ZEKARIA 6
6
Khora-lolungbe Phüyi Michih
1Tüsho kheaküshe inü abinkih-a kheah tüsho müwayinchi-müzüng mahne chingnü khora-lolungbe jing akhiukde ngü. 2Akhuhbe lolungbe ching khora amürümbo lakheah, mahnepü lolungbe ching khora amürakbo, 3asampü lolungbe ching khora amüyebo tüsho aphüyipü lolungbe ching khorabo aneakjik lakheah. 4Judüki inü I ki asukachihbuh yunirü ki keo, “ I tungpuh, harü ha tümü a?” 5Yunirünü I ki alo, “Harü ha lomi alala TU N GPU H mikinü arükhi yinmi mebo phüyi ah. 6Khorabo amürak lakhi lolungbe ju dukulim lomi lim yü, amüyebonü aniyüzahlim lomi thrip yü, tüsho aneakjikbonü düjinglim lomi thrip yü.” 7Küyimki aneakjikbo akhiukkhea, arünü ayüpü tüsho lomi rhua kheahpü marümkheamkhukde kam. Tüsho apinü tha, “ Yüang, alomi rhuakheahang.” Jumonü arünü alomi rhuakheah. 8Judüki apinü I ki zhi, “ Kheahang, dukulim lomi thrip yürünü düjinglim lomi ching I me sühakhim ching lashihlah.”
Jihusua Kuthran
9 Atungpuh yu I ki arü: 10Babilon chingnü alungkhi ramtsorü Hildai, Tobija tüsho Jedaia kheaknü shotoyinchi tüsho suna luang; tüsho ju nimungnü Zephania tsührü Josia yam ching yüang. 11Shotoyinchi tüsho suna luang tüsho kuthran thsüang, tüsho Jehozadak tsührü Achangbe Amükeambuh Jihusua ku kheak yihkihjang; 12api ki thaang: Wuto Atungpuhnü ha thachoh: Ha ching mihtsürü khülang amung Akhah lah: tümüde apinü nihbuh dangpung ching akhah dübeakde wukhiukbah, tüsho apinü Atungpuh arüngyam thsübah. 13Atungpuh arüngyam thsüpü ju api labah; apinü kiulongthsü wüntrekhi hanbah; tüsho binbahle api kiulongthsübinkiu kheak yakzan shuhbah. Api kiulongthsü-binkiu ki ane dükeak mungtsü anikhitkhi amükeamrü khülang labah. 14Tüsho kuthran ju Atungpuh arüngyam ching mümihpü khülang nangde Heldai, Tobija, Jedaia, tüsho Zephania tsührü Josia arünü akümbah.
15Sherübo limshude lanü arübah tüsho Atungpuh yam thsüpü rungbah; tüsho Wuto Atungpuhnü I ju nü kilim thiyikheah de nünü amükheahbah. Nünü düshihde Atungpuh nü Thrünpuh yu anisho ha adünjibah.
Currently Selected:
ZEKARIA 6: YIMCBSI
Highlight
Share
Copy
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
