MARK 10
10
Kako Afan-ajankya bama Jisu Hwon-nwot
(Mat 19.1-12; Luk 16.18)
1Ifüima chix ikha angkya achexle Jehudi longzipong to ngui ilaxle Jordan shuanu ta. Tamchatlechu khünaknu othom chix hato asox ilaxle jao angkya ningle chixe hwom hama hwon-ano.
2Züizüi farisibu chix hato hüilaxle tsünle atüi: “Lüka tuitae ma kakonu apao angkya wanlom ma chitüitüi puix?”
3Chixe hwom ma anongle atüi: “Mosa-e hünzom ang wanlom chemle fapuix le?”
4 #
Tsk 24.1-4; Mat 5.31. Hwome lan: “Afan angkya laiza fa laxle afan angkya wanlom Mosa-e kwom ang fale.”
5Jisu-e hwom ang thüi: “Hünzom ang mong tüle tsak koxle chixe wanlom ija zale toxpu. 6#Pon 1.27; 5.2.Ikoxle chaxwannu zing pongma Zange hwom sheko hia lüka le zingpu. Otsao Lai kax ma tüikya ningle: 7#Pon 2.24.‘Ija khoma lükae manu mapa danle toxüi, ilaxle ma kakonu füi notom ma ngoüi,#10.7: Züizüi laiza ma ilaxle ma kakonu füi notom ma ngoüi, ija a müntüi. ilaxle hokhi pangnyi müitom tuita ang achangüi.’ 8Ikhoma athax hokhi a anyi münchang ikoxle müitom tuita changpu. 9Ijadaile oja Zange apongle fadaopuix, ija khünake afan ang taxtom.”
10Otue hwom hom to chat, wangshembue ija bama wüi chix ma atüi. 11#Mat 5.32; 1 Ko 7.10,11.Chixe hwom ang thüi: “Owae ma kakonu awüt laxle mama laxüihex, chixe she zongto chinunchakkaipu. 12Ilailaile shekonu owawae ma kakopa danle toxlaxle mama lüka ma ating anokle jangchangba, she-e chix zongto chinunchakkaipu.”
Jisu-e Naosombu to Mohiman
(Mat 19.13-15; Luk 18.15-17)
13Züita khünakbue Jisu ang twon ang tom angkya kuxmale chix hato naosombu apüi ikoxle ibu khünakbu to wangshembue sa. 14Ikoxle Jisu-e ija ngünkya zuma, mongto kaklaxle, hwom ang thüi: “Naosombu ku hato hüi ang laxkox; hwom taxabax; chemthüikoxle Zang Wangting a iningkyabu kux changle. 15#Mat 18.3.Kue hünzom ang otsing tomtata akaxpu: Opange naosa tuita ningle Zang Wangting pongle chikop laxüihex, hwom ikhato ngui ang münthoüi.” 16Ifüima chixe naosombu chix chak ma pai, chix chak füi twon ilaxle mohiman.
Hakpa-Sün Tuita
(Mat 19.16-30; Luk 18.18-30)
17Üntoxle Jisu pao ang achexle lom ma tüipongma, khünak tuita chix hato zikle hüilaxle akhux üntoxle chix ma atüi: “Müikya Nwotmix, oshuk chitüikya tsün khüzün atak ang kue chem mokse dai?”
18Ikoxle Jisu-e chix ang thüi: “Chemkho ma nange ku ang müikya nwotmix le nyakpu? Zang boboma müikya owachu müntüi. 19#Lai 20.13; Tsk 5.17; Lai 20.14; Tsk 5.18; Lai 20.15; Tsk 5.19; Lai 20.16; Tsk 5.20; Lai 20.12; Tsk 5.16.Nange kaxtom ibu awan ngopu: Mix taxlang; chinunchakkai taxtüi; taxahux; chichang khato othai huxfe le taxchang; ngan-jut le taxlax; hünpa hia hünnu nyi thua zalax.”
