MARK 9

1Tüsho apinü arü ki tha, “Atsütsü inü nüsa ki thachoh, nüsa ha ching zhiprü khürü a wu chingnü Thrünpuh kiulongthsü arükhi müngüyikia müshede alabah.”

Jisu Jak Müthrikhi

(Mt 17.1-13; Lk 9.28-36)

2 # 2 Pet 1.17,18 Nimung thuruk dunglim Jisunü Peter, Jakob, tüsho Johan bebah müzüng achang kheak wutubah arü zangrü la; tüsho arü miki api jak müthriabah. 3Api khimmih ju zhingzhing, khide müyede, phürüm nangde, alomi ching shenü she jurü ruk mümüyeshihkhukpü thsüde kam. 4Tüsho Mosa bede Elija arü miki akhiuk, tüsho anenü Jisu ki asukachihde alakheah. 5Judüki Peternü alo tüsho Jisu ki tha, “Thsangyurü, isa ha ching lapü tsülah; tüsho isanü khimyam mahsam: khülang nü thsungkheak, khülang Mosa thsungkheak, tüsho khülang Elija thsungkheak thsanü.” 6Tümütüsho apinü tümü thabanü mümükheah, tümüde arü khide trede alakheah. 7#Mt 3.17; Mk 1.11; Lk 3.22Tüsho amo khülang arübah arü hingdo; tüsho amo chingnü düsheak khülang arü, “Ha inü amuzhokhi tsührü. Api ki aniang!” 8Küyimki arünü nahde mükamde akheahkhea, arü lung Jisu kheak hode sheshe müngülode kam.

9Arü müzüng chingnü akide alachoki, Mihtsürü Tsührü ashe chingnü arhang mükamloyikia arünü tümü ngükheanü she ki she müthapü Jisunü arü ki thiyukhümbo jih. 10Arünü api yukhümbo ani, tüshe arü bolung atsangachihpü tankih, “Ashe chingnü arhang kamlopü amütsan tümü a?” 11#Mt 11.14Tüsho arünü api ki keokhi, “Elija akhuhde arübah de tümü thsükhi athrütrübonü thacho?” 12Judüki apinü arü ki alo, “Elija akhuhde arüchoh tüsho alala tsanglungbah. Dale tümü thsükhi Mihtsürü Tsührü khide thsünüpü tüsho abahyukpü thrüta la? 13Tüshe Elija arüabahdo de inü nüsa ki thachoh, tüsho api dünkheak thrüta lakhi nangde arünü api kheak arü lümkhibo rhimodo.”

Azürü Khülang Thsüngukhi

(Mt 17.14-21; Lk 9.37-43)

14Tüsho küyimki api jingyanrübo kilim arükhea, yimto ato khülang arü mükamde, tüsho yakzan thsangyurübonü arü kheak atsangachihde ngü. 15Zukleangnü küyimki arünü api ngükhea, mihtsürü alalanü khide müyinnim, tüsho alihde yübah api ki salüm jih. 16Tüsho apinü yakzan thsangyurübo ki keo, “Nüsanü arü kheak tümü atsangachihcho?” 17Judüki yimto bolung khülangnü alo, “Thsangyurü, I tsührü khülang aduh me lakhi nü kilim bede arüdo. 18Küyimki api rambanü, api alo kheak keamchoh, mün ching rhukrhukchoh, ahü mütrütchoh, tüsho züngkudungchoh. Jumonü api yankhita bahpü inü nü jingyanrübo ki tha, tüshe arünü müyankhitkhuk.” 19Apinü arü ki alo, “O akin mülakhi lün, külokhüh I nüsa lung laba? Külokhüh inü nüsa lung arümba? I kilim bede arang.” 20Judüki arünü api kilim azübuh ju bedarü. Tüsho küyimki me junü Jisu ngükhea, zukleangnü azübuh züngkudungshih. Api alo kheak keam tüsho mün ching rhukrhukde lungphülap. 21Jisunü azürü abuh ki keo, “Hanangde külokhüh lakhea?” Apinü alo, “Azüchokinü ah.” 22“Api sheshihpü ahihkhüh ki mo tüsho ke ching nimyukdo. Tüshe nünü tümükhüh thsükhuksho, isa kheak amuzho laang tüsho isa rungang.” 23Jisunü api ki tha, “Nünü kinsho! Shepünü kinchonü api thsungkheak alala akukpü lah.” 24Judüchokinü azürü abuhnü zhi tüsho chike akhiukde tha, “Atungpuh, inü kinlah; I akin musuhdahkhi rungang!” 25Küyimki Jisunü boto alihde arüde angükhea, apinü amünean me ki thürühde tha, “Nü nükhünpeangkhi tüsho aduh me, inü nü ki thiyukhüm jihchoh, api kheaknü akhiukang tüsho api kheak düyüzahlo.” 26Judüki me junü arungbah zünga adanshih, tüsho api kheaknü akhiuk. Tüsho api ashekhi nangde kam, jumonü ahihkhühnü tha, “Api shea lah.” 27Tüshe Jisunü akhah kheaknü thomusua lu, tüsho api asürü zhip. 28Tüsho küyimki api thüyam ching arükhea, ajingyanrübonü api ki mükhingde keo, “Tümü thsükhi isanü api müyankhitkhukkhea?” 29Jumonü apinü arü ki tha, “Hadürü a tamkhüntamnü tüsho khümkeaknü lang yankhitkhukchoh.”

