MARK 14

Jisu Kop angkya Katzua

(Mat 26.1-5; Luk 22.1-2; Jhn 11.45-53)

1 # Lai 12.1-27. Athax ija a Kaitox Pangpwon hia twonkhax chiawonkya pangpua ngui ang nyix anyi tüile le changkya. Nguakhobu hia wanlom nwotmixbue Jisu ajingle koplaxle langle awüt angkya huxsa ma oshua lomle ngokya. 2Hwome thüi: “Noknu wuk adündün le keme ija pangpwon lua ma chimoküi.”

Jisu to Bethani ma Münga Pa

(Mat 26.1-13; Jhn 12.1-8)

3 # Luk 7.37,38. Jisu a Bethani to, tsangtsa ma awang le mak füikya Simon le amünkya mixsün hom ma tüikya. Chix fongsax ang thungle ngoponge, mixcha tuitae otha lixkya tamchu ongan müikya münga longthua tuita ma awangle apüi. She-e ija longthua dap laxle Jisu khang to pale kox. 4Ikoxle hwom kha angkya khünak züita mong aduak laxle thüi: “Büthüikoxle ija münga amuamuale ashix akhaxpu? 5Ija ngunhuak ho-azom tukux ang hang laxle ija jan ngunkhix#14.5: jan ngunkhix: 6.37 to hulax. chitüi chinangkya zasabu ang koxtsuakse!” Ile hwome she mwot ahai.

6Ikoxle Jisu-e thüi: “She to taxtsa ngokox! She to hünzome büthüikoxle poxle ngopu? Ija a she-e ku zongto müikya mwot mokkya changpu. 7#Tsk 15.11.Chitüi chinang zasabu hünzom füi othuithuima ngo angkya changle, ilaxle hünzome otue fongse tsuüi hex, tütatuechu hünzome hwom to fong ang tsuak. Ikoxle ku a hünzom füi othuithuima ngoüi chichang. 8She-e chem thopuix ija mokpu; she-e ku mangzu angkya manguiba wüi ku tsangtsa to münga füi pale achwonpu. 9Kue otsing tomtata akaxpu: Chaxwannu ojong pang khato Kaxho Müikya apukle tsaüi hex, ija mixchae mokkya mwot bama she mün texle atakle lax angkya hanpakma wünüi.”

Juda-e Jisu Khohang angkya Mongtsu

(Mat 26.14-16; Luk 22.3-6)

10Ifüima Juda Iskariot, bün anyi kha angkya tuita, nguakhobu chak to Jisu owüiole kox angkya hanpakma hwom hato pao. 11Ija chix kax atatlaxle hwom ang mong tüle müi, ilaxle chix ang ngun koxüi hex le tsaosax. Idaile Jisu ochwon ma hwom chak to owüiole koxtsuak angkya hanpakma chixe oshua müikya to hule ngo.

Jisu-e Kaitox-Pangpwon Fongsaxkya

(Mat 26.17-25; Luk 22.7-14,21-23; Jhn 13.21-30)

12Twonkhax chiawutkya Anthut Pangpwon asui nyix, Kaitox Pangpwon fongsüt müi ang chun langkya nyix chix wangshembue Jisu ang thüi: “Kaitox Pangpwon fongsüt kwome ojong khato achwon koxle müiüile texpu?”

13Ifüima chixe chix wangshem anyi, ija adangle fakya füi tsanle apao: “Tingkhua to donglax; ikhato mixhuak tuita ti tikkux koplaxle hünkhi füi apongüi. Chix füifüile lelax. 14Chix ojong khama nopüihex, ikha angkya hompunu ang thüilax, ‘Nwotmix-e thüile, kue ku wangshembu füi Kaitox Pangpwon fong saxüi; ku wünthong ang nui ojong hex?’ 15Ifüima chixe pangnusa achwon laxle thomkya kha thak tokya nui chongkya tuita hünkhi hama ahole faüi; ikhama kem hanpakma achwonkox.”

16Wangshem nyi pao; tingkhua to ngui; ikhato Jisu-e hokhi füi akaxkya ningle pangnu bang ilaxle hokhie ikhama Kaitox Pangpwon fongsüt achwon.

17Han asong füima Jisu chix wangshembu füi tomle ngui. 18#Mts 41.9.Hwom thung laxle fong saxle ngoponge Jisu-e thüi: “Otsingtsingma kue hünzom ang thüipu, hünzom khama ku füi tomle fongsaxkya khünak tuitae ku khohang angkya changle.”

19Ikhoma wangshembu ang tüle mongma ilaxle tuita füima tuita le chix ma atüi: “Ija ku ang thüikya ning münchang hexnyi?”

20Ikoxle chixe hwom ang thüi: “Ija a bün anyi khama owae ku füi tomle khua tuita ma an somüihex, chix changüi. 21Khünak Hosa a chix bama zale thomkya tüikya ningle zilaxüi; ikoxle owae Khünak Hosa khohang laxpuix, chix hanpakma nuzao sikngün tüiüi! Ija mixsün hanpakma chix a chipux kox wüi müihuse!”

