MARK 8

Jisu-e Hajat Ali Khünaknu Tux

(Mat 15.32-39)

1Ifüima aluile chingo homle, chatlechu khünaknu othom mama chongkya tuita hüi. Hwom ang sütling chemchu chitüi le changkya zuma Jisu-e chix wangshembu nyaklaxle hwom ang thüi: 2“Kue khünaknu othom to tüle chingcha maxle; chemthüikoxle hwom ku füi tomle ngokya athax nyix azom nguile hüile ilaxle athax a hwom ma sütling chemchu müntüi. 3Üntoxle kue fong chiasüt homle hwom hom to chat ang jangtomba hwom a lomba to woknuake lopüi, chemthüikoxle züizüi a tsailo tokya nguikyabu changle.”

4Ikoxle chix wangshembue lanle chix ang thüi: “Iningkya faokha to ibibi khünaknue sax ang okhongui le süt ojong tokya atakle koxüi?”

5Chixe hwom ma atüi: “Hünzom ma an otukux tüipu?” Hwome lan: “An khao anüt tüile.”

6Chixe khünaknu ang haxsha ma thung angkya kaxkox. Ifüima chixe an khao anüt kop, Zang mün achuak, ibu akhix, ilaxle khünaknu ang ahanle kox angkya hanpakma chix wangshembu chak to kox; üntoxle wangshembue ibu hwom ang ahanle kox. 7Hwom ma nyaxchu hidaoküsabu sütuikya. Jisu-e ijabu bamachu Zang ang münchong fa ilaxle pangnu ang ahanle kox angkya hanpakma wangshembu chak to kox. 8Hwom pangwüie wokfwot müile sax; ilaxle ota otua toxkyabu hwome sang anüt tswonle kop. 9Ija fongsüt ma womkya hwom hajat ali tukux tüikya; ifüima Jisu-e khünaknu fan ang tom. 10Chix tangthole wangshembu füi khua ma nga ilaxle Dalmanutha chaxwan to ngui.

Farisibue Ohünotün Mwot Mok-hüile Atsang

(Mat 16.1-4)

11 # Mat 12.38; Luk 11.16. Züizüi farisibu Jisu hato hüi ilaxle kax ma alat ang süt. Hwome chix amanse tsu, ilaxle chix zangkangting tokya changpule aho ang lita ohünotün mwot mokhu le atsang. 12#Mat 12.39; Luk 11.29.Ikoxle chix mongto tüle kaklaxle Jisu-e thüi: “Anyix ngainyixkya khünakbue ohünotün mwot büthüikoxle lompu? Kue hünzom füi kaxtsing tomtata akaxpu: Ija tsünthom ang münwan chemchu münfaüi.”

13Üntoxle chix hwom danle toxlaxle chatle khua ma ngale tinu tachi to pao.

Farisi hia Herod hwom Twonkhax

(Mat 16.5-12)

14Ipongma wangshembue an kop angkya alakle tox, ikoxle hwom chak ma khua ma an tuita wüi tüi. 15#Luk 12.1.Üntoxle chixe hwom ang kaxshing kople akax: “Farisibu hia Herod hwom twonkhax hanpakma mik hingle ngolax.”

16Hwome tata füi akaxle thüi: “Kem ang an müntüi koxa, ikhoma chixe ija kax akaxpu.”

17Ija hwom zangwün awanlaxle Jisu-e hwom ang thüi: “An chitüikya bama hünzome chem zangwün atsat ngopu? Athax kople hünzome matsing tsuak hia? Tamchu ija maawan hia? Hünzom khüzi ma chemchu müntüi hia? 18#Jer 5.21; Ezk 12.2; Mrk 4.12.Mik tüingale ngaxchu hünzome münngün hexnyi? Ilaxle hünzome texle münatak hexnyi? 19Kue ankhao aga hajat aga khünaknu tu ma akhix pongma ota otua hünzome sang obi tswonle kopkya dai; ija texle münatak hexnyi?”

Hwome chix ang thüi: “Sang bün anyi.”

20Chatlechu Jisu-e atüi: “Ilaxle hajat ali khünaknu tu ma ankhao anüt akhix pongma ota otua hünzome sang obi tswonkya dai?”

