MATHI 9

Jisunü Thripshe Tukthsürü Thsüngukhi

(Mk 2.1-12; Lk 5.17-26)

1Jisunü sangkung ching yüzahbah keto hode yü, tüsho anihbuh kiuto ching arü. 2Mihtsürü khürünü thripshe tukthsürü khülang yapkiu kheak yapshihbah api kilim bedarü. Küyimki Jisunü arü akin ngükhea, apinü thripshe tukthsübuh ki tha, “Mulong toang I tsah-a; nü neakbo bahjihdo.” 3Ha dünkheak yakzan thsangyurübonü arü küdah thsüde lüm chingnü tha, “Ha mihtsürünü Thrünpuh mükhemürangchoh!” 4Tüshe Jisunü arü lümkhi mükheahbah tha, “Tümü thsükhi nüsa mulongbo ching amütsü lümcho? 5Tümütüsho, ‘Nü neakbo bahjihdo,’ yungsho ‘Asürang tüsho tsahang,’ de athakhi küpü amülübe laba? 6Junangde alomi ching neakbo bahjihpü Mihtsürü Tsührü wu lah de nüsanü amükheahbah”–judüki apinü thripshe tukthsübuh ki tha, “Asürang, nü yapkiu hanang tüsho nü yam lim yüang.” 7Tüsho apinü asürübah thüyam lim yü. 8Küyimki botonü ju ngükhea, arünü müyinsah, tüsho mihtsürü kilim hadürü wu jihbuh Thrünpuh shijih.

Jisunü Mathi Jikhi

(Mk 2.13-17; Lk 5.27-32)

9Jisu ju chingnü yüde alachoki, apinü ruk-threyam ching Mathi binde ngü. Apinü anihbuh ki tha, “I dunglim yanang.” Tüsho apinü asürübah api dunglim yan.

10 # Lk 15.1,2 Jisu ju Mathi yam ching yimtsühde alachoki, ruk-threrü ahihkhüh tüsho aneakrübo arübah api le ajingyanrübo lung yimtsüh. 11Küyimki Pharisirünü ha ngükhea, arünü api jingyanrübo ki keo, “Tümü thsükhi nüsa thsangyubuhnü rukthrerü tüsho aneakrübo lung yimtsühcho le?” 12Ju sobah Jisunü tha, “Phü tsürü thsungkheak thümürü yihnüpü müla, tüshe tukthsürü thsungkheak ah. 13#Mt 12.7Yüang tüsho ha amütsan anikhitang: Inü mihmüthsüm lunelah, tüsho laksah-a kingaünkhi yung. Tümütüsho amüsührü yungde amüneanrü jipü I arükheah.”

Khümkeak Thsükhi dünkheak Keokhikhi

(Mk 2.18-22; Lk 5.33-39)

14Judüki Johan Baptijihbuh jingyanrübo arübah Jisu ki keokhi, “Tümü thsükhi isa le Pharisirübonü khümkeak thsücho, tüshe nü jingyanrübonü khümkeak müthsücho?” 15Jisunü arü ki alo, “Yamkhünkambuh arü lung lachoki amüyamrübonü atüzhopü kukla de? Tüshe arü kinü yamkhün-kambuh bede atsopü nimungbo arübah, tüsho arünü khümkeak thsübah. 16Shenü she khim amürhüt kheak aso mükhüpkihchoh, tümütüsho akhüpkihkhi ju khim kheaknü rukkhichoh tüsho arukrüpkhi amütsübe kamshihchoh. 17Yungsho shenü she shihküp-keluh awün ching yukhu amühdo muyukchoh, jude thsüsho shihküp-keluh lahrüpbah tüsho yukhu ju müyeana bahbah, tüsho shihküp-keluh ju athsümünimbah. Tüshe arünü shihküp-keluh aso ching yukhu amühdo yukchoh, tüsho ane chido müthsümünimde lachoh.”

Atorü Tsührübe tüsho Aliberü Thsüngukhi

(Mk 5.21-43; Lk 8.40-56)

18Apinü arü ki harü thade alachoki, Jihudarü atorü khülang api ki arübah khukningde tha, “I tsührübe kheakü shea lah, tüshe arübah anihbe kheak nü khahnü qiuang tüsho alibe arhang labah.” 19Jumonü Jisunü wusubah api yande yü, tüsho api jingyanrübonü api lung yü. 20Tüsho zukleangnü kam thürükheak mahne thiyih müyande alakhi api dunglim arü tüsho api khim müngam kheak qiu; 21tümütüsho alibenü aküdah thsüde tha, “Inü api khim kheak qiusho, I tsüde angubah.” 22Tüshe Jisunü rholobah alibe ngü tüsho anihbe ki tha, “I tsührübe, mulong toang; nü akinnü nü ngudo.” Tüsho ju kim chingnü alibe ju nguabah. 23Küyimki Jisu ju atorü yam ching yüzahbah khungpi khungrü tüsho mitripde alanajikhi ngükhea, 24apinü arü ki tha, “Atrütang, tümüde anünübe müshe, tüshe ayapshekhi lang lah.” Tüshe arünü api ki münejih. 25Tüshe küyimki boto ju wungdo yankhita bahkhea, apinü yüzahbah akhah kheaknü thoa lu, tüsho anünübe ju asürü. 26Tüsho ha yusheak lomi alala ching bukhide yü.

Müktukrü Mahne Thsüngukhi

27Küyimki Jisu ju chingnü chamachihkhea, müktukrü mihtsürü mahne api dunglim arübah zhide tha, “David tsührü, ike muzhoang!” 28Küyimki api thüyam lim arükhea, müktukrü mihtsürübonü api kilim arü. Jisunü ane ki tha, “Inü ha thsükhuklah de nükenü kincho shi?” Anenü api ki alo, “Am, Atungpuh.” 29Judüki apinü ane mükbo qiude tha, “Nükenü akinkhi nangde nüke kheak rhimoshang.” 30Tüsho ane mükbo khimshuh. Jisunü ane ki müküpde tha, “Ha she ki she dütha.” 31Tüshe küyimki arü chamachihkhea, anenü api dünkheak ju lomi alala ching thari.

Aduhrü khülang Thsüngukhi

32Arü wukhiukde alachoki, mihtsürü khülang amünean me yüzahbah thiyu müthakhukde alakhi Jisu kilim bedarü. 33Küyimki amünean me ju ayankhitkhea, mihtsürü junü thiyu tha, tüsho botonü müyinsahde tha, “Israel ching hanangde müdünjiakheah.” 34#Mt 10.25; 12.24; Mk 3.22; Lk 11.15Tüshe Pharisirübonü tha, “Ha amünean mebo atobuh hode apinü amünean mebo yankhitchoh.”

Rhimorübo Nüklah

35 # Mt 4.23; Mk 1.39; Lk 4.44 Jisunü arü sinagogbo ching thsangyude, kiulongthsü yusheak atsü thsangyuthsangrade tüsho tukthsü le phüthsüphürambo thsüngude kiutobo tüsho kiulongbo alala ching yü. 36#Mk 6.34Küyimki apinü botobo ngükhea, apinü arü muzhode lüm, tümütüsho arübo aneakrü mülakhi namfimihnubo nangde thsümütsüde tüsho arungrü mülade alakheah. 37#Lk 10.2Judüki apinü ajingyanrübo ki tha, “Yimlupü tode lah tüshe rhimorübo nüklah. 38Jumonü thulu yimlupung ching rhimorü arüshang de yimlu putungpuh ki nüsanü tamkhüntamnüang.”

Currently Selected:

MATHI 9: YIMCBSI

Highlight

Copy