Jowanpa Fongsüt

(Mat 26.26-30; Luk 22.14-20; 1 Ko 11.23-25)

22Hwome fongsax ponge Jisu-e an kop; mohiman laxle chixe ija akhix üntoxle ija wangshembu ang koxle thüi: “Koplax, ija a ku tsangtsa changpu.”

23Anaochu chixe wansa tuita lax üntoxle chixe münchong koxlaxle, hwom ang kox ilaxle hwom pangnue ija ling. 24#Lai 24.8; Jer 31.31-34.Anaolechu chixe hwom ang thüi: “Ija a ku füi tsaosaxkya aji changpu, oja khünaknu hanpakma chiak laxpuix. 25Otsingtsingma kue hünzom ang thüipu: Kue Zang Wangting to grep ti hozün maling tanto, athax grep ti kue münlingüi.”

26Ifüima hwome tsai tuita ngao laxle homtho to laile Olip haxhua to pao.

Pitar Atse angkya Jisu-e Ngai

(Mat 26.31-35; Luk 22.31-34; Jhn 13.36-38)

27 # Zek 13.7. Jisu-e hwom ang thüi: “Ku tata danle toxlaxle hünzom pangwüi paole sam angkya changle; chemthüikoxle zale thomkya tüile: ‘Zange chun Nyetmix langüi; ilaxle chunbu pangnu afale pao ang tomüi.’ 28#Mat 28.16.Ikoxchu ku anaole zokya füima hünzom thoto wüi ku Galili to paoüi.”

29Ikoxle Pitar-e lan: “Mamabue danle toxkoxchu kue otuechu nang danle müntox!”

30Jisu-e Pitar ang thüi: “Otsingtsingma kue nang ang thüipu, awün o anyi ma mahaba wüi, nange ku müntsing hex le othom azom ma atseüi.”

31Pitar-e sisile kaxshing kople akax: “Ku nang füi tomle zi angkya changkoxchu, kue nang müntsing le otuechu münthüi!” Wangshem mamabuechu ile wüi akax.

Jisu-e Getseman ma Zangjop

(Mat 26.36-46; Luk 22.39-46)

32Hwom Getseman le nyakkya tsawat jongtakha to ngui. Chixe wangshembu ang thüi: “Kue zangjop pongma hünzompi ikhama nuithün.” 33Chixe Pitar, Jakop hia Juhan hwom chix füito laxlax tox; Chix hato zakya hia sikngün tüle hüi. 34Ilaxle chixe hwom ang thüi: “Kujao amüt tang le ku ang tüle mongmaxle. Hünzom ikhama ngodao, ilaxle hunga ngolax.”

35Chix thochi to hidaole achale le, chix haxkha to tswonle awüt ilaxle “Tsuak angkya oli jangchang thüiningle ku ija sikngün makhange le ang taxtom”, le jop. 36Chixe thüi: “Apa! Apa! Nange chitho angkya oli chemchu chitüi; ku angkya ija sikngün wansa paofa; bachutix ku mongtex ma chichang le, nang mongtex ma wüi naxchang.”

37Ilaxle chix chatkya thoma wangshem hwom jiple bang. Chixe Pitar füi akax: “Simon, nang jiple ngopia? Nang khonta tuita mik azangle ngo ang müntho hexnyi? 38Hünzom thwontsing to chidüt angkya bama mik-hingle hunga ngolax ilaxle zangjoplax. Chasa ma mongtsu ikoxchu tsangtsa ma zong chitüikya changa.”

39Chix tamchatle pao ilaxlechu kax tuitata wüi zexle zangjop. 40Ifüima chix chat, ija thomachu hwom jiple wüi bang; hwom ang mik zamle ngo angkya zong chitüi.

41Chix othom azom ma zangjop laxle chatkya zuma hwom ang thüi: “Hünzom athax kople jiple nazak ngopuix nyi? Nguidaoa! Hanpak hüiüna! Hulax, athaxpi Khünak Hosa ochax khünakbu chak to koxüi. 42Ajonglax, paohax! Hulax, ku khohang angkya mix ikhama tüile!”

Jisu Kopkya

(Mat 26.47-56; Luk 22.47-53; Jhn 18.3-12)

43Jisu-e akax ngoponge wüi Juda, bün anyi kha angkya tuita, chixe ikha alop. Chix füi tomle chang hia pünthombu koplaxle nguakhobu hia wanlom nwotmixbu tamchu mixpa tüichongbue tsanle apaokya khünaknu othom tuita tüikya. 44Jisu khohang angkya mixsüne hwom ang münwan fale akax: “Kue owa füi tun apong üihex; hünzome lomkya mix chix changüi. Koplax ilaxle khünkhile hule paolax.”

