ZEKARIA 14
14
Jirusalem tüsho Trükshihbo
1Kheahang, nüsa kheaknü yankhia lukhi nüsa bolung chama lupü Atungpuh nimung arüchoh. 2Tümüde inü trükshih alala Jirusalem azhihde keochihpü bemukhungbah, tüsho kiuto lubah tüsho thüyambo lubah tüsho aliberübo reangkihde thsümüchibah; mihtsürü niukshakkhüh ramtso ching yübah, tüshe aningkhi mihtsürü kiuto chingnü müdükheak. 3Judüki Atungpuhnü keochih nimung apinü keochihkhi nangde khuhto ching yübah tüsho jurü trükshihbo bede keochihbah. 4Ju nimung api jing Jirusalem miki aniakhiuklim kheak lakhi Oliv Müzüng kheak zhipbah; tüsho Oliv Müzüng ju aniakhiuklimnü aniyüzahlim jindükhün khide mülihde mahne kamde achambah; junangde müzüng chamkhüh ju dukulim tüsho püpü chamkhüh ju düjinglim anguhbah. 5Tüsho nüsanü Atungpuh müzüng jindükhün hode atsobah, tümüde müzüngbo dükeak jindükhün ju Azal khiungbah; tüsho nüsanü Juda kiulongthsüpuh nimungbo ching muliuyuk chingnü atsokhi nangde atsobah. Judüki Atungpuh I Thrünpuh lung amüsührü alala bebah arübah.
6Ju nimung athsak yungsho thüwün müla. 7Tüsho ju ching mutukzhakde animung labah (Atungpuhnü ha mükheahlah), animung tüsho are müla, tümüde azhing kim ching ayin labah.
8Ju nimung Jirusalem chingnü rhangdung kebo bukkhitbah, chamkhüh aniakhiuklim keto lim tüsho chamkhüh aniyüzahlim keto lim yübah; ha tsüngkam ching le muzhu ching mutuklode alabah.
9Tüsho Atungpuh ju lomi alala kurungkheak kiulongthsüpuh kambah; ju nimung Atungpuh khülang tüsho api mung khülang labah.
10Alomi athrünkhi, Geba chingnü Jirusalem düjinglim Rimmon khiungde adükhün kambah. Tüshe Jirusalem a Benjamin chipiripit kheaknü adüso ripit dangpung, Amühit Chipiripit khiungde, tüsho Hananel Aheangsadam kheaknü kiulongthsüpuh yukhu nitpung khiungde adüpheak labah. 11Mihtsürü ju ching labah, tümüde kheaküa küyimkishe athsümünimpü makhu; Jirusalem ju kuram tsükhi ching labah.
12Ha Jirusalem azhihde thirithsürü mihtsürü alala kheak Atungpuhnü ashikpü arüm-tukthsü lah: arü jing kihde alachoki arü yin shuhbah; arü mükbo tüsho arü mulobo shuhabahbah. 13Ju nimung thsünü ato Atungpuh kilimnü arü kheak yükihbah, junangde mihbüm abannü nihbuh yamhingrü khah kheak tholobah, tüsho khülang khahnü püpürü kheak azhihachihde wusubah; 14Judanü she Jirusalem bede keochihbah. Tüsho mühirü trükshih alala lakhit hanmukhungbah–suna, shotoyinchi, tüsho khimmihbo suhdahde alabah. 15Tüsho hadürü arüm-tukthsü ju khorabo, khoranunu, kemel, donki, tüsho binpung ching tümüpürü shiwüh labanü arü kheak yükihbah.
16Judüki rhangdung larü trükshih alala Jirusalem azhihde arürünü kam aban Wuto Atungpuh , kiulongthsüpuh kingaünpü, tüsho arüngkhimyam thünio mungpü wutubah. 17Mürangkhüh alomi yamkhün khürünü Wuto Atungpuh , kiulongthsüpuh kingaünpü Jirusalem lim muwutusho, arü kheak tsüng marüde alabah. 18Tüsho Ijiprünü wutubah shihcham mulusho arü kilim tsüng marüshih; arüngkhimyam thünio mungpü muwutukhi trükshihbo kheak Atungpuhnü thsümüchikhi arüm-tukthsü arü kheak labah. 19Harü ha Ijip thsümüchi tüsho arüngkhimyam thünio mungpü muwuturü trükshih alala thsümüchi labah.
20Ju nimung khora yinchibo kheak dokih-a labah, “Atungpuh Amüsüh thsang.” Tüsho Atungpuh yam ching dükihthüra phühbo ju kingaün sadam miki amüsüh phurusükbo nangde amüsüh labah; 21tüsho Jirusalem le Juda ching dükihthüra phüh aban Wuto Atungpuh kilim amüsüh labah, junangde laksah-a kingaünrü alalanü arübah kingaünpü lubah. Tüsho ju nimung kheaküa Wuto Atungpuh yam ching yinzüyindorü mülade akambah.
Currently Selected:
ZEKARIA 14: YIMCBSI
Highlight
Share
Copy
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
