ZEKARIA 10
10
Atungpuhnü Bekhitpü Alokhikhi
1 Atungpuh , chinthrüm mo thsübuh ki mükheankim tsüng akheahmünchi ching kheangang. Apinü mihtsürü kilim tsüng arüshihchoh, tüsho mihbüm aban kilim thulu sangrungbo jihchoh. 2Tümüde sangthsübonü akeangyu thachoh; tüsho müchitrünü akeangyu ngüchoh; milim-mirünü akeangyu michoh, tüsho akeangkeang ching mulong shukheamchoh. Jumonü mihtsürübo ju namfimihnu nangde rümde tsahchoh; arübo aneakrü mülakhinü küpkhukchoh.
3Namfimihnu neakrübo kheak I bukakhiukkhi takde lah, tüsho inü limberübo thsümüchibah; tümüde Wuto Atungpuhnü api mihnu boto, Juda yamkhün kümchoh, tüsho apinü arübo kükheangkhi thirithsü khora nangde kamshihbah. 4Arü bolung chingnü amühit-lung arübah, arü bolungnü khimyam ashungdung labah, arü bolungnü keochih sanglüh labah, arü bolungnü limthorü labah. 5Arü thsürubah keochih ching thirithsürü nangde, kiudunglimrobo akhimniuhniuh ching thiriri thrümbah; arünü keochihbah, tümüde Atungpuh arü lung lah, tüsho arünü khora kheak binrübo achih ngüshihbah.
6Inü Juda yamkhün düküngde akamshihbah,
tüsho Josep yamkhün inü khümkhitbah.
Inü arü belode arübah, tümütüsho arü kheak I muzhokhi lah,
tüsho arü ju inü mübahyukkhi nangde alabah;
tümüde I ju Atungpuh arü Thrünpuh tüsho inü arü ki alojihbah.
7Judüki Ephraim mihtsürübo ju thirithsürü nangde akambah,
tüsho arü mulongbo ju yukhu yungkhi nangde asühbah.
Arü tsührübonü ju ngübah tüsho asühachihbah,
arü mulongbo Atungpuh kheak khide asühbah.
8Inü arü jibah tüsho arübo mukhungbah,
tümüde inü arü rhokhitdo tüsho akhuhlim nangde arü hihde akambah.
9Inü arübo trükshih bolung hiumüzütshihshih she,
limshu lomibo chingnü arünü I lümkhitbah,
tüsho arünü arü tsührübo mütrübah tüsho alodarübah.
10Inü arü Ijip lomi chingnü thüyam lim bedarübah,
tüsho arübo Asiria chingnü bemukhungbah;
inü arübo Gilead lomi tüsho Lebanon ching,
arü thsungkheak khiungshak mülayi khiungde bedarübah.
11Arünü lümthsünü keto tsahhobah,
tüsho keto abükkhibo kingkheambah tüsho Nile asükbo alala ngahbah.
Asiria kükheangkhi abobe kambah tüsho Ijip tso chamde atsobah.
12Inü arübo Atungpuh kheak düküngde akamshihbah,
tüsho arünü api mung ching tsahbah,
Atungpuhnü thachoh.
Currently Selected:
ZEKARIA 10: YIMCBSI
Highlight
Share
Copy
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
