MARK 15

Jisu Pilat hato Apüi

(Mat 27.1-2,11-14; Luk 23.1-5; Jhn 18.28-38)

1Swomsae nguakhobu mixpa tüichongbu hia wanlom nwotmixbu füi tamchu nguawangbu füi katzua tsuak. Hwome Jisu to janbüi füi khak laxle Pilat hato apüile kox. 2Pitar-e chix ma kax atüi: “Nang Jehudi nok wanghom changcha hex?”

Jisu-e lanle chix ang thüi: “Nange wüi akaxdao ngünlaxle.”

3Nguapa akhokyabue chix ma tüle kaxhux fe. 4Tamchatlechu Pitar-e atüi: “Nange chemlechu münlanüi hia? Hwome nang ma kaxhux fekyabu apalax!”

5Chatlechu Jisu-e chemlechu chilan: ikoxle Pilat khosam.

Jisu Lang angkya Kax Tsuak

(Mat 27.15-26; Luk 23.13-25; Jhn 18.39—19.16)

6Kaitox Pangpwon foto hwome jukya khünak, kun ma kople thomkya mix tuita danle apao angkya chix wanlom tüikya. 7Üntoxle Barabba le amünkya mixsün, nokpu zanbu füi tomle kople thomkya mixsün tuita tüikya; tingnok füi alün le ajong pongma hwome mix lang. 8Khünaknu othom Pilat hato donglaxle ami pongkya ningle, kople thomkya khünak tuita danle fa angkya kaxju ang ngui. 9Ipongma Pitar-e lan: “Kue hünzom hanpak ang Jehudi nok Wanghom dan angkya hünzom mong tsucha hex?” 10Chemthüikoxle nguapa akhokyabue Jisu a chix ang miktsak laxle owüiole koxpule awan.

11Ikoxlechu chixe hwom ang Barabba mix danle naxfa ang nguapa akhokyabue khünaknu to chüi le ama. 12Chatlechu Pitar-e hwom kax to lanle thüi: “Jangchangba Hünzome ‘Jehudi nok Wanghom’ le nyakkya füi kue chemle naxmok le texpu?”

13Hwome akhongle thüi: “Chix a takle langdao.”

14Pitar-e hwom ang thüi: “Büthüikoxle? Chixe chem zia ama daopu?” Anaolechu hwom süchongle mix akhong: “Chix a takle langdao.”

15Ikoxle Pitar-e khünaknu mongzom amüi ang, hwom hato Barabba danle alai, ifüima Jisu a müikhwon zu füi fit ilaxle lang ang owüiole kox.

Süpahibue Jisu Adix-ada

(Mat 27.27-31; Jhn 19.2-3)

16Süpahibue chix Chongwang khwa homtho to pao, ilaxle hwome süpahi othom pangnu wüi nyakle asox. 17Hwome chix ang nyikhik awunle kox, ifüima hwome hux khüsün zinglaxle chix ang asünle kox. 18Ilaxle hwome chix shwomle thüi: “Jehudi nok Wanghom! Nang tsünlo le ngolax!” 19Hwome chix khang ma pünthom füi fit, chix to thuak füi thuak, ilaxle ahaile chikux athong le shwom. 20Ile chix adix-ada füima hwome chix angkya nyikhik siklaxle chix nyi wüi awunle kox. Ifüima hwome chix pünsak ma takle lang ang pao.

Jisu Pünsak ma Takle Langkya

(Mat 27.32-44; Luk 23.26-43; Jhn 19.17-27)

21 # Rom 16.13. Sereni nok Simon (Alekjendar hia Rufa nyi hopa) tingkhua tokya nguiüi hwom füi apong. Pünsak pai angkya süpahibue chix atsangle hwom füito pao. 22Hwome Jisu Golgotha (Khangza hua) le nyakkya khato pao. 23Ikhato hwome chix ang grep-ju khaxkya füi awon ling ang tom, ikoxlechu chixe ija chiling. 24#Mts 22.18.Ifüima hwome chix pünsak ma tak ilaxle khünak huak ma lap le opupue chem kopkople, nantak laxle chix nyiza hwome ahanle lax. 25Hwome chix pünsak ma tak ponge anop ningkya aku baji tuk changkya. 26JEHUDI NOK WANGHOM le chix ajaokya kax hwome chix khangkho ma zale tox. 27#Isa 53.12.Üntoxle hwome chix füi tomle ahux mix anyichu, tuita chix tsaxchi ma ata mix a chix nongchi male tak. 28Ile “Chixe mütkop mixbu süntswon ma wom”, le akaxkya Otsao Lai kax changle ngai ang tom.#15.28: Züizüi laiza ma okhix 28 a obo ang apütle (Luk 22.37 to hulax).

