MARK 10

Niuberü Bahkhi dünkheak Thsangyukhi

(Mt 19.1-12; Lk 16.18)

1Judüki apinü ju chingnü tsahmusu tüsho Jordan thripkhühnü Judea lomi ching arü. Mihtsürübo api ki mukhungde arü, tüsho püpüki nangde apinü arü thsangyu.

2Pharisirübo arü tüsho api rükakide keo, “Mihtsürü khülangnü nihbuh niuberü bahpü yakzan la de?” 3Apinü arü ki alo tüsho tha, “Mosanü nüsa ki tümü yukhüm jihkhea?” 4#Mt 5.31Arünü tha, “Mosanü mihtsürü ki abahkhi jingyanbe thrüta jihbah alibe tsoshihpü mülüjih.” 5Tüsho Jisunü arü ki alo tüsho tha, “Nüsa mulong müküpkhinü apinü nüsa khilim ha yakzan thrütkheah. 6Tüshe athrün atan chingnü Thrünpuhnü athrürü tüsho aliberü thrün. 7Ha dünkheaknü athrürü khülangnü abuh tüsho abe zojihbah tüsho api niuberü lung arihbah, 8tüsho ane shihphü khülang kambah; jumonü kheaküa ane mahne yung tüshe shihphü khülang ah. 9Jumonü Thrünpuhnü tümü thsürushihdünü, mihtsürünü düchamachih shi.”

10Tüsho ajingyanrübonü thüyam ching judürü api ki keokhi. 11#Mt 5.32; 1 Kor 7.10,11Jumonü apinü arü ki tha, “Shepünü nihbuh niuberü bahcho tüsho püpürü luchonü anihbe azhihde müzammüram yihbeakchoh. 12Tüsho aliberü khülangnü nihbe niubuhrü bahbah püpürü ki rhangsho, alibenü müzammüram yihbeakchoh.”

Jisunü Azürü Anini Müngühjihkhi

(Mt 19.13-15; Lk 18.15-17)

13Judüki arünü api kilim apinü aqiushihpü bedarü; tüshe jingyanrübonü arü bedarürü thürüh. 14Tüshe küyimki Jisunü ju ngükhea, api khide masühde kam tüsho arü ki tha, “Azürü aninibo I kilim arüshang, tüsho arü düyanlo; tümütüsho Thrünpuh kiulongthsü harü yo ah. 15#Mt 18.3Atsütsü inü nüsa ki thachoh, shepünü azürü anini nangde Thrünpuh kiulongthsü müleangkhibanü ju ching küyimkishe müyüzah.” 16Apinü arübo kapa lubah arü kheak khah nim, tüsho arübo müngühjih.

Alarü Mihtsürü

(Mt 19.16-30; Lk 18.18-30)

17Jisu api limro ching yüde lachoki, mihtsürü khülang alihde arübah amiki khukning, tüsho keokhi, “Thsangyurü atsü, akheam müla rhangdung yamrüplurüp lupü inü tümü rhimobea?” 18Jisunü api ki alo, “Tümü thsükhi nünü I ki atsü de jicho? Thrünpuh kheak hode sheshe atsü müla. 19Nünü thiyuzüngbo mükheahlah: Müzammüram düyihbeak, dülaksah, dahüh, arükchih thiyumütsan düthsü, dümülapyuk, nü buh tüsho nü be wüntreang.” 20Tüsho apinü alo, “Thsangyurü, harü alala I azüchokinü inü rhimodo.” 21Judüki Jisunü api kheahbah muzho, tüsho tha. “Nü khülangnü maban: Nü limro ching yübah nü lakhi alala yinang tüsho zhochihrü kilim jihang, tüsho yinmi ching nü rahpung labah; tüsho arang, I yanang.” 22Tüshe ha yu hode api mi mitingde kam, tüsho mulong rozhakde tsoabah, tümüde api lakhit ato lakheah.

23Judüki Jisunü mükamde kheahbah jingyanrübo ki tha, “Alarünü Thrünpuh kiulongthsü ching yüzahpü küdükhüh she achak a!” 24Tüsho jingyanrübonü api yu dünkheak müyinsah. Tüshe Jisunü arü ki thalo, “Azürübo, lakhit kheak kinrünü Thrünpuh kiulongthsü ching yüzahpü küdükhüh achak a! 25Alarü mihtsürü khülangnü Thrünpuh kiulongthsü ching yüzahpü kheaknü a kemelnü dübean-ku ching hokhi athülihbe ah.” 26Tüsho arünü khide müyinsahde arü bolung thaachih, “Judüasho, shepü khümkhitba?” 27Tüshe Jisunü arü kheahde tha, “Mihtsürübo thsungkheaknü ha amukukbe, tüshe Thrünpuh thsungkheak a jude yung; tümüde Thrünpuh thsungkheak a alala akukbe lah.” 28Judüki Peternü api ki thapü tankih, “Kheahang, isanü alala bahdo tüsho nü yando.” 29Jumonü Jisunü alojihde tha, “Atsütsü inü nüsa ki thachoh, I tüsho thiyusheakatsü dünkheaknü thüyam yungsho khiungmungrü yungsho chiniurü yungsho abuh yungsho abe, yungsho niuberü yungsho tsührübo yungsho alobo bahjihrü she müla, 30arübo thüyam, khiungmungrü, chiniurü, berü, tsührübo, tüsho alobo thsümüchi lade, ha lün tüsho arüpü lakhi, akheam müla rhangdung ching chinü alü thsükhi müleangkhi. 31#Mt 20.16; Lk 13.30Tüshe akhuhrü ahihkhüh ashurü kambah, tüsho ashurü ahihkhüh akhuhrü kambah.”

