ROM 9
9
Thrünpuh tüsho Api Mihtsürü
1Khrista ching inü thiyuro thachoh, inü akeangyu mütha; Amüsüh Me ching I lümkhinü thiyumütsan jihchoh, 2junangde I mulong ching mulong rozhak ato tüsho mükheamkhi thsünü lah. 3Tümüde I keoniorü, I buhtsührü, I mihtsürü dünkheaknü I muthrumüneana tüsho Khrista kheaknü chamkhia lah de inü lüm. 4Arü ju tsührü kamkhi müretah, tangzüng, yakzan jihkhi, kingaün, tüsho alokhikhi lakhi ah; 5arü ju Ibri jipürübo kheaknü atrükkhitkhi; tüsho mihtsürü ayannü Khrista ju arü mihtsürü. Alala kurungkheak yakzanshuhrü Thrünpuh lünnü shishang! Amen.
6Tüshe ha Thrünpuh yu akuk müngükhi yung. Tümüde Israel kheaknü atrükkhitkhi alala Israelrü yung, 7tüsho api tsühsoniuso thsümonü alala Abraham tsührü yung; tüshe Isak hode nüsa tsühsoniusobo mung jibah. 8Ha amütsan ju Thrünpuh tsührübo a alomi shih tsührübo yung, tüshe alokhikhi tsührübo ju tsühsoniusobo khelah. 9Alokhikhinü athakhi ju ha lah, “Ha kim ching I arülobah tüsho Sara tsührü khülang labah.” 10Tüsho ju lang yung, tüshe küyimki mihtsürü khülang, isa jipürü Isak hode Rebeka tsührübo lakhea, 11Thrünpuhnü amokhitkhi lümkhi mutukzhakde ayüpü thsüde arü müzübeyia lalashe tüsho atsü yungsho amütsü tümü mürhimoyia lalashe, rhimobo hode yung tüshe apinü ajikhinü, 12alibe ki tha, “Azopünü akheambuh tankihbah.” 13Ha thrüta lah, “Inü Jakob muzho, tüshe inü Esau thranean.”
14Dale tüsho isanü tümü thaba? Thrünpuh kilim jakkheahkhi la shi? Jude yung! 15Tümüde apinü Mosa ki tha, “Inü mihmüthsüm larü kheak mihmüthsüm labah, tüsho inü amuzho larü kheak amuzho labah.” 16Jumonü mihtsürü lümkhi tüsho mürangkhi kheak yung tüshe Thrünpuh mihmüthsüm kheak lah. 17Tümüde amüsühyunü Pharao ki thachoh, “Alomi alala ching I mung zhiyukshihpü thsüde nü kheak I wu huhpü inü nü asürüshih.” 18Junangde apinü amulongrü kheak mihmüthsüm lah, tüsho apinü amulongrü mulong müküpshihchoh.
Thrünpuh Bukakhiukkhi tüsho Mihmüthsüm
19Tüshe nüsanü I ki thabah, “Tümüde apinü arükchih yimkhitcho? Shepünü api lümkhi reanglokhukla?” 20Tüshe Thrünpuh ki alokhukpü thsüde mihtsürü khülang ju nüsa she a? Azünkhinü azünbuh ki, “Tümüde nünü I hade azünkhea?” de athaba de? 21Phühdamrünü alo neamkhi rukhühnü khülang adungto tüsho püpü ju yancho thsungkheak rhimopü alim müla de? 22Tüsho Thrünpuhnü tümü rhimokheanü dükdü ah. Apinü api bukakhiukkhi tüsho api wu huhpü kün. Tüshe athsümünimpü lakhi api bukakhiukkhi kukruk kheak apinü khide arümkheam. 23Tüsho apinü api müretah leangkhipü thsakhamkhi api mihmüthsüm kukruk ju apinü isa kheak dungkihkhi muzhomopungkhi api müretah akhiuka huhpü mulong. 24Tümüde isa ju Jihudarü chingnü lang yungde khiungkerü chingnü she apinü ajikhi mihtsürübo ah. 25Apinü Hosea ching thachoh,
“Sherü I mihtsürü müthsükheanü inü
‘I mihtsürü,’ de ajibah tüsho inü mümuzhobe ki, ‘Inü amuzhobe,’ de ajibah.”
26“Tüsho arü ki, ‘Nüsa I mihtsürü yung,’
de thakhi dangpung ching,
‘Arhang Thrünpuh tsührübo,’ de ajibah.”
27Tüsho Isaianü Israel dünkheak zhi: “Israel tsührübo khekhi ju loyi nangde lalashe, arü aningkhi lang akhümkhitbah; 28tümüde Atungpuhnü alomi kheak api rhimo niokheamde tüsho akheam thsüde arhimobah.” 29Tüsho Isaianü müchit, “Wuto Atungpuhnü isa tsühsoniusobo maningshihkhülaa isa Sodom nangde kama labah tüsho Gomorra nangde alabah.”
Paulnü Israel thsungkheak Tamkhüntamnükhi
30Dale tüsho isanü tümü thaba? Junangde thiyuro-lungki mümüshamrü khiungkerünü akin hode thiyuro-lungki ngüdo; 31tüshe yakzan ching ningkihbah thiyurolungki müshamrü Israelnü yakzan dünjipü ching akuk müngü. 32Tümü thsükhea? Tümütüsho arünü akin hode mümüsham, tüshe rhimo kheak ningkih. Jingmükhelung kheak arü jingmükhe, 33ha thrüta lakhi nangde,
“Kheahang, mihtsürübo jingmükhepü thsüde inü Zion ching lung khülang,
arü keamshihbe lungto khülang zochoh;
tüsho shepünü api kheak kinbanü achih müngüshih.”
Currently Selected:
ROM 9: YIMCBSI
Highlight
Share
Copy
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
