle chixe thuithui le akaxle le: “Kue otsing tomtata ma hünzom ang thüipu, Zang Wangting tsakzong füi nguikya mangün tanto chizi le ngo angkyabu ikhama züizüi tüile.”
Jisu-e Sün Lüikya
(Mat 17.1-13; Luk 9.28-36)
2 #
2 Pit 1.17,18. Nyix azom füima Jisu, Pitar hia Jakop tamchu Juhan hwom koplaxle haxnu kho tuita to hwom tata süile dong. Ikhato hwom thüntho ma chix sün lüile ajei. 3Chix nyiza, chaxwannu ma owaechu sole chiatsiet tsuak tang le tse. 4Ifüima wangshem hwom azome Mosa hia Elija nyi Jisu füi tomle zangwünle ngokya ngün. 5Pitar-e akaxle Jisu ang thüi: “Nwotmix, kem ikha to ngokya tüle müihule; kwome nyihom azom zingfang; tuita nang kux ang; tuita a Mosa kux ang ilaxle tuita a Elija kux ang.” 6(Chixe chemle lanüi hex le jepa, chemthüikoxle hwom pangnu wüi huanuma zale khosam).
7 #
Mat 3.17; Mrk 1.11; Luk 3.22. Ifüima hwom to ochaxbae tuk le zangfwom tuita lai. Ija zangfwom makhange kaxzing tuita lai le akax: “Ija a kue mongkünkya Ku Sasün changle. Hünzome chix kax ma laxle tüilax!” 8Hwome nonokhaile pangnu chito akhople hu ikoxle owachu chingün; hwom zuima Jisu Khrista, chix tata bang.
9Hwom haxnu kho tokya juüi lom to, hwome chempang ngündao laxpuix ibu bama, Khünak Hosa zilaxle chatle azangle mazo tanto owa hamachu chiwün angkya chixe kaxshing kople akax.
10Hwome ija kax ma lax, ikoxlechu anaole zo angkya le chem ang thüipuix le tata füi zangwün. 11#Mal 4.5; Mat 11.14.Ilaxle hwome chix ma atüi: “Wanlom nwotmixbue pongwang ma Elija wüi shonghüi kop angkya changle le büthüikoxle thüipuix?”
12Chixe hwom ang thüi: “Pongwang ma Elija wüi shonghüi kop angkya changle ilaxle pangnu li azünle zingüi; ikoxlechu Otsao Lai-e: ‘Khünak Hosa huanuma sikngün angkya changle ilaxle chilaxle awütüi’, le büthüikoxle thüi? 13Ikoxlechu kue hünzom ang thüipu, Elija a amipongma wüi hüidaoa, ikoxlechu Otsao Lai ma chix bama zale thomkya ningle, khünaknue chix to hwom mongtextex ma hwon.”
Jisu-e Haxshix Chasa Füikya Lükasa tuita Amüi
(Mat 17.14-21; Luk 9.37-43)
14Otue hwom wangshem mamabu hato hüipuix, hwom akhople khünaknu hia wanlom nwotmixbu hwom füi kax ma alanle ngokya hwome ngün. 15Khünaknue Jisu ngünle laxkya zuma tüle abüt ilaxle chix hato zikle hüilaxle chix shwom. 16Jisu-e chix wangshembu ma atüi: “Hünzome hwom füi chempang bama kax ma alanle ngopu?”
17Othom kha angkya mixsün tuitae lanle thüi: “Nwotmix, kue kusa lükasa nang hato apüipu. Chix ma haxshix chasa tüikya khoma chixe akax ang müntho. 18Otue ija haxshix chasae chix kopüihex, ijae chix haxkha to tswonle awütle ilaxle wikha makhange thuakbuak alai ang tomle. Chixe wa azyak ilaxle tsangtsa atsakle. Kue nang wangshembu ang ija jwonle apaokox le thüikya ikoxle hwome müntho.”