Jisunü Api Shepü Thalokhi

(Mt 17.22-23; Lk 9.43-45)

30Judüki arübo chamachihbah Galilee hode yü, tüsho apinü ju shenü she mümükheahshihnede alakheah. 31Tümüde apinü ajingyanrübo ki thsangyu tüsho arü ki tha, “Mihtsürü Tsührü ju mihtsürübo khah ching yukjihbah, tüsho arünü api laksahbah, tüsho api laksah dunglim, asam nipü arhang kamlobah.” 32Tüshe arünü ha thakhi manikhit, tüsho api ki keopü trede alakheah.

Shepü Atobe a?

(Mt 18.1-5; Lk 9.46-48)

33Arünü Kapernaum ching arü; tüsho küyimki api thüyam ching lakhea, apinü arü ki keo, “Limro ching nüsa tümü atsangachihde alakhea?” 34#Lk 22.24Tüshe arünü zhikde la; tümüde limro ching arünü shepü atobe a de khülangnü khülang ki atsangachih. 35#Mt 20.26,27; 23.11; Mk 10.43,44; Lk 22.26Tüsho apinü binbah thürükheak mahne ju ji, tüsho arü ki tha, “Khürünü akhuh kamnesho, apinü alala kheaknü ashubuh tüsho alala yamlarü thsübeah.” 36Judüki apinü azürü nunu khülang bea lu tüsho arü bolung zhipshih. Tüsho küyimki apinü adubuh kheak shuh-a lukhea, apinü arü ki tha, 37#Mt 10.40; Lk 10.16; Jhn 13.20“Shepünü harü azürü anini bolung khülang I mung chingnü aleangkhibanü, I leangkhichoh; tüsho shepünü I leangkhichonü, I yung, tüshe I thiyibuh leangkhichoh.”

Isa Mazhihrü Isa thsungkheak

(Lk 9.49-50)

38Johannü alo, “Thsangyurü, isa dunglim müyamrü khürünü nü mung ching amünean me yankhitkhi isanü ngüdo, tüsho api tukloshihpü isanü yankhido.” 39Tüshe Jisunü tha, “Api düyanlo, tümüde shepünü I mung ching khinthiyinbe rhimochonü, ashulim nahde I dünkheak amütsü müthakhukde alabah. 40#Mt 12.30; Lk 11.23Tümütüsho shepünü isa mazhihnü isa kilim tsanglah. 41#Mt 10.42Nüsa Khrista yo thsümonü shepünü nüsa kilim ke pung khülang jih-a yungshihbanü, atsütsü inü nüsa ki thachoh, küdüküdü she api thsambah müdükheak.

Neak Yihbeakkhi Rükaki

(Mt 18.6-9; Lk 17.1-2)

42“Tüshe shepünü I kheak kinrü harü anini bolung khülang jing mükheshihbanü, api hung ching hizübe-lung khülang chingkihbah keto asük ching yüzahkhi atsübe labah. 43#Mt 5.30Tüsho nü khahnü neak yihbeakshihsho, ju lipkhia bahang. Nü khah mahne kihbah amümütbe motru, athsümüchipung ching yüzahpü dün a, mabande rhangdung lapung ching yüzahkhi atsübe– 44ju ching arü muso müshe tüsho mo mümütchoh. 45Tüsho nü jingnü neak yihbeakshihsho, ju lipkhia bahang. Nü jing mahne kihbah amümütbe motru, athsümüchipung ching yüzahpü dün a, mabande rhangdung lapung ching yüzahkhi atsübe– 46ju ching arü muso müshe tüsho mo mümütchoh. 47#Mt 5.29Tüsho nü müknü neak yihbeakshihsho, ju khünkhita bahang. Mük mahne kihbah athsümüchi motru ching jipyukpü dün a, mük khülang kihbah Thrünpuh kiulongthsü ching yüzahkhi atsübe– 48ju ching arü muso müshe tüsho mo mümütchoh.

49“Laksah-a kingaünkhi ju thiminü atsangkhitkhi nangde mihbüm aban monü atsangkhitbah. 50#Mt 5.13; Lk 14.34,35Thimi ju tsülah, tüshe ju amüsüpkhi dükheakabahsho, nünü küde thsah akeloshihba? Nüsa kheak thimi lashang, tüsho khülangnü khülang ki mungtsü laang.”

Currently Selected:

MARK 9: YIMCBSI

Highlight

Copy