MATHI 8

Aphamrü Khülang Thsüngukhi

(Mk 1.40-45; Lk 5.12-16)

1Küyimki api müzüng kheaknü akikhea, yimto atonü api yande yü. 2Judüki aphamrü mihtsürü khülang arü tüsho api miki khukningbah tha, “Atungpuh, nünü mulongsho I müsühkhitjang.”

3Jisunü api khah chunga yüshihbah mihtsürü ju qiude tha, “Inü mulonglah; müsühde kamang.” Tüsho zukleangnü api apham ju nguabah. 4Tüsho Jisunü api ki tha, “Aniang, nünü she ki dütha; tüshe nü limro ching yüang, amükeamrü ki nü huhang, tüsho Mosa yukhüm yande arü ki mütsan thsüpü thsambah jihang.”

Roman Torü Yamlarü Thsüngukhi

(Lk 7.1-10)

5Küyimki Jisu Kapernaum ching yüzahkhea, Roman torü khülang api ki arübah mushu, 6“Atungpuh, I yamlarü maphapkhukde thüyam ching atrebe thsünüde lah.” 7Tüsho Jisunü api ki tha, “I arübah tüsho api angubah.” 8Atobuhnü alo, “Atungpuh, nü I yam ching azahpü thsüde I müthülün. Tüshe thiyu khülang lang thaang, tüsho I yamlarü angubah. 9Tümüde I she I kumung atorü bukkhüp lakhi mihtsürü khülang, tüsho I bukkhüp bonungrübo lah. Inü khülang ki, ‘Yüang,’ de thasho api yüchoh, tüsho khülang ki, ‘Arang,’ de thasho api arüchoh. Inü I yamlarü ki, ‘Ha rhimoang,’ de thasho apinü rhimochoh.” 10Küyimki Jisunü ha sokhea, api müyinsah tüsho api dunglim yanrübo ki tha, “Inü nüsa ki thiyuro thachoh, ha ruk akin ato lakhi inü Israel ching müngü. 11#Lk 13.29Tüsho aniakhiuklim le aniyüzahlimnü ahihdo arübah yinmi kiulongthsü ching Abraham, Isak, tüsho Jakob ki binbah de inü nüsa ki thachoh. 12#Mt 22.13; 25.30; Lk 13.28Tüshe kiulongthsü ching larübo a amiting ching yankhita bahbah. Ju ching atripkhi tüsho hü mütrütkhi labah.” 13Judüki Jisunü atobuh ki tha, “Nü limro ching yüang, tüsho nünü akinkhi nangde nü thsungkheak ju rhimoshang.” Tüsho ju kim chingnü api yamlarü ju nguabah.

Jisunü Mihtsürü Ahihdo Thsüngukhi

(Mk 1.29-34; Lk 4.38-41)

14Küyimki Jisu ju Peter yam ching arükhea, aniube abe phütsaknü tukthsüde ayapkhi apinü ngü. 15Apinü alibe khah qiu, tüsho anihbe kheaknü phütsak tsoabah. Jushu alibe asürü tüsho arü mozümodoa kip.

16Küyimki arelim kamkhea, arünü api kilim amünean me yüzahkhi ahihdo bebah arü. Apinü thiyu khülangnü mebo yankhit, tüsho tukthsürü alala thsüngu, 17junangde Isaia wukihrünü athakhi dünjipü lakheah: “Apinü isa thsünübo lu tüsho isa tukthsübo han.”

Jingyanrü Thsüpü Thülünkhi

(Lk 9.57-62)

18Küyimki Jisunü api mükamde yimto ato ngükhea, apinü püpü thrip akhinpü thiyukhüm jih. 19Judüki yakzan thsangyurü khürü arübah api ki tha, “Thsangyurü, nü kürü ching yübanü inü nü yanbah.” 20Tüsho Jisunü api ki alo, “Rimrebo lungkhünbo lah, tüsho wuhnubo asapbo lah, tüshe Mihtsürü Tsührü a ku alampung müla.” 21Judüki api jingyanrü püpü arübah tha, “Atungpuh, I akhuhde yübah I buh kiuyuka bahanü.” 22Tüshe Jisunü api ki alo, “I dunglim yanang, tüsho asherünü arü asherü kiuyuka bahshang.”

Jisunü Chinthrüm Keamloshihkhi

(Mk 4.35-41; Lk 8.22-25)

23Küyimki api sangkung ching yüzahkhea, ajingyanrübonü api dunglim yan. 24Tüsho zukleangnü keto ching chinthrüm ato arü, junangde ke abükkhibonü sangkung ju müleamho. Tüshe api a yapshea lakheah. 25Judüki ajingyanrübonü api ki arü tüsho yihmusude tha, “Atungpuh, isa khümkhitang! Isa dükheakchoh!” 26Tüshe apinü arü ki tha, “O nüsa akin anikhüh larübo, nüsa tümü thsükhi trecho? Judüki apinü wusubah apungbo le keto thürüh tüsho akhimahekhi ato kamabah.” 27Tüsho mihtsürübonü müyinsahde tha, “Apung tüsho ketonü she anipü thsüde ha tümü mihtsürü a!”

Amünean Menü Aramkhi Mahne Thsüngukhi

(Mk 5.1-20; Lk 8.26-39)

28Küyimki api püpü thrip Gadara lomi lim arükhea, amünean me yüzahkhi mihtsürü mahne kiuyukbo chingnü api kilim arü. Ju limro shenü muhokhukpü thsüde ane ju khide amütsü lakheah. 29Anenü zhide tha, “Thrünpuh tsührü, nünü isa kheak tümü rhimonela? Akhukhi kim mukhiungyide isa thsümüchipü nü ha ching arükhea shi?” 30Arü kheaknü anükhüh limshude yübah kheaknu boto motsühmoyungde alakheah. 31Amünean mebonü Jisu ki mushu, “Nünü isa yankhitsho, kheaknu boto ching isa yüzahshang.” 32Apinü arü ki tha, “Yüang!” Jumonü arünü akhiukbah kheaknu boto ching yüzah, tüsho kheaknu boto alala lungrhün ching nanachihde keto lim yüki tüsho ke ching thüraksah. 33Kheaknu neakrübonü alihde yübah kiuto ching yüzah tüsho amünean me yüzahkhi mihtsürübo kheak dünjikhi she bede alala thaa huh. 34Judüki kiuto ching lüpdükhinü Jisu shorupü wukhiuk. Tüsho küyimki arünü api ngükhea, arü lomi chamde atsopü api ki mushu.

Currently Selected:

MATHI 8: YIMCBSI

Highlight

Copy