MARK 11

Jirusalem ching Akuk Ngüde Yüzahkhi

(Mt 21.1-11; Lk 19.28-40; Jhn 12.12-19)

1Küyimki arübo Jirusalem phüni Oliv Müzüng ching, Bethphage tüsho Bethani ching arükhea, apinü ajingyanrü mahne thiyia yüshih; 2tüsho apinü ane ki tha, “Nüke mikhuh lakhi kiulong ching yüzahang, tüsho nüke yüzah yanalünde shenü mübinkhi donki nunu khülang chinga ngübah. Ju trünang tüsho bebah arang. 3Tüsho khürünü nüke ki, ‘Tümü thsükhi nükenü ha rhimocho?’ de thasho, ‘Atungpuhnü ha yihnüpü lah,’ de thaang tüsho nahdü lang apinü ha ching arüshihbah.” 4Jumonü anenü limro ching yü, tüsho kiudunglimro ching khimdopü ki donki nunu khülang chinga zokhi ngü; tüsho anenü ju trünkhi. 5Tüsho ju kheak zhiprü khürünü ane ki tha, “Nükenü donki nunu tümü thsüpü trüncho?” 6Jumonü Jisunü thiyukhüm jihkhi nangde anenü arü ki tha. Tüsho arünü bebah yüshih. 7Jushu anenü donki nunu ju Jisu ki bedarü tüsho ju kheak arü khimmihbo phukih, tüsho apinü ju kheak bin. 8Tüsho ahihkhühnü arü khimmihbo limro kheak khima zo, tüsho püpürünü sangdungbo kheaknü akhahbo ngamkhi tüsho limro kheak khima zo. 9Judüki mikhuh tüsho dunglim yürübonü zhide tha, “Hosanna! Atungpuh mung ching arübuh shiang! 10Atungpuh mung chingnü arüde alakhi isa abuh David kiulongthsü müngühmühi thsang! Achangbe chingnü shiang!”

11Jisunü Jirusalem ching yübah arüngyam ching yüzah. Jumonü küyimki apinü alala mükamde akheahkhea, kim ashukhinü apinü thürükheak mahne bebah Bethani ching yü.

Jisunü Khubasodung Athrukhi

(Mt 21.18-19)

12Ashidopü, arü Bethani chingnü akhiukchoki, api khümde alakheah. 13Tüsho limshunü khubasodung ayü kihde ngübah aso kihnahnü de akheahpü yü. Küyimki api ju ki arükhea, ayübo kheak hode apinü tümü müngü, tümüde ju khubaso asopü kim yungde alakheah. 14Judüki apinü khubasodung ki tha, “Kheaküa shenü she nü kheaknü aso dütsühshih.” Tüsho api jingyanrübonü ju so.

Jisu Arüngyam ching Yükhi

(Mt 21.12-17; Lk 19.45-48; Jhn 2.13-22)

15Jumonü arübo Jirusalem ching arü. Tüsho Jisunü arüngyam ching yüzahbah shothsümolorübo yankhitpü tankih, tüsho sho-müthrirü dükhümbo le müthrithrümpü yinrübo binkiu thülah-a bahjih. 16Tüsho apinü sheshe arüngyam kinü kukruk mühanhoshih. 17Judüki apinü arü ki thsangyude tha, “ ‘Trükshih alala thsungkheak I yam ki tamkhüntamnü yam de ajihbah’ de thrüta müla de? Tüshe nüsanü ju ahührü jikpung kamshihdo.” 18Tüsho yakzan thsangyurübo le amükeam putungrübonü ju sobah api laksahpü rük yim; arünü api trede alakheah, tümütüsho mihtsürü alalanü api thsangyukhi kheak müyinsahde alakheah. 19Tüsho küyimki arelim kamkhea, apinü kiuto chingnü wukhiuk.

Khubasodung kheaknü Anikhitbe

(Mt 21.20-22)

20Ashido yapsu arübo tsahhode alachoki, arünü khubasodung ju aying chingnü yiuh-a ngü. 21Tüsho Peternü lümkhitde api ki tha, “Thsangyurü, kheahang! Nünü athrukhi khubasodung thsü yiuh-a lah.” 22Jumonü Jisunü arü ki alo, “Thrünpuh kheak akin laang. 23#Mt 17.20; 1 Kor 13.2Atsütsü inü nüsa ki thachoh, shepünü ha müzüng ki, ‘Shuhakhinang tüsho keto ching jipyukang’ de thacho, tüsho api mulong ching müdukiuhlode apinü tümü thachonü adünjipü kinsho, api thsungkheak ju rhimobah. 24Jumonü inü nüsa ki thachoh, tümüpürü nüsanü tamkhüntamnüde akheangbanü nüsanü jurü leangkhipü akin laang, tüsho nüsanü jurü ngübah. 25#Mt 6.14,15Tüsho küyimki nü zhipbah tamkhüntamnüba, khürü kheak nü azhihkhi tümükhüh lasho, api neak bahjang, junangde yinmi ching nü Buhnü she nü neak bahjihbah. 26Tüshe nünü neak mübahjihsho, yinmi ching nü Buhnü she nü neak mübahjih.”

Jisu Thiyukhüm-sühmüh Keokhikhi

(Mt 21.23-27; Lk 20.1-8)

27Judüki arübo Jirusalem ching alode arü. Tüsho api arüngyam ching tsahde alachoki, amükeam putungrübo, yakzan thsangyurübo, tüsho azothsürübo api kilim arü. 28Tüsho arünü api ki tha, “Tümü thiyukhümsühmühnü nünü harü rhimocho? Tüsho harü rhimopü thiyukhümsühmüh shenü nü kilim jihkhea?” 29Tüshe Jisunü arü ki alo, “Inü she nüsa ki khülang keokhibah; I ki aloang tüsho tümü thiyukhümsühmühnü inü harü rhimochonü nüsa ki thabah: 30Johannü baptijihkhi ju yinmi chingnü a shi mihtsürü kilimnü a? I ki aloang.” 31Tüsho arünü arü bolung lümakheahde thaachih, “Yinmi chingnü de thasho, judüasho tümüde nüsanü api kheak mükinkhea de apinü athabah. 32Tüshe arünü mihtsürü kilimnü de athapü she mihtsürübo tre, tümüde alalanü Johan ju wukihrü khejih.” 33Jumonü arünü Jisu ki alo, “Isanü mümükheah.” Tüsho Jisunü arü ki tha, “Inü tümü thiyukhüm-sühmühnü harü rhimochonü nüsa ki she mütha.”

Currently Selected:

MARK 11: YIMCBSI

Highlight

Copy