MARK 13
13
Jisu-e Zangshwom-Hom Atsun angkya bama Akax
(Mat 24.1-2; Luk 21.5-6)
1Jisu Zangshwom-Hom angkya lai pongma, chix wangshem tuitae chix ang thüi: “Nwotmix! hulax, chemle müitsuakkya long hia hom hex?”
2Jisu-e chix ang thüi: “Ijabu hom chongkya nange ngünpuix nyi? Ikhama long tuitachu chiakhai homle müntoxüi ikoxle ibu pangnu wüi atsunüi.”
Sikngün üntoxle Zothupbu
(Mat 24.3-14; Luk 21.7-19)
3Zangshwom-Hom akailaxle Jisu Olip haxhua ma thungle ngoponge, Pitar hia Jakop tamchu Juhan hia Andriw hwom süile chix hato hüilaxle akax, 4“Ijabu ongai ningle chang angkya? Tamchu ibu changle hüiüi ma hanpak nguile hüikya münwan ang chem changüi? Ibu kwom hama apua hüi.”
5Jisu-e hwom ang thüi: “Owaechu hünzom ochei lom to chipao angkya bama khünli lax. 6Ku chix changpu, le ku mün ma akaxle huanuma nguiüi ilaxle hwome khünaknu tüle dyenüi; 7üntoxle nuisox hia tsailo to zan zing atat pongma hünzom taxaban, ijabu a chang angkya jao; ikoxlechu oshuk hüile ngoüna le münchang. 8Chaxwan tuita ata chaxwan füi azanüi; wangting tuita ata wangting füi azanüi; pangnu khato bütix siüi tamchu otui onuak tüiüi. Ijabu a naongün wokkak owang ningle changpu.
9 #
Mat 10.17-20; Luk 12.11,12. “Ikoxle hünzom ma hanpakma khünkhi lax, chemthüikoxle hünzom a kop laxle khwa to kaxfün ang paoüi; Sinagok ma hünzom to chak moküi; ilaxle Gowarnor hia wanghombu pomtho to ku hanpakma kaxkhi fa ang hünzom ajongüi. 10Ikoxlechu oshuk hüiüi thoto Kaxho Müikya jat pangnu hato apuale kop angkya oli changle. 11Üntoxle otue hwome hünzom kaxfün ang khwa to paoüi hex, hanpak mangui tanto hünzome chem akax angkya changkoxpu le abanle taxngo; ikoxle hanpak nguikya füi tomle hünzom ang chempang koxüihex ija hünzome akaxkox. Chemthüikoxle nange wünkya zangwün a nang kax münchangüi; ikoxle ibu a Otsao Chasa tokhange hüikya changüi. 12Khünakbue matüi manao tamchu masu masabu lang ang owüiole koxüi; ilaxle susa hwome manu mapa füi alünle ajongüi, ilaxle hwom lang ang koxüi. 13#Mat 10.22.Ku mün khoma hexle khünak noke wüi hünzom thua anuüi; ikoxlechu oshuk kople adukya mixe khosün ataküi.
Za-adünle Abüt angkya
(Mat 24.15-28; Luk 21.20-24)
14 #
Dan 9.27; 11.31; 12.11. “Ikoxle ongai hünzome nushix dongle za adünkya max angkya mix (ekya mixe awanle koplax) chiajongpüli khama ajongle ngünüi hex, ija pongma Jehudi ma asukyabu haxhua to paolax. 15#Luk 17.31.Homkho to asukya mix, chix hom to tütali lax ang nople hanpak taxalyet. 16Zim-hax to asukya mix, chix nyiza kop ang ma hom to taxchat ngozi. 17Ija tuke omün ma asukyabu tamchu naosom tsomsip tankha asukyabu zongto huanuma nuzao sütüi. 18Ijabu zangkong tue chichang angkya kuxma joplax. 19#Dan 12.1; Mik 7.14.Chemthüikoxle ija tuke apongkya thangshix, Zange chaxwannu zingpong tokhange athax kopkya mong ma iningle jao machangle tüiüi tamchu ile otuechu münchang toxüi. 20Ikoxlechu Jowanpa-e ibu hanpak amoxdaoa; ile chichang thüikoxle khünak owachu ozün ma ngotsuak angkya fang münchang. Ikoxlechu kamle kopdaokyabu hanpak ang, chixe ijabu hanpak amoxdaoa.
