ZEKARIA 12
12
Arübe ching Jirusalem Bekhitpü
1Müchityu khülang. Israel dünkheak Atungpuh yu: Atungpuhnü ha thachoh, shepünü thüningbo thoshang tüsho alomi khimtan tüsho ju ching mihtsürü kheak me lashih: 2Kheahang, inü Jirusalem ju mühi mihtsürü alala thsungkheaknü amüshangbe pung khülang kamshihpü lah; Jirusalem yanchoki Juda she ayanbah. 3Ju nimung mihtsürü alala thsungkheak inü Jirusalem ju lung amülang kamshihbah; ha shuhkihrü alala nihbuh zangrü khitode ayuribah. Tüsho lomi trükshih alalanü rukhüh thsübah ha azhihde arübah. 4Atungpuhnü thachoh, ju nimung khora aban thsününü tüsho aberübo ayingyingkhinü ashikbah. Tüshe inü mihtsürübo khora aban kheak mük tukshihchoki, inü Juda yamkhün kheak a mürüngkihde kheahde alabah. 5Judüki Juda gukbonü arü mulong ching thabah, “Jirusalem ching larü a Wuto Atungpuh arü Thrünpuh hode sühmüh lah.”
6Ju nimung ching inü Juda gukbo ju sangrhungkihkhi kheak mophüh nangde, hineang bolung motru nangde akamshihbah; tüsho arünü tsülim tüsho huzulim mükamde alakhi mihtsürübo aniubah, judüki Jirusalem a anihbe lapung ching lalobah.
7Tüsho Atungpuhnü akhuhde Juda lapungbo kilim akukkhi jihbah, junangde David yamkhün müretah tüsho Jirusalem ching lakhi müretah ju Juda kumung kheak atobe müla. 8Ju nimung ching Atungpuhnü Jirusalem ching larü tsungdobah, junangde arü bolung sühmüh mülarü ju nimung David nangde alabah, tüsho David yamkhün ju arü müngüh Atungpuh yunirü nangde Thrünpuh ruk labah. 9Tüsho ju nimung Jirusalem azhihde arükhi trükshih alala dükheakshihpü inü ayimbah.
10Tüsho inü I mihmuzho tüsho amushukhi me khülang David yamkhün tüsho Jirusalem ching larü kheak dungkihbah; junangde arü achinkhitshihkhi khürü kheak kheahchoki, arünü api thsungkheak khürünü tsührü khülang lang alakhi thsungkheak tüzhokhi nangde atüzhobah tüsho adüjirü kurungkheak mitripkhi nangde düsüknimde atripbah. 11Ju nimung Jirusalem ching tüzhokhi ju Megiddo dükhün ching Hadad-rimmon thsungkheak tüzhokhi ruk tode alabah. 12Lomi ching, yamkhün abannü nihbuh zangrü tüzhobah; David yamkhün betsührü tüsho arü niuberübo; Nathan yamkhün betsührü tüsho arü niuberübo; 13Levi yamkhün betsührü tüsho arü niuberübo; Shimeirü yamkhün tüsho arü niuberübo; 14tüsho aningkhi betsührü alala, tüsho arü niuberübo.
Currently Selected:
ZEKARIA 12: YIMCBSI
Highlight
Share
Copy
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