20Chixe Jisu ang thüi: “Nwotmix, ibu pangwüi kue naosom tokhange wüi mokle hüikya changle.”
21Jisu-e chix to mongkün füi tangthole hu ilaxle chix ang thüi: “Nang oli tuitae ma angui; paolax, nang ma atüitüi pangnu hanglax, ilaxle chitüi chinangkyabu ang ahanle laxkox. Ile jangchangba nang zangkangting to tüle ahak aluale tüiüi; ilaxle oman, ku füito azuilax.” 22Ikoxle ija kax atatlaxle chix ang thün-nak üntoxle tüle mongtsik dongle paole max; chemthüikoxle chix a ngun syen tüle tüikya hakpa sün tuita changkya.
23Akhople hulaxle Jisu-e wangshembu ang thüi: “Hakpa luapabu hanpakma Zang Wangting to nop ang otukux tsakpuix!”
24Chix kax atatlaxle wangshembu ang huanuma khosam. Ikoxlechu Jisu-e hwom füi akax: “Kusahom, Zang Wangting to dong angkya otukuxkya mwottsak hex hule koplax! 25Hakpa luapa khünak Zang Wangting to dongkya füi mütkui mik makhange Ut litle lekya wüi ochwon.”
26Ibu kaxzing thoto wangshembu tüle abüt laxle khosam kake chix ma atüi: “Jangchangba owawapi sün tsuak angkya?”
27Jisu-e hwom to tangthole hulaxle lan: “Ija a khünak zongto tsuak angkya fang münchang ikoxlechu Zang zongto chemchu münchang; chemthüikoxle Zang zongto chitho angkya oli jaojao müntüi.”
28Pitar ajong ilaxle thüi: “Hulax, kwome pangnu danle toxlaxle nang füito azuipu.”
29Jisu-e thüi: “Kue hünzom ang thüipu, owae, matüi manao wüi changlax, ma tingtok wüi changlax, mana manao wüi changlax, honu wüi changlax, hopa wüi changlax, Kakonu wüi changlax, susabu wüi changlax, haxtok homting wüi changlax, ku bama tamchu Kaxho Müikya hanpakma danle toxdao laxpuix, 30chixe athax ipongkhae tüle onui kopüi: hom-pungchu, hotüi honao hwomchu, hona honao hwomchu, honu hopa hwomchu, kakonubuchu, susabuchu, haxtok homtingchu, ifüi tomle sikngün zothupchu wüi kopüi; ilaxle athax füima oshuk chitüikya khüzün tsün ataküi. 31#Mat 20.16; Luk 13.30.Ikoxlechu athax thopa ang ngokyabu huanuma ma füipa ang achangüi, ilaxle athax füipa ang ngokyabu huanuma thopa ang achangüi.”
Jisu-e chix Zik mowünkya Othom Azomlükya
(Mat 20.17-19; Luk 18.31-34)
32Athax Jisu hia chix wangshembu Jerusalem to dongüi lomba to tüikya; üntoxle Jisu wangshembu thoto achale le; ilaxle hwom tüle abüt tamchu füifüi ma azuile ngokyabu za. Anaochu chixe bün anyi chix füito süile pao ilaxle chix hato ngai angkya bama hwom hama apua. 33Chixe thüi: “Hulax, kem a Jerusalem to dongpu; ikhato Khünak Hosa Nguakhobu hia wanlom nwotmixbu chak to fünle koxüi. Hwome chix lang angkya kax tsuakle faüi ilaxle mixnokbu chak to koxüi; 34ibue chix tha ajaoüi, chix to thuak füi thuaküi, ilaxle müiüi, üntoxle chix a langüi; ikoxchu nyix azom lükya to chix chatle azangle zoüi.”
Jakop hia Juhan Nyie Jukya
(Mat 20.20-28)
35Ifüima Zebedi sasün Jakop hia Juhan nyie chix hato hüi ilaxle thüi: “Nwotmix, nange kukhi hanpakma naxmokse lekya mwot tütüile.”