45Juda-e ikha alop pongma; tangthole chix Jisu hato hüi ilaxle “Nwotmix”, le nyaklaxle chix füi tun apong. 46Idaile hwome chix kop ilaxle shingmongle kha. 47Ikoxle ikhama ajongle ngokya kha angkya mixsün tuitae ma changlo siet laxle Nguakho da ang ngokya mixsün to hütle chix na suakle adüt. 48Ifüima Jisu-e akaxle hwom ang thüi: “Hünzom a huxmix füito zikpupu le, chang hia pünthombu koplaxle ku kop ang hüipia? 49#Luk 19.47; 21.37.Zangshwom-Hom to nyixka chithai le kue hünzom hama hwon-ano ngopu, ipongma hünzome ku chikop; ikoxlechu zale thomkya Lai Kax ngai angkya hanpakma ile changpu.”

50Ifüima wangshem hwom pange wüi chix danle tox, ilaxle pao ma süt.

51Mixsün tuitae nyidax tata awunlaxle chix füi le azui. 52Hwome chix kop ang azong ikoxchu chixe nyi sikle awüt toxlaxle paole azang.

Nguawangbu Pomtho to Jisu

(Mat 26.57-68; Luk 22.54-55,63-71; Jhn 18.13-14,19-24)

53Ifüima hwome Jisu Nguakho hato apüi. Chix hom ma nguakhobu tamchu wanlom nwotmixbu üntoxle mixpa tüichongbu pangnu wüi afoxle tüikya. 54Ochu tokhange azuile hüikya Pitar Nguakho homtho nya-o kople ngui. Ikhato chix nyetmixbu füi wün ma hangle thungle ngokya. 55Nguakhobu hia Nguawangbu tusox pangnue Jisu lang angkya bama chix thaikya nox amopüsa ngaxchu tüichale lom; ikoxlechu chiatak tsuak. 56Khünak obiobie chix chisukya kaxkhi othaibu huanuma alai, ikoxchu hwom kaxkhi ibu ono chitom.

57Ifüima züizüie ajong laxle Jisu chisukya othai kaxkhibu koxle akax: 58#Jhn 2.19.“Kue, ija khünake, chak füi zingkya Zangshwom-Hom pünlaxle nyix azom bama wüi chak füi zingkya chichangle mama tuita ajongüi, le chixe akaxkya atatdaoa.” 59Ile changkoxlechu hwom kaxkhibu ngaxchu ono tomkya chitüi.

60Osungwa ma ajong laxle Nguakhoe Jisu ma atüi: “Nang chisukya bama hwome fakya kaxkhi to lan angkya nang ma kaxlan chemchu müntüi hia?”

61Ikoxlechu Jisu-e kaxsu chidün. Anaolechu Nguakho-e chix ma atüi: “Nang mohimankya Zang Hosa Messaiah changcha mi?”

62 # Dan 7.13. Jisu-e lan: “Changpu ku a; üntoxle hünzome Khünak Hosa, Khüthak Zang tsaxchi ma, thungle ngokya hia ding tokya, zangfwom ma jukya ngünüi!”

63Nguakhoe chix nyi akyetle thüi: “Kem ang chatle kaxkhi laxngo angkya fang münchang! 64#Liw 24.16.Chixe Zang adakya hünzome atat daoa, Hünzome chemle thütpu?” Hwom pangnue wüi chix kho-awakya chitüi le thüi: “Chix thaidaoa ilaxle chix a langkox le wüi asule tüile.”

65Züizüie Jisu to thuake thuak tamchu thünzim laxle chix to fitle atüi: “Nang to owae fitpuix apuahu!” Ifüima nyetmixbue chix koplaxle hwom chakfabu füi fit.

Pitar Atsekya

(Mat 26.69-75; Luk 22.56-62; Jhn 18.15-18,25-27)

66Pitar chukha to homtho nya-o to ngoponge, Nguakho dacha shekosa tuita hüi; 67Pitar wün zuima thungle ngokya ngünlaxle, she-e chix to tangthole hulaxle thüi: “Nangchu Nazareth nok Jisu füi tomle ngokya mix changle.”

68Ikoxle Pitar-e atsele lan: “Nange chem akaxpuix kue mün-awanhex.” Ilaxle chix kapox zui to dong. Ifüima lüile O ha.#14.68: Züizüi laiza ma a Ifüima lüile O ha, le thüikya kax müntüi.

69Dacha shekosa chix ikhato ngün ilaxle ozuima ajongle ngokyabu hama tamchatlechu akaxlekox: “Chixchu wüi hwom kha angkya tuita changle!” 70Anaolechu wüi Pitar-e atse.

Chatle noxta ngokya füima ozuima ajongle ngokyabue Pitar ang thüi: “Nangchu hwom kha angkya tuita changtomtale chemthüikoxle nang Galili nok changle.”

71Ijama Pitar-e tsaosaxle akax: “Hünzome owa mowün ngopuix, ija mixsün a kue münawan jaojao. Kue kaxthai jang akax thünchu Zange ku ang sik naxangün kox!”

72Ifüima lüile O chatle ha; ilaxle Jisu-e, O anyi ma mahaba wüi, nange ku münawan le atseüi, le chix füi akaxkya kax Pitar-e texle atak. Üntoxle chix mongmaxle ozak alaile sop.

Currently Selected:

MARK 14: WANCBSI

Highlight

Copy