ZEKARIA 13
13
1Ju nimung David yamkhün tüsho Jirusalem ching larü thsungkheak arü neak tüsho mümüsühkhi chingnü arü müsühkhitpü kenü khülang yahshungbah.
2Wuto Atungpuhnü thachoh, ju nimung inü lomi chingnü sangthsübo mung dükheakshihbah, junangde kheaküa arü mülümkhit; tüsho inü lomi chingnü wukihrübo le mümüsühkhi me yihkhitbah. 3Tüsho mürangkhüh wukihrü khürü akhiuksho, arü abuh tüsho arü zübekhi berübonü athabah, “ Nü ashebah, tümüde nünü Atungpuh mung ching akeangyu asukchoh;” tüsho arü züberü arü abuh tüsho berübonü arünü müchitchoki arü chinkhitshihbah. 4Ju nimung wukihrübo ju arünü müchitchoki mihbüm aban nihbuh michih dünkheak achihbah; arünü mülapyukpü thsüde anamkihkhi khim müyih, 5tüshe arü abannü athabah, “ I wukihrü yung, I thulu thsürü khülang ah; tümüde I rhangdung amuyung thulu thsüde arükheah.” 6Tüsho khürünü api ki, “ Nü khüh kheak ha tümü mübo a le?” de thasho, apinü alobah, “ I müyamrübo yam chingnü ayihkhukkhi mübo ah.”
Thrünpuh Namfimihnu Neakrü Laksahpü Thiyukhüm
7“ O nukshang, I yo namfimihnu neakrü azhihde asürang, I lung larü mihtsürü azhihde,” Wuto Atungpuhnü thachoh. Namfimihnu neakrü shikang, junangde namfimihnubo hiumüzütbah; inü aninibo azhihde I khah rholobah. 8Lomi athrünkhi ching, Atungpuhnü thachoh, shihcham mahsam ching mahne shekhambah, tüsho shihchamkhüh labah. 9Tüsho ha shihchamkhüh ju inü mo ching yukbah, khürünü shotoyinchi changkhitkhi nangde arü changkhitbah, tüsho suna taka kheahkhi nangde arü taka kheahbah. Arünü I mung jibah, tüsho inü arü ki alobah. Inü athabah, “Arü I mihtsürü ah;” tüsho arünü athabah, “Atungpuh ju isa Thrünpuh.”
Currently Selected:
ZEKARIA 13: YIMCBSI
Highlight
Share
Copy
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
