MARK 6

Nazareth ma Jisu Pongle Chikop

(Mat 13.53-58; Luk 4.16-30)

1Ikha dantoxlaxle Jisu manok to chat ilaxle wangshembu chix füito azui. 2Nazak le nuikya nyix chixe sinagok to hwon-ano ang süt. Ikhato khünaknu tüihukya; hwom a chix kaxzing atatlaxle abüt. Hwome thüi: “Ija mixsüne je ibu ojong khato atakpuix? Chixe ohünotün mwot chemle mok ang thopuix? 3Chix a Meri sasün tamchu Jakop, Jusep, Juda hia Simon hwom hotüi, tuita zingpa münchangkox hia?” Ilaxle hwome chix pongle chikop.

4 # Jhn 4.44. Jisu-e hwom ang thüi: “Ajepa tuita a manok hia ma-mixbue ada wüi; mama pangnu khato wüi chix a achuak achenle.”

5Chix chak füi twonle kakmixbu züita amüi koxkya boma chixe ikhama mama ohünotün mwot chemchu mok ang chimüi. 6Khünaknu ang mongong chitüikya ngünlaxle chix huanuma abüt.

Jisu-e Wangshem Bün Anyi Tsanle Apao

(Mat 10.5-15; Luk 9.1-6)

7Ifüima Jisu nuihox tokya tingting to hwon-ano le pao. Chixe bün anyi wangshembu nyakle afoxlaxle mixhuak anyinyi pong apao. Chixe hwom ang haxshix chasabu thakma tsakzong kox; 8ilaxle hwom füi ile akax: “Kaithox boma mama chemchu taxkop; anchu, nyitsongchu, ilaxle hünzome ma nyipong okhütbu to ngunchu taxkop. 9Chisox soxlax, ikoxlechu nyipong onüi taxkop.” 10Chixe ilechu wüi thüi: “Ojongpang to hünzom pongle koplaxüihex, ikha angkya mapaopaoba ija hom ma ngolax. 11#Mwt 13.51.#Luk 10.4-11. Khünaknue hünzom pongle chikop chichangba hünzom kax to na chitha, iningkya ting-hax to janghüi thüiba ikha dantoxdao ilaxle hünzom paoüima hünzom cha angkya haxbu ngaxchu hongle toxdao. Ija a hwom hanpak ang kaxkhün tuita ningle changüi.”

12Ijadaile hwom pao ilaxle ochaxbu tokya khünaknu mong chat angkya oli changpule kaxho apuk. 13#Jak 5.14.Hwome haxshix chasabu huanuma jwonle apao tamchu olip münga füi pale kakmixbu huanuma amüi.

Baptikya mix Juhan Zikya

(Mat 14.1-12; Luk 9.7-9)

14 # Mat 16.14; Mrk 8.28; Luk 9.19. Üntoxle wanghom Herod-e#6.14: wanghompa herod: Herod Antipas, Galili apünkya mix. Jisu bama atat ang kop; (Chemthüikoxle chix mo pangnu khato wüi azingle wün). Khünak züizüie akax: “Baptikya mix Juhan chatle azang ngoüna, ikhoma idu ohünotün mwotbu chix makhange angaile ngopu.”

15Mamabue thüi: “Chix a Elija changpu.”

Züizüie thüi: “Chix a kaipongkyabu ningle ajepa tuita changpu.”

16Wanghompa Herod-e ija kax atatlaxle thüi: “Chix a, kue dingsom le lang daokya chatle azangle zokya Juhan changpu!” 17#Luk 3.19,20.Herod-e Juhan kop angkya kax kox, ilaxle chix janbüi füi khak laxle kun khato hakle thom. Honao wangchanu ang ngokya Herodia khoma chixe ile mok angkya lai. 18Chemthüikoxle Baptikya mix Juhan-e Herod füi honao ha angkya wangchanu chixe lax angkya oli münchangle akaxle ngo.