36Chixe hokhi ma atüi: “Hünkhi hanpakma kue chem naxmok fase le thütkya?”
37Okhie chix ang thüi: “Fuazangle nang chongwang tüntong ma thungkya zuma, kukhi nang tsaxchi ma tuita ilaxle nongchi ma tuita le thung ang koxhüi.”
38 #
Luk 12.50. Jisu-e hokhi ang thüi: “Hünkhie chem jupuix ija hünkhie ngaxchu münawan. Kue ling angkya sikngün pe hünkhie ling ang thoüi hia? Chichangba kue chemle bapti laxüihex, ija baptikya olom ma hünkhi bapti ang thoüi hia?”
39Okhie chix ang thüi: “Kukhie thoüi.” Jisu-e hokhi ang thüi: “Kue oja pe ling angkya hex ija pe ma hünkhie ling ang thokoxlax, tamchu ku baptikya olom ma bapti angchu thokoxlax; 40ikoxlechu ku tsaxchi hia nongchi ma thung angkya kue faüi münchang; ikoxle ibu a opang hanpakma achwonle tüilaxpuix hwom ang Zange tix kox angkya changle.”
41Otue wangshem büne ija atatle lax, Jakop hia Juhan nyi füi hwom tüle mongtsik. 42#Luk 22.25,26.Ikoxle Jisu-e hwom pangnusa wüi chix hato selaxle thüi: “Songsari#10.42: songsari: Mt 5.47 cf Tsk 18.8 to hulax. tu ma owae pünnusa thak ma apün awang le tüilaxpuix, hwom ang a ibu thakma hopunu zong tüipu idaile hwome zong ibu twonpu, ija hünzome awanle ngopu. 43#Mat 23.11; Mrk 9.35; Luk 22.26.Ikoxlechu hünzom khama ile chang angkya oli chichang. Ikoxle hünzom khama opupue achongkya ang achangse tsupuix, chix hünzom khama naoshuk naolipa ang changkox; 44Ilaxle hünzom khama owae ma ma akhose tsupuix, pangnu da ang chix achang angkya changpu. 45Chemthüikoxle otsing tomtata ma Khünak Hosa ngaxchu ma to hume hüile chichang le mix to atu alit le kox ang tamchu khünaknu hanpakma ma tsün kox angle nguipu.”
Jisu-e Bartima Mik Amüi
(Mat 20.29-34; Luk 18.35-43)
46Hwom Jeriko to ngui ilaxle Jisu ma wangshembu hia khünaknu othom chongkya tuita füi Jeriko angkya laile pao pongma, Timia sasün Bartima, ang mik aduakle jusax mix ang achangle tüikya. 47Otue chixe Nazareth nok Jisu hüile ta le atat, chix akhongle thüi: “Dawid sasün Jisu, ku to chingcha hüi.”
48Khünaknue chix füi dangle ngo angkya akax; ikoxle chixe tamtaile akhongle thüi: “Dawid sasün Jisu, ku to chingcha hüi.”
49Jisu zak üntoxle thüi: “Chix nyakkox.”
Ikoxle hwome ija mikduak sün nyakle thüi: “Taxza! Ajonglax, chixe nang nyakle.”
50Ijama chix nyi sikle awüt laxle Jisu hato hüi.
51Jisu-e chix ang thüi: “Kue nang hanpakma chem naxmokse le texpu?” Ija mikduak süne lan: “Nwotmix, kue ngünse tsule.”
52Ikoxle Jisu-e chix ang thüi: “Nang mongonge nang amüidaoa, paolax.”
Ima wüi thuile chixe ngün ang kop ilaxle lomfo le chix füito azui.
Currently Selected:
MARK 10: WANCBSI
Highlight
Share
Copy
Want to have your highlights saved across all your devices? Sign up or sign in
Wancho Naga Bible - OTSAO BAIBEL
Copyright © 2012 by The Bible Society of India
Used by permission. All rights reserved worldwide.
