ZEKARIA 11
11
Israel Thsümünimkhi
1Nü ripitbo khimshuhang, O Lebanon,
junangde monü nü yo cedarbo aniubah!
2Tüzhoang, O saipress, tümüde cedar lungdo,
tümüde sangbo müretahkhi thsümünimdo!
Tüzhoang, Bashan thülamsangbo,
tümüde murung akheahbo kiukheamdo!
3Aniang, namfimihnu neakrünü tüzhokhi,
tümüde arü müretahkhi thsümünima lah!
Aniang, kekhüzübo arungkhi,
tümüde Jordan ching khide akheahkhi murung thsümünimdo!
Namfimihnu Neakrü Mahne
4 Atungpuh I Thrünpuhnü ha thachoh: Alaksahpü akhua lakhi namfimihnu boto neakrü khülang kamang. 5Sherünü arü thulochonü arü laksahchoh tüsho amülim müla de lümchoh; tüsho sherünü arü yinchonü thachoh, “Atungpuh müngühmühi thsang, tümüde I alarü kamdo”; tüsho arü namfimihnu neakrübonü arü kheak amuzho müla. 6Tümüde inü kheaküa alomi ching larü amuzho müla, Atungpuhnü thachoh. Inü arü mihbüm abannü yamhingrü tüsho kiulongthsürü khah ching jihbah; tüsho arünü alomi thsümünimbah, tüsho inü arü khah chingnü she mübekhit.
7Jumonü, namfimihnu yinzüyindorü thsung thsüde I alaksahpü akhukhi namfimihnu boto neakrü kamdo. Inü tso mahne ludo; khülang mung inü Mihmüthsüm, püpü ki Arihako de jilah, tüsho inü namfimihnu kümchoh. 8Khinu khülang ching inü namfimihnu neakrü mahsam yankhita bahchoh, tümüde arü kheak inü marümkhukde kamdo, tüsho arünü she I mükheahne. 9Jumonü inü tha, “ I nüsa namfimihnu neakrü müthsü. Tümü ashepü lanü, ju sheshang; tümü athsümünimpü lanü, ju thsümünimshang; tüsho aninga larünü khülangnü khülang shih tsühshang!” 10Inü Mihmüthsüm tso lu tüsho inü mihtsürü alala kheak tangzüngkhi thsümünimde ju yihshak. 11Jumonü ju nimung ha thsümünim, tüsho namfimihnu yinzüyindorü I kheak kheahde larübonü ha Atungpuh yu ah de mükheah. 12Judüki inü arü ki tha, “Ha nüsa ki alungki nangde lasho, I mihkhah dün jihang; tüshe jude yungsho, arübo zoang.” Jumonü arünü I mihkhah dün shotoyinchi 30 jih. 13Jushu Atungpuhnü I ki tha, “Ha akhamde amo akhukhi ju rahpung-yam ching yukang.” Jumonü inü shotoyinchi 30 ju Atungpuh yam rahpung-yam ching yuk. 14Jushu inü mahnepü Arihako tso ju Juda tüsho Israel keonione dükeak arihakokhi thsümünimde yihshak.
15Judüki Atungpuhnü I ki tha: Kheaküshe müthülünkhi namfimihnu neakrü kukrukbo luang. 16Tümüde kheakü lomi ching inü, adükheakkhi müküm, yungsho rümde atsahkhi müyim, yungsho yurikhi müthsüngu, yungsho ashih kihkhi müyimkip, tüshe ashih kihkhi shih tsühde, arü biuo she achakrüpshihpü lakhi namfimihnu neakrü khülang asürüshihchoh. 17Namfimihnu boto bahyukrü, müthülünkhi namfimihnu neakrü are! Nukshangnü api bin tüsho amük tsülim thsümünimshang! Api bin shahde keahkhishang, api mük tsülim shahde tukabahshang!
Currently Selected:
ZEKARIA 11: YIMCBSI
Highlight
Share
Copy
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