21“Ifüima khünak owawae hünzom ang: ‘Hulax, Khrista a ikhama tüile!’ chichangba, ‘Hulax chuja khato!’, le jangthüi; ija to ongkya taxtüi. 22Chemthüikoxle othai khristabu tamchu othai ajebu tüle lwonüi; ilaxle jangtsuakba otsao khünakbu ngaxchu dyen tsuak angkya kuxma hwome münwan hia ohünotünbu tüle ahoüi. 23Ikoxle hünzom khünli le ngolax; Hulax, kue ija achale wüi hünzom füi akaxle thompu.
Khünak Hosa Nguikya
(Mat 24.29-31; Luk 21.25-28)
24 #
Isa 13.10; Jol 2.10,31; 3.15; Mik 6.12; Isa 13.10; Ezk 32.7. “Ija sikngün zothup kaikya füima, zanghan nakle maxüi; lyetnue tam chinyanüi; 25#Isa 34.4; Mik 6.13; Jol 2.10.lyettsibu punle dütüi, ilaxle ding angkya tsakzong, sile achikachaxüi. 26#Dan 7.13; Mik 1.7.Ifüima Khünak Hosa tüle zaxzangle tamchu ngamle zangfwom ma juüi. 27Ijama chix kaxtaimixbu apaoüi ilaxle tüchikao chaxwannu shuk makhange tüchikao zangding tua alople, Zange kamle thomdaokyabu ozong ali tokhange asoxüi.
Fupsa Pün makhange Awanle kop angkya
(Mat 24.32-35; Luk 21.29-33)
28“Fupsa pün makhange kaxpan awanle koplax. Otue osong dongle ochak chuiüi hex, hünzome tsonu nguiüna le awan ang kople. 29Ilailaile ijabu changle hüikya ngünkya zuma, hanpak chwonünale hünzome awanle koplax.#13.29: changle…koplax; chichangba chix a ikhama, ngui ang achwon ngole. 30Athax pongma tüikya khünakbu komle mazi tanto wüi ibu pangnu changle hüi angkya mong ma koplax. 31Ding hia hax kaile paoüi ikoxlechu ku kax kaile münpaoüi.
Otu hia Hanpak Owaechu Müntik
(Mat 24.36-44)
32 #
Mat 24.36. “Ija nyix chichangba otu owan bama, Apa boma, kaxtaimixbue chichangba Hosae ngaxchu chichangba owaechu awan ang müntho. 33Hunga ngolax, mik hingle ngolax; chemthüikoxle hanpak otue changüi hex hünzome münawan. 34#Luk 12.36-38.Ija a khünak tuita hom toxlaxle mixwün to paoüi ningle changpu. Chixe ma dabu ang mixhuak to ma mwot-mwot ahanle kox ilaxle hom nyet mix ang mik-hingle hule ngolaxo le tox. 35Ija khoma mik-hingle hule ngolax; chemthüikoxle hom hopupa a anyix ningle wüi nguitüi, awün ningle wüi nguitüi, ohat-thoe wüi nguitüi, anop ningle wüi nguifa tüi, chix chemtue ngui angkya hex hünzome münawan. 36Chix allele nguilaxbachu chix thoma hünzom jiple chibang angkya oli. 37Oja kue nang füi akaxpuix, ija kue noknusa füi akaxpu: Hunga ngolax!”
Currently Selected:
MARK 13: WANCBSI
Highlight
Share
Copy
Want to have your highlights saved across all your devices? Sign up or sign in
Wancho Naga Bible - OTSAO BAIBEL
Copyright © 2012 by The Bible Society of India
Used by permission. All rights reserved worldwide.