29 # Mts 22.7; 109.25; Mrk 14.58; Jhn 2.19. Le-zyenüi khünakbue khang akhuxlaxle, chix wünhai le thüi: “Ei, Zangshwom-Hom pünlaxle nyix azom bama zingle tsuak angkya mix nang; 30athaxpi pünsak angkya julax ilaxle azanglax!”

31Ile nguapa akhokyabue tamchu wanlom nwotmixbue chix chanyile thüi: “Chixe mixkho a sün ang tho ikoxle makho a sün ang müntho; 32Keme ngünlaxle ongkya lima, Israel nok wanghompa Khrista athax ile pünsak angkya jukoxle müise.”

Ija ningle chix füi tomle pünsak ma takkya nyiechu wüi chix tha ajao.

Jisu Zikya

(Mat 27.45-56; Luk 23.44-49; Jhn 19.28-30)

33Tungto shene khonta azom chaxwan pangnu khato wüi haxshix zangnak. 34#Mts 22.1.Üntoxle azom baji shene Jisu-e ozing alaile: “Eloi, Eloi, Lamasabakthani?”, le akhong.

35Ija khama ajongle ngokyabu züizüie ija zing atatkya ma thüi: “Apalax! Chixe Elija nyakle.” 36#Mts 69.21.Ziklaxle hwom kha angkya khünak tuitae, pünsi tie awangkya othwop tuita, ze kiatua tun ma la laxle chix ang ling ang koxle thüi: “Taxmok! Pünsak angkya chix ajo ang Elija chihüi hia hüihüi!”

37Tüle azaxle akhong laxle Jisu zi.

38 # Lai 26.31-33. Zangshwom hom atsienle tinle thomkya nyikhiknu, okhochi makhange chitong kople kyetle anyi ang achang. 39Chix zuima ajong ngokya süpahi alixachonge, Jisu ile zikya#15.39: ile zikya; züizüi laiza ma akhong ilaxle zile pao, le tüile. ngünkya zuma: “Ija khünak a otsingtsing ma Zang Hosa jao changdaokya changa”, le thüi.

40 # Luk 8.2,3. Shekobu züizüie ochu tokhange hule ngokya; hwom khama Meri Magdalen, ilaxle Jakop honao hia Jusep nyi honu Meri, tamchu Salomi hwom asukya; 41Chix Galili to tüipongma, hwome chix man to ilaxle chix to fong; ilaxle mama shekobu chix füito Jerusalem to nguikyabuchu hwom füi tomle asukya.

Jisu Mang Akhünkya

(Mat 27.57-61; Luk 23.50-56; Jhn 19.38-42)

42Arimathia nok Jusep nguipongma zanghan hom angle azong le tüikya. Chix a tuita Zang Wangting tanle ngokya, noke achuak achenle tüikya nguawang tuita changkya. 43Ija nyix a achwonkya nyix (sabath thonyix) changkya. Ikhoma Jusep mongchong laxle Pilat hato nguilaxle Jisu mang jule lax. 44Jisu ziüna le atatlaxle Pilat abüt. Chixe hota thakma apünkya süpahi alixachong nyaklaxle chix zi füima hanpak chemtukux ledaopuix, ija awanle lax. 45Hota thakma apünkya mixsün makhange awan ang kopkya zuma tix Pitar-e Jusep ang Jisu mang pao ang kox. 46Jusep-e nyidax shak, mang ajo ilaxle ija füi loplaxle long tholaxle zingkya zuk ma chix sho. Chixe zuk ka longnu tuita füi hakle tox. 47Meri Magdalen hia Jusep honu Meri nyie, Jisu mang ojong ma thompuix ang, toxkya to hule ngo.

Currently Selected:

MARK 15: WANCBSI

Highlight

Copy