19Jisu-e hwom ang thüi: “Hünzom a mongong chitüikya khünakbu changle! Ku hünzom füi tomle otukux naxngo le? Hünzom füi athongle ku otukux ngoüi! Naosa ku hato apüihüi!” 20Hwome ija naosa chix hato apüi.
Jisu ngünkya füi tomle haxshix chasae fakta tukux Ija naosa tswonle awüt, ikhoma chix hax to nguak ilaxle wikha makhange thuakbuak alaile atui ang tom. 21Jisu-e hopa ma atüi: “Chix ile changkya füima otukux omün?”
Ija mixsüne lan: “Chix naosün pong tokhange wüi. 22Ija haxshix chasae chix obibi thomthom ma hexle ti hia wünkha to awütle lang ang tung daoa. Nange tsuak angkya oli jangchang thüikoxle kwom to chingchalaxle amüile fahüi!”
23Jisu-e chix ang thüi: “Nange mong jang ong thüikoxle mongongkyabu ang pangnu wüi tsuak angkya oli changle.”
24Ija naosa hopa thuile sop ilaxle mikfi füi akax: “Jowanpa, kue ongpu ikoxchu okhongui le münchang; kuma mongong chitüikya to nange chingcha hüi!”
25Khünaknu othom tuita hwom hato soxle hüikya ngünlaxle Jisu-e haxshix chasa to sale akax: “Nang kaxux hia naba chasa, kue nang ang thüipu ‘Chix angkya laiün ilaxle chix ma tam taxnop!’”
26Haxshix chasa akhongle naosa tswonle awüt toxlaxle laile pao. Naosa a omang ningle changtox. Ikhoma pangnue wüi chix zikya changüi le thüt. 27Ikoxle Jisu-e chix chak ma koplaxle bele azwot ilaxle ajong ang tom.
28Hwom hommong to dong füima; hwom tata tüipongma wangshembue chix ma atüile thüi: “Kwome ija haxshix chasa jwon ang büthüikoxle chithopuix?”
29Jisu-e hwom ang thüi: “Ija ningkya a zangjop makhange tix jwon ang tho angkya changle, mamalie tho angkya münchang.”
Jisu-e tamchatlechu Chix Zik bama Akax
(Mat 17.22-23; Luk 9.43-45)
30Ijakha dantoxlaxle Jisu hia chix wangshembu Galili makhange pao. Jisu, chix ojong khato tüipuix, ija bama owa angchu awan ang koxsele chitsu; 31chemthüikoxle chixe chix wangshembu hama hwon-ano angkya chang. Chixe thüi: “Khünak Hosa a chix lang angkyabu chak to koxüi. Ikoxlechu nyix azom füima wüi chix azangle zoüi.”
32Hwome ija hwon-nwot chem hanpak hex awan ang chitho tamchu chix ma atüi angkyachu mong chichong tsuak.
Akhokya Owa hex?
(Mat 18.1-5; Luk 9.46-48)
33Hwom Kaparnaum to nguile hom mongto dongkya füima Jisu-e chix wangshembu ma atüi: “Hünzome ami lomba to chempang bama ala tsuakpu?”
34 #
Luk 22.24. Ikoxle hwom kongko le dang; chemthüikoxle lomba to hwome akhokya a owa achangüile hwom-hwom ala. 35#Mat 20.26,27; 23.11; Mrk 10.43,44; Luk 22.26.Jisu-e thungle kop ilaxle chix wangshem bün anyi ang thüi: “Lompa ang owa achangse tsupuix chixe füikom angkya oli tamchu pangnu zongto naoshuk naoli ang ngo angkya oli changle.” 36Ifüima chixe naosa tuita lax; chix hwom thüntho ma dan ilaxle chix chak füi ija nao to kün laxle chixe hwom füi akax, 37#Mat 10.40; Luk 10.16; Jhn 13.20.“Ku mün ma owae ija ningle naosa tuita pongle koplaxpuix, chixe ku pongle kopkya changpu; ilaxle owae ku pongle koplaxpuix, chixe ku tata pongle kopkya münchang ku tsanle ajokya mix pongle kopkyachu changpu.”
