ZEKARIA 9
9
Phünirü Trükshihbo kheak Mahkhap
1Ha Atungpuh yusheak: A TU N GPU H yu ju Hadrak lomi azhihde lah tüsho Damaska kheak keambah. Tümüde Israel trükbo lang yungde Siria kiuying she Atungpuh yo ah; 2ju kheak arekhi Hamath she, Tair tüsho Sidon, arü khide lümlung lalashe api yo ah. 3Tairnü chipi thsüdo, tüsho asungthulung nangde shotoyinchi tüsho kiudunglimrobo müneanmuru nangde suna wumujungdo. 4Tüshe kheakü, Atungpuhnü lakhit-kukrukbo lubah tüsho lakhit ju keto ching jipyukbah, tüsho ju monü aniuabahbah.
5Ashkelonnü ju ngübah tüsho atrebah; Gaza she, thsünü ching kolahbah; Ekron she ah, tümütüsho ha mulonglamkhi kungabahdo. Gaza chingnü kiulongthsüpuh dükheakbah; Ashkelon mülade akambah; 6Athsürukhi-trük mihtsürü Ashdod ching labah, tüsho inü Filistia kükheangkhi akheam thsüshihbah. 7Inü amün chingnü thiyih tüsho ahübo dükeak chingnü athraneanbebo hande atsobah; ha kheaküshe isa Thrünpuh thsungkheak aningkhi larü thsübah; ha Juda ching guk khülang ruk labah, tüsho Ekron ju Jebusrü ruk labah. 8Judüki I ju aheangrü nangde I yam ching labah, junangde shenü yüla arüla de müthsü; junorü shenü she arü kurungkheak malihho, tümüde kheakü I müknü ngüdo.
Arübe Kiulongthsürü
9Tode asühachihang, O Zion mihtsürübo!
Achangnü zhiang, O Jirusalem mihtsürübo!
Kheahang, nüsa kiulongthsüpuh nüsa kilim,
thiyuro-lungki tüsho akhümkhit lade,
azhihayih tüsho donki kheak, khorapung nunu kheak,
donki nunu kheak binbah arüchoh.
10Apinü Ephraim chingnü khora-lolungbe tüsho Jirusalem chingnü thirithsü khora dükheakshihbah;
tüsho keochihbe sanglühbo thsümünimbah,
tüsho apinü trükshihbo ki mungtsü yukhüm jihbah;
api yakzan shuhkhi ketonü keto khiungde alabah,
tüsho Euphra Ayung chingnü alomi akheambo khiungde alabah.
Atungpuh Mihtsürü Laloshihkhi
11Nüsa thsungkheaknü I thiyih tangzüng nüsa kheak lakhinü,
inü nüsa aramrübo ke mülakhi shingkung chingnü zuzu thsüde adükhebah.
12Nüsa chipi lim rholoang,
O mulonglamkhi aramrübo;
khihni nüsa alü thsüde laloshihpü inü khipkhitchoh.
13Tümüde inü I sanglüh nangde Juda hündo;
inü Ephraim ju hühzobo kamshihdo.
Inü nü tsührübo wusushihbah, O Zion,
O Greek, nü tsührübo azhihde thirithsü nukshang nangde ashuhbah.
14Judüki arü kurungkheak Atungpuh akhiukbah,
tüsho api hühzo chinchobe nangde ayübah;
Atungpuh Thrünpuhnü hulipungpung khungbah tüsho düjinglim chinthrüm ching mikhuhlim yübah.
15Wuto Atungpuhnü arü kümdobah,
tüsho arünü lunghitrü muyuabahbah tüsho ajungbah;
arünü arü thiyih ju yukhu nangde yungde,
tüsho phurusük nangde mide akambah,
kingaün sadam mühitbo nangde apangkhitbah.
16Ju nimung Atungpuh arü Thrünpuhnü arü khümkhitbah,
tümüde arü ju api mihtsürü namfimihnu boto lah;
tümüde kuthran yo mürezhingzhing nangde arünü api lomi kheak yinshihbah.
17Tümüde api tsakamkhi tüsho akhamkhi küdükhüh la!
Hinü athrününgtsüng tüsho yukhunü anünürü shih kihde akambah.
Currently Selected:
ZEKARIA 9: YIMCBSI
Highlight
Share
Copy
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