19Ija khoma Herodia mongto chix füi khüt kop ilaxle chix langle awütse le tsu; ikoxlechu Herod khoma she-e ile hwon ang chitho. 20Chemthüikoxle Herod-e, chix thaikya chitüikya otsao khünak tuita changpule awanlaxle chaza üntoxle sünle thom; ilaxle chix ang Juhan kax atat-tatba huanuma khangkho sam. Ile changkoxlechu chixe Juhan kax apase le tsu.

21Oshuk chaktua ma Herodia-e opong atak; ija a Herod puxkya din shwomle, chix haxtok ma apün-awangkyabu tamchu süpahi akhokyabu üntoxle Galili nokpu akhokyabu thom püntuxkya zuma chang. 22Ijama Herodia sacha#6.22: Herodia sacha; züizüi laiza ma chix sacha Herodia, le tüile. wangchasa nguilaxle azüi le wanghompa Herod hia chix füi tomle fongsüt ma womle tüikyabu ang mong amüi. Ikhoma wanghompae wangchasa ang thüi: “Nange chem laxse tsupu? Nange laxse atsutsu kue nang ang koxüi! 23Nange ajuju kue komle koxüi; ku wangting süifi jaojao kox ang thoüi”, le wanghompae sasün füi tsaosax le akax.

24She laile pao üntoxle hotatüi hato nguilaxle atüi: “Tatüi, kue chaxnu ma chem juüi?” Ikoxle wangchanue lan: “Baptikya mix Juhan khangtom jukox.”

25Wangchasa momle hochaxnu hato chatlaxle thüi: “Nange ku ang athax ile khua tuita ma Baptikya mix Juhan khangtom laxhüi!”

26Ijae wanghompa ang mong huanuma ama, ikoxlechu chixe mixwünbu thüntho ma tsaosax le akax daokya khoma chixe ija kax abax ang chitho. 27Ijadaile chixe athaxthax wüi Juhan khangtom apüi ang da tuita tsanle apao. Ija da pao üntoxle kunkha to nguilaxle Juhan khang düt; 28ifüima chixe ija khua tuita ma danle apüilaxle wangchasa ang kox; chatle wangchasae ija hotatüi chak to kox. 29Chix wangshembue ija zing atatlaxle kun to ngui üntoxle chix zwoptho paole zu.

Jisu-e Hajat Aga Khünaknu Tux

(Mat 14.13-21; Luk 9.10-17; Jhn 6.1-14)

30Wangshembu chat ilaxle Jisu füi apong; hwome mokkya hia hwon-anokyabu bamo chix hama wün. 31Nguiüi hia paoüi khünaknu ikhama huanuma tüikoxle Jisu hia chix wangshembu fongsax angkya chakba ngaxchu chikop. Ikhoma chixe hwom ang thüi: “Khaxa, kem tata nazakle ngokya li jongta khato paohax.” 32Idaile hwom khua ma ngale mix dangkya khato hwom tata pao.

33Ikoxlechu khünakbue hwom achexüi ngünle lax ilaxle hwom opangpang hex ochwon ma tsingle lax; ilaxle tingnu pangnukha tokya cha ma zikle, Jisu hia chix wangshembu thoto wüi ijongkha alople nui. 34#Huak 27.17; 1 Wa 22.17; 2 Pp 18.16; Ezk 34.5; Mat 9.36.Otue Jisu khua angkya thai, chixe ija khünaknu tusox ngün, ilaxle chix mongkha to hwom hanpakma chingcha dongle tex, chemthüikoxle hwom a nyetmix chitüikya chunbu ningle ngo. Ija khoma chixe hwom hama tüle-tüle anwot-ano ang süt. 35Üntoxle hanhom füima, chix wangshembu chix hato nguilaxle thüi: “Ikha a chemchu chitükya kha ilaxle athax a tuchu lehuüna; 36nuisox ma tüikya khünakbu hom tamchu tingkhuabu to paolaxle sütling naxsax lax ang hwom fan ang tomlax; chemthüikoxle hwom ma sütling chemchu müntüi.”

