MARK 16

Azangle Zokya

(Mat 28.1-8; Luk 24.1-12; Jhn 20.1-10)

1Sabath füi nyix, Meri Magdalen ilaxle Jakop honu Meri hia Salomi hwome Jisu to pa angkya hanpakma ongan müikya münga shak. 2Hatdang owang nyix swomsae zangzung füi tomle hwom zuk to ju. 3“Zuk ka hakkya longnu kem ang owae daple kox angkya”, le hwome lomba to zangwün (Chemthüikoxle longnu a chongdaokya wüi changkya). 4Ikoxle hwome hule anokoxle, longnu laoxle awüt thomdaokya ngün. 5Hwom zuk-kha to dong ikoxle hwome naosün tuita, nyi tsekya awunlaxle thungle ngokya ngün; ilaxle hwom abüt.

6Ija mixsüne hwom ang thüi: “Taxza, hünzome pünsak ma takle langkya, Nazareth nok Jisu lompu le kue awanle. Chix chatle azangle zodaoa; chix ikhama müntüi; hünzome chix danle toxkya nui to hulax! 7#Mat 26.32; Mrk 14.28.Hünzome paolaxle chix wangshembu tamchu Pitar hwom hama apuakox. Chix hünzom thoto achale Galili to paoüi; chixe hünzom füi akaxle toxkya ningle, ikhato hünzome chix ngünüi.”

8Zukting angkya hwom lailaxle zikle pao. Chemthüikoxle abütkya tamchu zakyae hwom aban; ija khoma hwome owa hamachu chemlechu chiwün.

HOZANG KAXHO MÜIKYA ASHUKKYA#16.8: Züizüi laiza hia laitai ma ija Kaxho Müikya oshuk ile müntüi (okhix 9-20).

Meri Magdalen hato Jisu Ngai

(Mat 28.9-10; Jhn 20.11-18)

9Chix anaole azangle paokya füima, hatdang owang nop swomsae, pongwang ma, Meri Magdalen, owa angkya haxshix chasa anüt jwonle alaipuix, she hato Jisu laile aho. 10She chatlaxle Jisu füi ngohomkyabu hama apua. Ipongma hwom a mongma laxle sople ngokya. 11Chix ozün ma tüile le thüikya hia Meri Magdalen chix ngün ang kopdao le thüikya to hwome ojao chiong.

Jisu chix Wangshem Anyi hato Ngai

(Luk 24.13-35)

12Ifüima hwomkha angkya mixhuak anyi tingkhua to chatkya lomba to, malili lom tokhange chix hwom hato laile aho. 13Nguilaxle hokhie mamabu hama wün; ikoxlechu hwome hokhi kax to chiong.

Jisu Bün ata hato Ngai

(Mat 28.16-20; Luk 24.36-49; Jhn 20.19-23; Mwt 1.6-8)

14Ofüima bün büta fongsax ang thungle ngopongma, chix hwom hato laile aho; ilaxle hwome chiong homle mong tsakle ngokya khoma hwom to sa. Chemthüikoxle chix azangle zokya füima chix sün ngün ang kopdaokyabu kax to hwome chiong. 15#Mwt 1.8.Chixe hwom ang thüi: “Hünzom a chaxwannu pangnu khato paokox; khünaknüsa hama Kaxho Müikya apukkox. 16Owae ong laxle bapti laxüi hex, chixe khosünkya ataküi; ikoxle owae chiong laxüi hex, chixe thajao kopüi. 17Mongongkyabu ang ibu mok angkya tsakzong koxpu: Ku mün ma hwome haxshix chasabu jwonle apaoüi; chitsingkya kax ma hwome zangwünüi; 18Hwome pu kople apüi koxchu chichangba tüta ningkya zik-hing lingkoxchu, ijae hwom to ikuxsa ngaxchu sikngün münfaüi. Kakmixbu to hwome chak füi twonle hwom kakbu amüi koxüi.”

Jisu a Zangkangting to Dün

(Luk 24.50-53; Mwt 1.9-11)

19 # Mwt 1.9-11. Hwom füi ile akax füima, Jowanpa Jisu zangkangting to dün, ilaxle Jowanpa tsaxchi ma athung. 20Wangshembue pangnu khato pao ilaxle hwon-ano; ilaxle Jowanpa-e hwom füi tomle mwotmok; ile otsingtsing chix changpule münwan füi kaxkhi alai le, hwom makhange ohünotünbu mwot mok ang tom.

Currently Selected:

MARK 16: WANCBSI

Highlight

Copy