ZEKARIA 7
7
Khümkeak yungde, Thiyuro tüsho Mihmüthsüm
1Kiulongthsüpuh Darius kam phüyipü ching, Kislev khinu tuku nimung phüyi nipü Atungpuh yu Zekaria kilim arü. 2Kheakü Bethel mihtsürübonü Atungpuh ki mushushihpü Sharezer le Regemmelek tüsho arü mihtsürübo yüshih, 3tüsho Wuto Atungpuh yam amükeamrü tüsho wukihrübo ki keokhipü, “ Inü kam ahihdo thsükhi nangde khinu phüngü ching tüzhode khümkeak thsüba shi?” 4Judüki Atungpuh yu I ki arü: 5Lomi mihtsürü alala tüsho amükeamrübo ki thaang: Nüsanü ha kam nerü khinu phüngü tüsho thüne ching khümkeak thsükhi tüsho tüzhokhi ju I thsungkheak lakhea de? 6Tüsho küyimki nüsanü atsühkhea tüsho ayungkheanü, nüsa thsungkheak tsühyungkhi yung de? 7Jirusalem mühide kiutobo bede lalim tsüde alachoki, tüsho Negeb le Shephela ching laabahshu harü Atungpuh yubo ha adüso wukihrübonü azhiyukkhi yung de?
8 Atungpuh yu Zekaria ki arü: 9Wuto Atungpuh ha thachoh: Thiyuro mahkhap rhimoang, khülangnü khülang ki amuzho tüsho mihmüthsüm huhang; 10khimoberü, mürerü, khiungkerü, yungsho zhochihrü düjuno; tüsho khülangnü khülang azhihde nüsa mulong ching amütsü lümkhi düthsü. 11Tüshe arünü anipü thsunglo, tüsho chungthülangdo arü düthsün anguh tüsho manipü arü nükhün yihdo. 12Adüso wukihrübo hode Wuto Atungpuh menü arüshihkhi yakzan tüsho thiyubo manipü arü mulong müküpde kam. Jumonü bukakhiukkhi ato Wuto Atungpuh kilimnü arüshih. 13Inü arü jichoki, arünü manikhi nangde, küyimki arünü ajikheanü inü manijih, Wuto Atungpuhnü thachoh, 14tüsho inü arübo arünü mümükheahkhi trükshih alala bolung chinthrümnü hiumüzütshih. Hanangde arünü abahjihkhi lomi ju zhika lakheah, junangde shenü yüla arüla müthsü, tüsho alomi atsü ju zhika lakheah.
Currently Selected:
ZEKARIA 7: YIMCBSI
Highlight
Share
Copy
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