37Chixe hwom kax to lanle thüi: “Hünzome hwom ang sax angkya tütali thüichu tülaxkox.” Hwome chix ang thüi: “Kwom paolaxtoxle jan ngunkhix#6.37: jan ngunkhix: jan ngunkhix tuita a khünak tuita hingchak mün changkya (Mt 20.2 to hulax). ho-anyi tha an shakle apüilaxle hwom ang asütkox lehia?”

38Chixe hwom ang thüi: “Hünzom ma an obi tukux tüipuix ang shonghu anohu.” Hwome opaktik füima akax: “An khao aga ilaxle nyax jang anyi le tüile.”

39Chixe hwom ang khünak othom-othom ma hingzang ding to athung angkya kax kox. 40Idaile hwom azienzien le, zienpong to hopong hia punyi bün pongle thung. 41Ifüima chixe ankhao hia nyax jang anyi chak ma kop, dingchi to angakle hu ilaxle Zang ang münchong fa. Chixe an akhix ilaxle khünaknu ang afanle kox ang wangshembu chak to kox. Chixe nyax jang anyichu wüi hwom pangnu ang ahanle asüt. 42Hwome pangnue wüi wokfwot müile sax. 43Ilaxle an hia nyax atakyabu wangshembue sang bün anyi tswonle kop. 44Fongsüt ma hakkya lüka mixmüimüi hajat aga tukux changkya.

Jisu Ti dingma Aham

(Mat 14.22-33; Jhn 6.15-21)

45Chixe khünaknu fan ang koxkya bama wangshembu momle khua ma nga ilaxle tachi Bethsaida chito achale lenui angkya kax kox. 46Hwom afan füima chix a zangjop ang haxhua tuita to pao. 47Han asong füima, khua a tikha to ikoxle chix a haxza to chix tata tüikya. 48Khuachüi ang hwom thangle ngokya chixe ngünle lax; chemthüikoxle zangwine hwom füi apüile jep; ikoxle ali baji bato huazunge chix hwom hato titok to ahamle hüi. Chix a hwom kaile tox angle hüile ngokya.#6.48: hwom akaile; chichangba hwom füi tomle. 49Ikoxle hwome chix titok to aham ngokya ngünle lax, ilaxle ija a bao wüi changüi le thütlaxle hwom akhong. 50Chix ngün pongma hwom pangwüi abünle za.

Jisu-e thuile hwom to tsa: “Mong taxhix, ku changpu, taxza!” 51Ifüima chix hwom hato khua ma dong, üntoxle zangwin dangle zak. Wangshembu ang huanuma khosamle aban. 52Hajat aga khünaknu tuxle ohünotün mwot ahokya chem hanpak hex hwome awan ang chitho; chemthüikoxle hwom monge ija ajang ang chitsuak.

Jisu-e Geneseret ma Kakmix Amüi

(Mat 14.34-36)

53Tinu talaxle hwome Geneseret alop. Ikhato hwome khua fünle tox. 54Hwome khua danle toxkya füi tomle khünaknue Jisu süntsing. 55Ikoxle hwom ija tuitui pangnu khato zikle aham; üntoxle chix ijong khato tüile le atat-tat khato, hwome lyabu ma pai laxle kakmix-bwotmixbu chix hato apüi. 56Ilaxle Jisu alele khato, noksa towüi changlax, tingnu towüi changlax ilaxle chaxwan tüta jongkha towüi changkoxlax, kakmixbu lomnu ma danlaxle, chix nyitua to twon ang thüingaxchu koxhüi le chix ma chingcha ju, ilaxle chix to alietliet pangnu wüi müi.

Currently Selected:

MARK 6: WANCBSI

Highlight

Copy