Jisunü Api Shepü Mahsam Kipü Thakhi

(Mt 20.17-19; Lk 18.31-34)

32Kheakü arübo Jirusalem wutude limro ching lakheah, tüsho arü müngüh Jisu yüde la; tüsho arünü müyinsah. Tüsho arünü yande ayüchoki trede la. Judüki apinü thürükheak mahne ju anihbuh kheak dünjipü arü ki thapü bemuwuhlo: 33“Kheahang, isa Jirusalem lim wutuchoh, tüsho Mihtsürü Tsührü ju amükeam putungrübo le yakzan thsangyurü kilim thsungyuka jihbah, arünü api bahyuka sheshihbah tüsho khiungkerü kilim jihbah; 34arünü api mükhemükimbah, api kheak rhapde mukhiukkihbah, tüsho api laksahbah. Tüsho mahsam nipü api arhang kamlobah.”

Jakob tüsho Johannü Mushukhi

(Mt 20.20-28)

35Judüki Zebedee tsührübo Jakob tüsho Johan bünenü api ki arübah tha, “Thsangyurü, ikenü tümüpürü keokhibanü nünü ike thsungkheak rhimoshihnelah.” 36Tüsho apinü ane ki keokhi, “Nüke thsungkheak inü tümü rhimoshihnela?” 37Anenü api ki alo, “Nü müretah kiulongthsübinkiu ching ike khülang nü khah tsülim tüsho khülang ju huzulim binpü mülüjang.” 38#Lk 12.50Tüshe Jisunü ane ki tha, “Nükenü tümü kheangchonü ju nükenü mümükheah. Inü ayungkhi pung nükenü ayungkhukba de, tüsho I baptikhi yande nükenü baptikhukba de?” 39Tüsho anenü api ki alo, “Ikenü kuklah.” Tüsho Jisunü ane ki tha, “Nükenü inü ayungkhi pung yungpü tüsho I baptikhi yande baptipü kuklah; 40tüshe I khah tsülim tüsho huzulim binpü a inü amülübe yung, tüshe sherü thsungkheak thsakhama lanü jurü thsungkheak ah.” 41Tüsho küyimki jingyanrü thürünü ju sokhea, arünü Jakob le Johan büne kheak khide masühpü tankih. 42#Lk 22.25,26Tüshe Jisunü arübo anihbuh kilim jibah tha, “Khiungkerü yakzanshuhrübonü arü kurungkheak atungrü thsüchoh tüsho arü torübonü arü kurungkheak thiyukhüm-sühmüh ahorichoh de nüsanü mükheahlah. 43#Mt 23.11; Mk 9.35; Lk 22.26Tütüshe nüsa bolung a jude müthsü; tüshe nüsa bolung shepünü ato kamnelanü nüsa yamlarü thsübeah. 44Tüsho nüsa shepünü akhuh kamnelanü alala azhorü labah. 45Tümütüsho Mihtsürü Tsührü she tankihshihpü arükhi yung, tüshe tankihpü tüsho ahihkhüh rhokhitpü api rhangdung jihpü arükheah.”

Jisunü Müktukrü Bartima Thsüngukhi

(Mt 20.29-34; Lk 18.35-43)

46Jushu arünü Jirikho lim arü. Tüsho apinü ajingyanrübo le yimto ato lungnü Jirikho chingnü wukhiukde alachoki, Tima tsührü kakheangrü, müktukrü Bartima limro ching binde alakheah. 47Tüsho küyimki apinü ju Nazarethrü Jisu ah de asokhea, apinü azhipü tankih, tüsho tha, “David tsührü Jisu, I ki muzhoang!” 48Judüki ahihkhühnü api ki malanpü müzünde tha; tüshe apinü alünü zhikhit, “David tsührü, I ki muzhoang!” 49Jumonü Jisunü zhikde zhip tüsho api jiang de tha. Judüki arünü müktukkhi mihtsürü ju jibah api ki tha, “Asühang. Asürang, apinü nü jichoh.” 50Tüsho apinü akhimmih jipa bahbah asürü tüsho Jisu kilim arü. 51Tüsho Jisunü api ki tha, “Inü nü thsungkheak tümü rhimoshihnela?” Müktukkhi mihtsürünü api ki alo, “Thsangyurü, inü ngünelah.” 52Judüki Jisunü api ki tha, “Nü limro ching yüang; nü akinnü nü thsüngudo.” Tüsho judüchokinü apinü ngü; tüsho Jisu yande limro ching yü.

Currently Selected:

MARK 10: YIMCBSI

Highlight

Copy