ROM 8

Me ching Rhangdung

1Jumonü kheaküa Jisu Khrista ching larü thsungkheak abahyukkhi müla. 2Tümüde Jisu Khrista ching Me rhangdung yakzannü neak yakzan tüsho ashe chingnü I zuzu kamshih. 3Tümüde mihnü yiuhyiuhde akamshihkhi hode yakzannü müthsükhukkhi, neak kingaün jihpü neak larü nangde api tsührü thiyide, neak bahyukpü Thrünpuhnü rhimo, 4junangde shih yande yung tüshe Me yande atsahrü, yakzannü thiyurolungki yihnüpü lakhi isa kheak dünjibah. 5Tümüde sherü shih ayannü lachonü arü lümkhi shih kheak lachoh, tüshe sherü Me ayannü lachonü arü lümkhi Me kheak lachoh. 6Shih kheak mulong zokhi ju ashekhi, tüshe Me kheak mulong zokhi ju rhangdung tüsho mungtsü. 7Tümüde shih kheak mulong zokhi ju Thrünpuh kilim thiriri; junü Thrünpuh yakzan ki mümükhümkhuk, yungsho junü müthsükhuk; 8tüsho shih ching larünü Thrünpuh masühshihkhuk.

9Atsütsü Thrünpuh Me nüsa kheak lasho, nüsa shih ching müla tüshe me ching lah. Shepü Khrista Me mülanü api yo yung. 10Tüshe nüsa kheak Khrista lasho, neak hode nüsa pangbo shea lalashe, thiyurolungki hode nüsa mebo arhang lah. 11#1 Kor 3.16Ashe chingnü Jisu bemusubuh Me nüsa kheak lasho, ashe chingnü Jisu Khrista bemusubuhnü nüsa kheak lakhi Me hode ashepü lakhi nüsa pangbo kilim rhangdung jihbah.

12Jumonü keoniorübo, isa mah larü ah tüshe shihnü akünkhi lapü lim yung. 13Tümüde nüsanü shih ayannü lasho nüsa ashebah, tüshe nüsa Me hode pangnü arhimomihkhibo sheshihsho, nüsa arhang labah, 14tümütüsho Thrünpuh Menü aberü alala Thrünpuh tsührübo ah. 15#Gal 4.5-7#Mk 14.36; Gal 4.6Tümüde nüsanü trede atsopü azhorü me müleangkhi, tüshe tsührü thsüpü me leangkhido. Api hode isanü zhichoh, “Abba,#Aramik yunü Abuh. Abuh!” 16Me junü isa Thrünpuh tsührü ah de isa me kheak thiyumütsan thsüchoh, 17tüsho isa ju tsührübo a sho, yamrüplurüp lurü ah–api müretahkhi ching isanü shihcham lupü thsüde isanü api thsünükhi shihcham lusho, Thrünpuh yamrüplurüp lurü tüsho Khrista lung rukhüh yamrüplurüp lurü thsübah.

Arübe Müretahkhi

18Kheakü isa thsünükhibo ha isa ki akhiukpü lakhi müretah lung akepü müthülün de inü lümchoh. 19Thrünpuh tsührübo thsungkheak amikheak akhiukpü thrüna lakhi alalanü mulong dukde aleanglah; 20tümüde thrüna lakhi ju aküdahnü yung, tüshe Thrünpuh lümkhinü abahyukkhi kamshih; 21tümütüsho thrüna lakhi ju she athsümünim kuhi chingnü Thrünpuh tsührübo müretahkhi zuzu ching bekhitbah. 22Tümüde thrüna lakhi alala zübe-thsünü kheakü khiungde rukhüh ashede arüchoh de isanü mükheahlah. 23#2 Kor 5.2-4Tüsho thrüna lakhi lang yung, tüshe Me akhuh sangaso isabo, tsührübo kampü, isa pangbo rhokhitpü aleangde alunglimnü ashechoh. 24Tümüde ha mulonglam ching isa khümkhitkheah. Angükhi mulonglam ju atsütsü mulonglam yung, tümüde apinü angükhi thsungkheak shepünü mulonglamcho? 25Tüshe amüngükhi thsungkheak isanü mulonglamsho ju thsungkheak isanü arümde aleangchoh.

26Junangde isa yiuhyiuhde alachoki Menü isa rungchoh; tümüde küde tamkhüntamnübanü isanü mümükheah; thiyubonü müthakhukbe ashede Me küdahnü isa thsungkheak Thrünpuh ki mushujihchoh. 27Tüsho mihtsürü mulong yimbuh Thrünpuhnü Me lümkhi mükheahlah, tümütüsho Thrünpuh lümkhi yande amüsührü thsungkheak Menü mushujihchoh.

28Api lümkhi yande jia larü, apinü amuzhorü ki lüpdükhi ching Thrünpuhnü atsü thsungkheak rhimochoh de isanü mükheahlah. 29Sherü Thrünpuhnü mokhita lanü, api tsührü nangde akampü büthsüde zochoh, junangde keoniorü ahihdo bolung api tsührü ju akhuhbuh thsübah. 30Tüsho apinü mokhita larü apinü ji; tüsho apinü jia larü alim mütsanjih; tüsho apinü alim mütsanjih-a larü apinü müretahshih.

Jisu Khrista ching Thrünpuh Amuzho

31Dale tüsho isanü ha küde athaba? Thrünpuh ju isa thsungkheak a sho, isa azhihrü she la? 32Shepünü nihbuh tsührü müsühmühde isa alala dünkheak jihabahkheanü, apinü lüpdükhi isa kilim müjihba de? 33Thrünpuhnü amokhitrü azhihde shepünü amüdampü hande arüba? Alim mütsanbuh ju Thrünpuh ah; 34shepünü amülim jihba? Juju shebah arhang kamlokhi, Thrünpuh khah tsülim lakhi isa thsungkheak mushujihbuh Jisu khrista a shi? 35Shepünü Khrista amuzho chingnü isa chamkhiba? Thsümütsü-ato, lümthsünü, thsümüchi, khümzung, bünkeang, atrebe yungsho thsühnuk a shi? 36Ha thrüta lah,

“Nü dünkheaknü isa nimung amuyung laksah;

isa ju alaksahpü lakhi namfimihnunu nangde khejih.”

37Yung, harü alala ching isa muzhobuh hode isa ju akuk ngürü kheaknü alü ah. 38Tümüde inü amütsankhi ju ashepü, rhangdung, yunirü, yakzanshuhrü, kheakü lakhi yungsho arüpü lakhi, 39achang, asük, yungsho thrüna lakhi alala ching tümünü she Atungpuh Jisu Khrista amuzho chingnü isa müchamkhikhuk.

Currently Selected:

ROM 8: YIMCBSI

Highlight

Copy