ROM 7

Yamkhün Kamkhi chingnü Amütsan

1I keoniorübo, inü nüsa ki thapü lakhi tsükjide nüsanü anikhitbah, tümütüsho nüsa alalanü yakzan dünkheak mükheahlah. Arü la khiungde yakzannü mihtsürü kurungkheak yakzan shuhchoh. 2Junangde arhangkhi liberü ju api la khiungde aniubuh kilim yakzannü rhüka labah; tüshe api shesho, api kilim rhüka lakhi yakzan chingnü alibe zuzu kamchoh. 3Junangde aniubuh lachoki alibenü püpürü thrürü lung lasho alibe ju müzammüramrü de ajibah, tüshe aniubuh sheabahsho ju yakzan chingnü alibe zuzu labah, tüsho alibenü püpürü thrürü ki rhangrhang she alibe ju müzammüramrü yung.

4Junangde, I keoniorübo, Khrista pang hode nüsa yakzan ching she, jude athsükhinü isanü Thrünpuh thsungkheak aso asopü thsüde ashekhi chingnü asürübuh kilim nüsa khülangnü khülang yo labah. 5Küyimki isa shih ching lakheanü, yakzannü thurumusukhi neak ching asühbe isa pangbo ching rhimode la, junangde isanü ashepü aso asoshih. 6Tüshe kheakü isa rhüka lakhi ching shekhinü, yakzan chingnü zuzu kam, junangde thrüta lakhi awün ching yung tüshe Me aso ching isanü tankihchoh.

Yakzan tüsho Neak

7Dale tüsho isanü tümü thaba? Yakzan ju neak a de? Jude yung! Tütüshe yakzan hode yungkhülaa inü neak mümükheah-a labah. Yakzannü, “Nünü düyihnelune,” de müthakhülaa inü mümükheahpü lakheah. 8Tüshe thiyuzüng hode neaknü I kheak yihnelune lakhi mungji alala lahkhitpü kim ngü. Tümüde yakzan kheaknü büthsüde neak ju ashekhi lah. 9Khülangki I yakzan chingnü chamkhibah rhangdung lakheah, tüshe küyimki thiyuzüng arükhea, neak ju arhang kamlo tüsho I sheabah; 10rhangdung handarüpü lakhi thiyuzüngnü atsütsü ashepü handarükhi inü ngü. 11Tümüde neaknü thiyuzüng ching kim atsü ngüde I mülapyuk tüsho junü I laksah. 12Jumonü yakzan ju amüsüh tüsho thiyuzüng ju amüsüh, thiyuro ju atsü ah.

13Dale tüsho küpü atsüanü junü I kilim ashepü hande arükhea shi? Jude yung! Tümü atsüanü ju hode neaknü I kheak ashebe rhimo, junangde neak ju neak ah de tüsho thiyuzüng hode neak ju amütsübe neak de ahuhpü lakheah.

Mihtsürü kheak Marüpachih

14Yakzan ju melim ah de isanü mükheahlah; tüshe I a neak khüp yinkhi me-mülakhi ah. 15#Gal 5.17Inü I rhimo manikhit. Tümüde inü akünkhi inü mürhimochoh, tüshe inü athraneankhi inü rhimochoh. 16Kheakü inü amükünkhi inü rhimosho, yakzan ju atsü ah de inü mulungchoh. 17Judüasho ju inü yungde I kheak lakhi neaknü rhimochoh. 18I kheak, I mih ching atsü tümü müla de inü mükheahlah. Inü alim rhimopü lümchoh, tüshe ju mürhimokhuk. 19Tümüde inü künde alakhi atsü inü mürhimochoh, tüshe inü rhimode alakhi ju inü amükünkhi amütsü ah. 20Kheakü inü amükünkhi inü rhimosho, ju inü yungde I kheak lakhi neaknü rhimochoh.

21Jumonü inü alim rhimopü mulongchoki amütsü khah ki lakhi ju yakzan ah de inü ngüchoh. 22Tümüde I pang alung chingnü Thrünpuh yakzan kheak inü asühchoh, 23tüshe I lümkhi yakzan bede thirithsükhi I pang shihcham ching yakzan püpü inü ngüchoh tüsho I ju I pang shihcham ching lakhi neak aramrü kamshihchoh. 24I a küdükhüh masühkhi mihtsürü a! Shepünü ha ashekhi pang chingnü I bekhitba? 25Atungpuh Jisu Khrista hode Thrünpuh ki makshe jihang! Junangde, I lümkhinü a Thrünpuh yakzan tankihchoh, tüshe I shihnü a neak yakzan tankihchoh.

Currently Selected:

ROM 7: YIMCBSI

Highlight

Copy