MARK 11
11
Tholünle Jisu Jerusalem to Ngui
(Mat 21.1-11; Luk 19.28-40; Jhn 12.12-19)
1Bethfes hia Bethani zui to hüile otue hwom Jerusalem hato nguipuix, hwom olip le nyakkya haxhua to ngui. Ija kax füi Jisu-e wangshem anyi thoto achale tsanle apao: 2“Hünkhi thüntho ma tüikya tingnu to paokox; hünkhi ikhato dongkya thoma, otuechu khünak mangakya Gatho hosa tuita fünle thomkya ngünüihex; ija dale ikhato apüihüi. 3Ilaxle owawae hünkhi to ‘Ija chem ang dapu’ le jangtsaba, hünkhie thüilax: ‘Nwotmixe#11.3: Nwotmix chichangba hopupa. lomputa, ilaxle leba ma wüi achatle koxüi ta.’”
4Idaile hokhi pao, ija tingkhua to hokhi thoma homtho ma Gatho hosa tuita fünle bang; hokhie ija da. 5Ipongma ikhama ajongle ngokya owawae tsa: “Hünkhie Gatho hosa chem mok ang dapu?”
6Ikoxle hokhie Jisu-e anole apaokya ningle ibu kax to lan, ilaxle hwome ija müi hokhi ang pao ang dan. 7Ija Gatho hosa hokhie Jisu hato apüi. Ija ding ma hwom nyiza nomle kox ilaxle Jisu ikhama thung. 8Züizüi khünakbue manyi maza lom to nomle kox; mamabue faokha tokya fummua pakle apüilaxle nomle kox. 9#Mts 118.25,26.Ilaxle thochi ma lekyabu hia füichi ma hüikyabue akhong:
“Hosana! Hosana!
Jowanpa mün ma nguikya mix achuak kox!
10Wanghompa Dawid wangting nguikya to,
Zange mohiman kox!
Zang mün achuak kox!”
11Jisu Jerusalem to ngui; Zangshwom-Hom to dong ilaxle pangnusa to akhople hu. Ikoxlechu hanhom ünkoxle chix wangshembu koplaxle Bethani to pao.
Jisu-e Fupsa Pün to Thuakzom
(Mat 21.18-19)
12Ofüi nyix hwom Bethani tokya chatkya zuma, chix ang woknuak hüi. 13Iponge ochakmua wüi müi wüi müile lomzui ma Fupsa pün tuita ngün; ilaxle ikhama oziak tuita thüingaxchu bangüi changtüi angpu le ajang laxle chix khe. Ikha alopkya zuma chixe pünchak boma chemchu chingün; chemthüikoxle ituke Fupsa ziaktu chichang. 14Jisu-e ija Fupsa pün ang thüi: “Athax makhange owaechu nang angkya fupziak tam münsaxpu!” Wangshembue ija chix kax atat.
Jisu Zangshwom-Hom to Dong
(Mat 21.12-17; Luk 19.45-48; Jhn 2.13-22)
15Otue hwom Jerusalem to nguipuix, Jisu Zangshwom-Hom to ngui ilaxle Zangshwom-Hom ma thalex mixbu jwonle alai. Chixe ngun alüixle ngokyabu tsap khole awüt, juao hangle ngokya tüntongbu khole awüt; 16Üntoxle owa angchu Zangshwom-Hom akaile mwotkat chemchu alyet ang chitom. 17#Isa 56.7; Jer 7.11.Ifüima chixe hwom ang thüi: “Otsao Lai ma Zange akaxkya ile zale tüile: ‘Pangnu tingnok hanpakma, ku hom ang, Zangshwom-Hom le nyaküi! Ikoxle ija hünzome, ahux mixbu longlua ang achang thomdaoa!’”
18Nguakhobu hia wanlom nwotmixbue ija atatlaxle, chix mik chemle amütüi le oshua lom. Hwom chix thua za, chemthüikoxle khünaknu pangnu wüi chix hwon-nwot to abüt.
19Han asong füima Jisu hia chix wangshembu tingnu angkya laile pao.
Fupsa Pün makhange Awan ang kopkya Oli
(Mat 21.20-22)
20Ofüi nop hwome leüi lom to ija fupsa pün otsing to lünle zikya ngün. 21Chemle changkya dai le ibu texle atak laxle Pitar-e thüi: “Nwotmix, hulax! Nange thuakzomle toxkya fupsa pün zidaoa!”
22Jisu-e hwom ang thüi: “Zang to mongong tüilax. 23#Mat 17.20; 1 Ko 13.2.Kue hünzom ang otsing tomtata akaxpu, opange ija haxhua ang: ‘Nang nwonün ilaxle tinu khato dütün’, le thüiüi hex tamchu mong ma aokya chitüi le, chixe chem akax puix ija changüi jao le ongpuix, chixe ija ile changkya ngün ang kopüi. 24Ija khoma kue hünzom ang thüipu: Otue hünzome chempang bama zangjop üihex tamchu juüihex, hünzome ibu kopdaoa le onglax, ile hünzome chem jupuix ija kopüi. 25#Mat 6.14,15.Üntoxle otue hünzome ajong üntoxle zangjopüi hex, nange mix to thaile mokdaokya jangtüi thüiningle thailak laxkox, ile changkoxle Zangkangting tokya nang Hopae nang thaikyachu thailak tüiüi. 26Nange mix ochax thailak chifatsuak thüiningle, zangkangting tokya Hopaechu nang ang thailak münfaüi.”#11.26: Züizüi laiza ma okhix 26 a obo koxkya changle (Mt 6.15 to hulax).
Jisu Tsakzong bama Atüikya
(Mat 21.23-27; Luk 20.1-8)
27Anaolechu hwom Jerusalem to ngui. Hwom Zangshwom-Hom ma ahamle ngopongma, nguakhobu hia wanlom nwotmixbu tamchu mixpa tüichongbu le chix hato hüi. 28Hwome chix ma atüi: “Chem tsakzong füi nange ibu mwot mok ang thopu? Nang ang ijabu mok angkya tsakzong owae fapu?”
29Ikoxle Jisu-e hwom ang thüi: “Kuechu hünzom ma kax tuita atüifang; ku hama apuahüi. Ile changkox tix kue ibu chem tsakzong füi mokpuix, ija hünzom hama apuaüi. 30Juhan hato bapti angkya tsakzong Jowanpa tokhange hüipia hia khünak tokhange hüipuix?”
31Ikoxle hwome tata füi zangwün: “Keme chemle lanüi? Zang tokhange le thüikox le nang: ‘Jangchangba hünzome chix to büthüikoxle chiong’, le chixe wüi kem ang thüiüi. 32Ikoxle keme, ‘Khünak angkya’ le thüi ang (Hwom a khünaknu thua za); chemthüikoxle pangnue wüi Juhan a tuita ajepa changpule lax.” 33Idaile hwome Jisu ang thüi: “Kwome münawan.”
Jisu-e hwom ang thüi: “Kuechu chem tsak chem zong füi ibu mokpuix, ija hünzom hama münapua.”
Currently Selected:
MARK 11: WANCBSI
Highlight
Share
Copy
Want to have your highlights saved across all your devices? Sign up or sign in
Wancho Naga Bible - OTSAO BAIBEL
Copyright © 2012 by The Bible Society of India
Used by permission. All rights reserved worldwide.
