MARK 7

Pupa Hwom Hwon-nwot

(Mat 15.1-9)

1Jerusalem tokhange züita farisi hia wanlom nwotmixbu Jisu akhople afox. 2Üntoxle hwome wangshembue chak chiatsao homle süt saxkya ngün, ija a farisibue khünaknu hama apuakya chaktsux olom ma chak chiatsux homle saxkya ang thüipu.

3(Chemthüikoxle hwom pupa wanlom to laxle chak müile chiatsux homle, farisi hia Jehudi khünakbue otuechu süt münsax. 4Ilaxle thalex nui tokya apüikya tütalichu chiso homtoxle chisax.#7.4: thalex nui…chisax; chichangba hat tokya apüikya jali pangwüi solaxtix sax. Iningle hwome pongle kopkya pupa wanlombu chatlechu tüihule; thütba, wansa khopkhua hia tiklakbu azaokya olom tamchu ma jiplya tsaole thom angkya olom,#7.4: züizüi laiza ma tamchu ma jiplya, le müntüi.) iningkyabu.

5Ifüima farisibu hia wanlom nwotmixbue chix ma atüi: “Nang wangshembue pupa wanlom chito homle chak ngax chiatsux homle süt büthüikoxle saxpuix?”

6 # Isa 29.13. Chixe hwom kax to lanle thüi: “Hünzom künkux-mongkwombu! Hünzom hanpakma Isaia ajepae ajekya changtomta koxa! Za le thomkya ningle:

‘Ibu khünakbue,

Zang, le lüntüia,

ilaxle tunzaza ma,

ku achuak tüia;

ikoxle hwom kün-mong

ku füi ochu towüi.

7Hwome ku chishwombachu;

khünak chakzing wanlombu hwome,

Zang wanlom ningle,

mix hama anwot anole.’

8“Hünzome Zang kaxtom osyen to thom ikoxle khünake anole fakya kax ma mix laxle.”

9Ilaxlechu chizakle Jisu-e hwom ang thüi: “Hünzome ma chakzing hwon-nwotbu thom angkya kuxma, hünzome Zang kaxtom chilaxle awüt ang tüle atsing manle. 10#Lai 20.12; Tsk 5.16; Lai 21.17; Liw 20.9.Chemthüikoxle Mosa-e thüi: ‘Manu mapa chathua zakox; ilaxle owae manu mapa thuakzomle changüi hex, chix mik amüt dao!’ 11Ikoxle hünzome thüitüi: ‘Khünak tuitae manu mapa ang, kuchi tokhange fongkya oja kopse hex ija a Korban’ (Ija a Zang kux changpule thüikya tha); 12ifüima chixe honu hia hopa nyi hanpakma tütachu mok ang chifa. 13Ile hünzome pupa wanlom bama anwot anokyae Zang Kax mwot to chithapkya ang achangle; ilaxle iningkyabu hünzome tüle mokle.”

Khünak Chitsaokya ang Achangkya

(Mat 15.10-20)

14Ifüimachu Jisu-e khünaknu tusox chix hato tamnyakle asox ilaxle hwom ang thüi: “Hünzom pangnusae ku kax apalax üntoxle awan koplax. 15Kotok tokya noplaxle khünak tuita chitsaokya ang achang angkya olili müntüi; itülüi chix chitsaokya ang achang angkya a, chix mongkha tokya laikyae tix changpu. 16Owawa ma atat angkya na jangtüi apa koplax.”#7.16: Züizüi laiza ma okhix 16 a dantoxle (4.23 to hulax).

17Otue chix khünaknu othom dantoxlaxle hommong to dongpuix, chix wangshembue ija kaxpan chem hanpak hex le chix ma atüi. 18Chixe hwom ang thüi: “Hünzom chuwüi mix tukuxlehi? Kotok tokya khünak mongto dongkya tüta liechu chix chitsaokya ang münachang tsuak; 19chemthüikoxle ija a chix mongtsang to münwang; ikoxle shin wok to nguilaxle tsangtsa angkya laile paoünüi.” Ija Jisu zangwün makhange sütli lingli pangwüi saxling ang tsuaküile thüile.

20Üntoxle chixe chizakle thüi: “Ikoxle khünak mong angkya chem laipuix, ijae tix khünak chitsaokya ang achangle; 21Chemthüikoxle omong tokhange khünak kün-mong tokya iningkya tutex omabu laile; ohux-olop, mix mik amütkya, 22chinunchakkai, nüfux, zanglom chimüikya, huxtsing-loptsang, mix-dyen mix-ngankya, kax ma chilaxkya, miktsak mongngwom, Zang adakya, mongngam, tutubaokya, 23iningkya ochax oli pangwüi khünak kün-mong tokhange laile ilaxle chix chitsaokya ang achangle.”

Mixcha tuita Mongong

(Mat 15.21-28)

24Ifüima Jisu ikha angkya achexle Tair tingnu longzipong to ngui. Chix hom tuita to nop ilaxle chix ikhato tüile le owa angchu awan ang koxse chitsu ikoxlechu chix a azwonle ngo ang chitho. 25Mixcha tuita, owa sacha ma haxshix chasa tüikya hex, she-e chix ikhato tüileta le atatlaxle, chix hato hüilaxle chix chitong ma akhux. 26Ija mixcha a Grik cha, Siria haxtok tokya Foinesia nok tokya changkya. She-e sacha angkya haxshix chasa apaofa le chix ma chingcha ju. 27Ikoxle Jisu-e she ang thüi: “Pongwang ma naosombu wok afwot ang shongkox kop-hax. Naosombu süt apüilaxle hi ang thokle kox angkya olom münchang.”

28She-e chix kax to lanle thüi: “Alixachong, ija changkoxa; ikoxlechu tsap chitong ma ngokya hie, naosombue adütkya saxfun thüichu tswontüipu.”

29Chixe she ang thüi: “Khaxa nang paolax; ija nang kaxlan khoma hünsa angkya haxshix chasa laile paoüna!”

30Ikoxle she hom to chatkya thoma, haxshix chasa laile pao füima hosa shekosa a lya ma shuile nui.

Jisu-e Naba-mix Amüikya

31Anaolechu Tair dantoxlaxle Sidon makhange tingkhua bün akaile Galili Shinthuk-titung hato ngui. 32Hwome chix hato naba mix tuita apüi. Chix a kaxchu müile chidongkya mix changkya. Khünakbue Jisu füi ija mixsün to chix chak füi sütwonfa le akax. 33Ikoxlechu chixe ija mixsün othom kha angkya süile pao, ilaxle chix chakkhi ija khünak na ma sho üntoxle thuak tamchu chix le to twon. 34Ifüima Jisu-e dingchi to hu, azax, ilaxle ija khünak ang thüi: “Efatha” (Ija a akaxkox le thüikya kax).

35Ima wüi thuile chix na dap, ilaxle kax thangkyachu müile tsaotha le akax ang tho. 36Üntoxle chixe khünaknu ang ija bama owa hamachu chiwün angkya kaxshing kople akax; ikoxlechu otukux chixe abaxpuix itukux ija kax apuk ang hwom mongtsu. 37Üntoxle atatkyakya pangnu wüi huanuma abüt. Ilaxle hwome thüi: “Chixe pangnu wüi müile mokdaoa. Chixe naba mixe atat ang tom tamchu kaxux mix ang akax ang tom!”

Currently Selected:

MARK 7: WANCBSI

Highlight

Copy