ZEKARIA 8
8
Jirusalem Laloshihkhi
1Wuto Atungpuh yu I ki arü: 2Wuto Atungpuhnü ha thachoh: Inü Zion kheak mükthsülah, tüsho anihbe thsungkheak inü tode mulong zhipzhiplah. 3Atungpuhnü ha thachoh: I Zion lim yübah, tüsho Jirusalem phulung ching labah; Jirusalem ju thiyuro kiuto tüsho Wuto Atungpuh müzüng ju amüsüh müzüng de ajibah. 4Wuto Atungpuhnü ha thachoh: Ashinbuhrü le ashinberünü ashinkhi hode nihbuh khah ching tso shuhbah kheaküshe Jirusalem kiudunglimrobo ching binbah. 5Tüsho kiudunglimrobo ching athrürü tüsho aliberübonü mide ahoribah. 6Wuto Atungpuhnü ha thachoh: Harü nimungbo ching aningkhi mihtsürübo ki amukukbe thsüa lalashe, Wuto Atungpuhnü thachoh, I ki she amukukbe laba shi? 7Wuto Atungpuhnü ha thachoh: Inü I mihtsürübo aniakhiuklim tüsho aniyüzahlim lomibo chingnü akhümkhitbah; 8tüsho inü arübo Jirusalem ching lashihpü bede arübah. Athülünkhi tüsho thiyuro-lungki ching arübo I mihtsürü thsübah tüsho I arü Thrünpuh thsübah.
9Wuto Atungpuhnü ha thachoh: Mulong toang! I yo arüngyam thsülopü thsungkheak khimtan thsüchoki wukihrübonü asukkhi yubo nüsanü kheakü sode lah. 10Tümüde akhuhlim a mihtsürü yungsho shiwüh mihkhah tümü mülakheah, tüsho sheshe nihbuh riri chingnü khümkhita mülakheah. Inü mihtsürübo khülangnü khülang azhihde lashih. 11Tüshe kheaküa inü ha mihtsürü aningkhi ki adüso nimungbo nangde mürhimo, Wuto Atungpuhnü thachoh. 12Tümütüsho judüki mungtsü yangkhi labah; kurungasonü aso asobah, alonü amukhuhshihbah, tüsho thüningbonü ayinke jihbah; tüsho inü ha mihtsürü aningkhi ki harü alala yamrüplurüp lushihbah. 13Nüsa trükshih bolung muthrumüneankhi lakhi nangde, O Juda tüsho Israel yamkhün, junangde inü nüsa khümkhitbah tüsho nüsa müngühmühi labah. Dütre, tüshe nüsa khahbo mürangde laang.
14Tümüde Wuto Atungpuhnü ha thachoh: Nüsa jipürünü I bukakhiukshihchoki, inü mülümalode nüsa kheak thsümütsü hande arükhi nangde, Wuto Atungpuhnü thachoh, 15junangde kheaküshe inü harü nimungbo ching Jirusalem tüsho Juda yamkhün ki atsü rhimopü lümkhi lah; dütre. 16Harü ha nüsanü arhimobebo lah: Mihtsürü abannü nihbuh yamhingrü ki thiyuro asukang; nüsa chipiripitbo ching thiyuro mahkhap jihang tüsho mungtsü thsüang, 17khülangnü khülang azhihde nüsa mulongbo ching amütsü düthsü, tüsho akeangyu thiyuchihchim dümuzho; tümüde harü alala inü athraneankhi lah, Atungpuhnü thachoh.
18Wuto Atungpuh yu I ki arü: 19Wuto Atungpuhnü ha thachoh: Khinu phüyi ching khümkeakkhi, phüngü ching khümkeakkhi, thüne ching khümkeakkhi, tüsho thürüpü ching khümkeakkhi ju asühachih tüsho asühara akheahmünchibo, tüsho Juda yamkhün thsungkheak asühkhi thüniobo labah: jumonü thiyuro tüsho mungtsü muzhoang.
20Wuto Atungpuhnü ha thachoh: Kiuto ahihdo chingnü mihtsürübo kheaküshe arübah; 21kiuto khülang ching larünü püpü ching yüde athabah, “Arang, isanü yübah Atungpuhnü amulungkhi mushuanü, tüsho Wuto Atungpuh yimanü; I a yüchoh.” 22Mihtsürü ahihdo tüsho sühmüh lakhi trükshihbonü Jirusalem ching Wuto Atungpuh yimde tüsho Atungpuhnü amulungkhi mushupü arübah. 23Wuto Atungpuhnü ha thachoh: Judüki nimungbo ching trükshih yutha aban chingnü mihtsürü 10nü Jihudarü 1 kheak ramlobah, api khimmih kheak zamlobah athabah, “ Isa nü lung yüanü, tümüde Thrünpuh nü lung lah de isanü sodo.”
Currently Selected:
ZEKARIA 8: YIMCBSI
Highlight
Share
Copy
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
