MARK 8

Chithürü Phüyi Yimkipkhi

(Mt 15.32-39)

1Judüki nimungbo ching, kheaküshe yimto ato mukhung, tüsho arübo atsühpü mülakhinü apinü ajingyanrü jibah tha, 2“Inü botobo muzholah, tümütüsho arübo nimung mahsam I lung lado tüsho atsühpü müla. 3Tüsho inü arübo khümde arü yam lim yüshihsho, arübo limro ching khümkeakabahbah; tümüde arü khürü a limshu chingnü arüa lah.” 4Judüki api jingyanrübonü alo, “Harü mihtsürü bukthsüshihpü thsüde ha sunglo ching küde thsah yikhap suhdahde angüpü?” 5Apinü arü ki keo, “Nüsa yikhap küdükhüh la?” Tüsho arünü 7 lah de alo. 6Tüsho apinü boto ju alo kheak binpü thiyukhüm jih. Apinü yikhap 7 ju lu tüsho makshe jihbah yihnak tüsho boto ahiuhshihpü jingyanrübo kilim jih; tüsho arünü jude rhimo. 7Tüsho arü thüngüh anükhüh lakheah, Jisunü makshe jihbah ju she arü ki ahiuhpü tha. 8Junangde arünü bukthsüde tsüh, tüsho aningkhi adütrebo muluk 7 hanmukhung. 9Yimtsührü mihtsürü 4000 bande alakheah. Tüsho apinü arü thiyia tsoshih. 10Tüsho nahdü lang apinü jingyanrü lung sangkung ching yüzah tüsho Dalmanutha lomi ching yü.

Amütsan Khülang Kheangkhi

(Mt 16.1-4)

11 # Mt 12.38; Lk 11.16 Tüsho Pharisirünü arübah api ki atsangachihpü tankih. Api rükakide yinmi chingnü amütsan khülang kheang. 12#Mt 12.39; Lk 11.29Tüshe apinü me chingnü sükde lümbah tha, “Tümü thsükhi ha lünnü amütsan kheangcho? Atsütsü inü nüsa ki thachoh, ha lün kilim amütsan tümü müjih.” 13Tüsho arünü chamachihbah sangkung ching yüzahlo, tüsho püpü thrip yü.

Pharisirü tüsho Herod Phaüm

(Mt 16.5-12)

14Jingyanrübonü yikhap lupü mihabah, tüsho arü lung sangkung ching yikhap 1 kheak hode mülakheah. 15#Lk 12.1Judüki apinü arü neangneangde tha, “Aniang, Pharisirü tüsho Herod phaüm dünkheak kümkangang.” 16Jumonü arünü arü bolung lümakheahde tha, “Ha isa yikhap mülamonü ah.” 17Tüsho Jisunü ju mükheahbah tha, “Nüsa yikhap mülamonü tümüde nüsanü thaachihcho le? Nüsanü kheaküshe mümükheah de yungsho manikhit de? Nüsa mulong kheaküshe müküpla de? 18#Mk 4.12Mükbo labah, nüsanü müngü de? Tüsho nükhünbo labah, nüsanü musocho de? Tüsho nüsanü mülümkhitcho de? 19Küyimki inü 5000 thsungkheak yikhap 5 yihnakkhea, nüsanü adütre muluk küdükhüh mide hanmukhungkhea?” Arünü api ki, 12 de alo. 20“Tüsho küyimki inü 4000 thsungkheak yikhap 7 yihnakkhea, nüsanü adütre muluk atoto küdükhüh hanmukhungkhea?” Tüsho arünü, 7 de alo. 21Jumonü apinü arü ki tha, “Nüsanü kheakü khiungde manikhityi de?”

Bethsaida ching Müktukrü Thsüngukhi

22Judüki api Bethsaida ching arü; tüsho arünü api kilim müktukkhi mihtsürü khülang bedarü tüsho api kheak qiupü mushu. 23Apinü müktukbuh ju akhah kheaknü thoa lubah kiulong chingnü wukhiuk. Küyimki apinü mihtsürü mük kheak mukhiukkihkhea, tüsho akhahnü api qiukhea, Jisunü keo, “Nünü tümükhüh ngünah?” 24Apinü abinkih-a kheah tüsho tha, “Inü mihtsürü ngüchoh; tüshe arübo sangdungbo nangde tsahchoh.” 25Jisunü khülang ki mihtsürü mükbo ching akhahnü qiu tüsho abinkih-a kheahshih. Tüsho api tsüde kambah lüpdükhi mütsande ngü. 26Tüsho apinü ayam lim thiyia yüshihde tha, “Kiuto ching düyü yungsho kiuto ching she ki she dütha.”

Peternü Jisu dünkheak Khipkhitkhi

(Mt 16.13-20; Lk 9.18-21)

27Kheakü Jisu tüsho ajingyanrübo Kaesarea Filipi kiuto ching wukhiuk; tüsho limro ching apinü ajingyanrübo ki keo, “Mihtsürübonü I she ah de thacho?” 28#Mk 6.14,15; Lk 9.7,8Tüsho arünü alo, “Johan Baptijihbuh; tüshe khürünü tha, Elija; tüsho khürünü wukihrü bolung khülang ah de tha.” 29#Jhn 6.68,69Apinü arü ki tha, “Tüshe I ju she ah de nüsanü thacho?” Peternü api ki alo, “Nü a Khrista ah.” 30Judüki api dünkheak she ki dütha de arü ki thiyukhüm jih.

Jisunü Api Thsünüpü tüsho Ashepü Thakhi

(Mt 16.21-28; Lk 9.22-27)

31Tüsho apinü Mihtsürü Tsührü ju khide thsünübah, azothsürü le amükeam putungrü tüsho athrütrübonü abahyukbah, alaksahbah, tüsho nimung mahsam dunglim asürülobah de arü ki thsangyupü tankih. 32Apinü ha yu amikheak akhiukde tha. Tüsho Peternü api bemuwuhbah athürühpü tankih. 33Tüshe küyimki apinü rholobah ajingyanrübo kheak kheahkhea, apinü Peter ki thürühde tha, “I dunglim yüang, Arimri! Tümüde nünü Thrünpuh yungde mihtsürü dünkheak lümrhihchoh.”

34 # Mt 10.38; Lk 14.27 Judüki Jisunü boto le jingyanrübo api kilim jibah tha, “Shepünü I dunglim arüpü künlanü, api küdah thsüde danyukbah nihbuh sangkim shuhang, tüsho I yanang. 35#Mt 10.39; Lk 17.33; Jhn 12.25Tümüde shepünü nihbuh rhangdung khümkhitpü künbanü ju adükheakbah, tüshe shepünü I tüsho thiyusheak-atsü dünkheak nihbuh rhangdung dükheakchonü akhümkhitbah. 36Tümütüsho mihtsürü khülangnü alomiküp athrünkhi alü thsübah nihbuh me dükheaksho api tümü alü thsüba? 37Yungsho mihtsürü khülangnü nihbuh rhangdung müthri tümü jihba? 38Tümütüsho shepünü ha yüliyüra tüsho neak lakhi lün ching I tüsho I yubo dünkheak achihbanü, amüsüh yunirübo bede Abuh müretahkhi ching api arüchoki Mihtsürü Tsührünü anihbuh dünkheak achihbah.”

Currently Selected:

MARK 8: YIMCBSI

Highlight

Copy