Hwome lan: “Sang anüt.”

21Chatlechu chixe hwom ma atüi: “Athaxchu hünzome matsing tsuak nyi?”

Bethsaida ma Jisu-e Mikduak Tuita Amüi

22Hwom Bethsaida to ngui; ikhato khünakbue mikduak mix tuita Jisu hato apüi ilaxle ija mixsün to chak füi twon angkya chix ma chingcha ju. 23Jisu-e ija mikduak sün chak ma sietle lax, tingkhua akaile pao, ilaxle Jisu-e chix mik to thuak füi thuak. Jisu-e chix to chake twonlaxle ija mixsün ma atüi: “Nange tütali ngüncha hex?”

24Zaple hulaxle ija mixsüne thüi: “I, kue khünakbu ngünle, ikoxle hwom pünzuabu ahamkya ningle mix ngünle.”

25Anaolechu Jisu-e ija mixsün mik to twon. Izuma ija mixsüne müile zamle hukoxle chatle ngün ang kop, Izuma jali pangwüi müile tsing. 26Ifüima Jisu-e “Tingkhua to chatle taxchat o”, le akaxlaxle chix hom to pao ang tom.

Jisu bama Pitar Kaxngai

(Mat 16.13-20; Luk 9.18-21)

27Ifüima Jisu hia chix wangshembu Kaisaria Filipi zui angkya tingkhua tuita to pao. Lomba to tüipongma chixe hwom ma atüi: “Ku bama wünhu, khünakbue ku ang owa le thüipuix?”

28 # Mrk 6.14,15; Luk 9.7,8. Hwome lan: “Züizüie nang Bapti fakya mix Juhan changpule thüile; züizüiechu nang ang Elija changpule thüile, ilaxle mamabue nang a ajepabu khama tuita changpule thüile.”

29 # Jhn 6.68,69. Chixe hwom ma atüi: “Ikoxle hünzome ku ang owa le texpu?” Pitar-e lan: “Nang a Messaiah changle!”

30Ijama chixe hwom füi kaxshing kople akax: “Ku bama ija owa hamachu taxwün.”

Jisu-e chix Sikngün tamchu Zik bama Akax

(Mat 16.21-28; Luk 9.22-27)

31Ifüima Jisu-e wangshembu hama hwon-ano ang süt: “Khünak Hosa ang sik huanuma ngün angkya oli changle. Apün-awangkyabue, Nguapa akhokyabue, tamchu wanlom nwotmixbue chix chilaxle awütüi, ilaxle langüi, üntoxle nyix azom füima chatle azangle zoüi.” 32Ija kax chixe angaile akax. Pitar-e chix süile pao ilaxle chix to sa. 33Ikoxlechu Jisu-e chix wangshembu to aküile hu, ilaxle Pitar to sale thüi: “Bao, nang ku ha angkya paoün, chemthüikoxle nang mongjang Zang tokhange chichangle haxshix tokhange hüikya changle!”

34 # Mat 10.38; Luk 14.27. Ifüima Jisu-e chix hato khünaknu othom tamchu chix wangshembu nyaklaxle hwom ang thüi: “Ku füito azuise tsukyabue ma alaklax, ma pünsak pailax, ilaxletix ku füito azuilax. 35#Mat 10.39; Luk 17.33; Jhn 12.25.Chemthüikoxle opangsae ma khüzün azünse tsuüi hex, hwome ija amütüi; ikoxle opange ku tamchu ku kaxho bama ma khüzün amüt laxüi hex, hwome ija sünle kopüi. 36Khünak tuitae chaxwannu komle kop ang tho ikoxle ma chasa a amüt le jangchang thüikoxle chix ang lap chem tüi? 37Kue thüipu, müntüi! Khünak tuita ma, ma chasa khülüix to kox tsuak angkya chemchu müntüi. 38Ijadaile ija Zang chitüikya tamchu ochax tsünthom ma opange ku tamchu ku kaxho bama azakle maxüi hex; Khünak Hosae ma Hopa fuazang ma kaxtaimixbu füi nguikya zuma, chix bama azakkya tüiüi.”

Currently Selected:

MARK 8: WANCBSI

Highlight

Copy