Kem füi Alünaloxle Chichangkyabu Pangwüi kem Hanpak
(Luk 9.49-50)
38Juhan-e chix ang thüi: “Nwotmix, mixhuak tuitae nang mün ma haxshix chasabu jwonle apao ngokya kwome ngünle, ikoxle chix a kem othom kha angkya chichangkya daile kwome chix to abaxpu.”
39Jisu-e hwom ang thüi: “Chix taxabax kox, chemthüikoxle ku mün ma ohünotün mwot mokkya mix a owaechu ochwon ma ku mo amale münwünüi. 40#Mat 12.30; Luk 11.23.Chemthüikoxle owa kem füi alünalox le chichang puix, chix a kem hanpak changle. 41#Mat 10.42.Kue hünzom ang thüipu, hünzom ku füi tüikoxle, hünzom ang tikong wansa tuita alingkya mix ang ngaxchu, chix ang ma hingho kop ang chitom le müntüiüi.
Ochax to Thwontsingkyabu
(Mat 18.6-9; Luk 17.1-2)
42“Owawae ku to ongkyabu ibu khama ahixkya tuita ngaxchu thaithaxle chang ang koxle jangchang, chix hanpakma, longwun chongkya tuita dingkux ma khak laxle tinu khato fütle dütkya wüi alanta. 43#Mat 5.30.Idaile nang chak füi nang mongong amüt ang jangtom thünba, ija dütle awütdao! Chemthüikoxle tamchu chimax le chuale ngokya okham-wün hia hwom saxkya chong otuechu chizi le ngokya, 44ija haolum to pangnyi chak koplaxle lekya füi chak okao tuita füi khüzün lom to lekya wüi nang hanpakma akhokya changüi.#9.44: Züizüi laiza ma okhix 44 a dantoxle (okhix 48 to hulax). 45Tamchu nang chae nang ochax to düt ang jangtom thüiba, ija dütle awütdao! Chemthüikoxle tamchu chimax le chuale ngokya okham-wün hia hwom saxkya chong otuechu chizi le ngokya, 46ija haolum to, pangnyi cha wüi koplaxle lekya füi chikao tuita füi khüzün lom to lekya wüi nang hanpakma akhokya changüi.#9.46: Züizüi laiza ma okhix 46 a dantoxle (okhix 48 to hulax). 47#Mat 5.29.Tamchu nang mike nang ochax to düt ang jangtomba, ija lokle awütdaoa. Chemthüikoxle mik pangnyi koplaxle tamchu chimax le chuale ngokya okham-wün khato tsün awütkya füi, mik okao ma Zang Wangting to nopkya wüi nang hanpakma amüikya changüi. 48#Isa 66.24.Amalum ikhato hwom saxkya chong münzitox tamchu chuale ngokya wünchua tam chimax toxkya kha changle.
49“Tö koxkya pangnu hum füi atsaokya lailaile khünak nok wüi wün füi tsao ang tomüi.
50 #
Mat 5.13; Luk 14.34,35. “Hum a amüikya ikoxlechu ija hum ma tikya jangsamdao thüikoxle hünzome ija chatle chem füi atiküi?
“Hum lailaile hünzom a zuikop manle tüilax ilaxle tata füi tumüi le ngokox.”
Currently Selected:
MARK 9: WANCBSI
Highlight
Share
Copy
Want to have your highlights saved across all your devices? Sign up or sign in
Wancho Naga Bible - OTSAO BAIBEL
Copyright © 2012 by The Bible Society of India
Used by permission. All rights reserved worldwide.
Free Reading Plans and Devotionals related to MARK 9
The Gospel of Mark
Walk Through The Bible 365 - February
BibleProject | The Crucified King
