MATHI 10

Jingyanrü Thürükheak Mahne

(Mk 3.13-19; Lk 6.12-16)

1Jisunü api jingyanrü thürükheak mahne jimukhung, tüsho amünean mebo yankhitpü tüsho tukthsü le phüthsüphüram mungji alala ngushihpü arü kilim wu jih. 2Jingyanrü thürükheak mahne mung harü ah: akhuhbuh ju Peter de ajikhi Simon, tüsho aniurü Andria; Zebedee tsührü Jakob tüsho aniurü Johan; 3Philip tüsho Bartholoma; Thoma tüsho ruk-threbuh Mathi; Alphia tsührü Jakob, tüsho Thadia; 4Kananrü Simon, tüsho api thsungyukbuh Juda Iskariot.

Jingyanrübo ki Athiyikhi-rhimo

(Mk 6.7-13; Lk 9.1-6)

5Harü thürükheak mahne ki Jisunü thiyia yüshihde tüsho thiyukhüm jihde tha: “Khiungkerü bolung düyü yungsho Samariarü kiutobo ching düyüzah. 6Tüshe ju müthri Israel yamkhün dükheaka lakhi namfimihnubo kilim yüang. 7Tüsho nüsa yübah thsangyuthsangraang, ‘Yinmi kiulongthsü thüninde lah.’ 8Tukthsü thsünguang, apham kihrü müsühkhitang, asherü arhang kamloshang, amünean me yankhitang. Nüsanü akeangnü leangkhido, akeangnü jihang. 9Nüsa qiuqiuninibo ching suna, shotoyinchi, yungsho shoto tümü dühan; 10#1 Kor 9.14; 1 Tim 5.18nüsa limro thsungkheak qiuqiu yungsho pangkhümpü, yungsho jingkhümpü, yungsho tsobo alü dühan; tümüde rhimorü a nihbuh tsühyungpü ngüpü thülünlah. 11Kiuto yungsho kiulong kürü ching nüsa yübanü, ju ching shepü thülünlanü yimkhitang, tüsho nüsa mutsoyi khiungde ju ching laang. 12Nüsa thüyam ching yüzahchoki salüm jihang. 13Yamkhün ju thülünlasho, nüsa mungtsü ju kheak lashang. Tüshe müthülüna lasho, nüsa mungtsü nüsa kilim rholoshang. 14#Yunir 13.51Tüsho sherünü nüsa müleangkhiba yungsho nüsa yubo maniba, ju yam yungsho kiuto chingnü nüsa chamachihchoki, nüsa jing kheaknü asungthulung adan khia bahang. 15#Mt 11.24#Lk 10.4-12Tsükjide inü nüsa ki thachoh, mahkhap nimung Thrünpuhnü ju kiuto kheaknü Sodom tüsho Gomorra mihtsürü ki alü amüthsüm huhbah!

Thsümüchibebo Arüchoh

(Mk 13.9-13; Lk 21.12-17)

16 # Lk 10.3 “Kheahang, inü nüsa rimre bolung namfimihnubo nangde yüshihchoh. Jumonü phuruto nangde lümlung laang tüsho müthrithrümpü nangde lümlang thsang. 17#Mk 13.9-11; Lk 12.11,12; 21.12-15Tüshe mihtsürübo dünkheak kümkangang, tümüde arünü nüsa kiuthsü-binkiubo kilim jihbah tüsho sinagogbo ching nüsa rhapbah. 18Tüsho I dünkheaknü nüsabo ju kovünorbo tüsho kiulongthsürübo miki arü le khiungkerü ki amütsan thsüde bede arübah. 19Tüshe arünü nüsa ramchoki nüsanü küde athaba yungsho tümü thaba de mulong düsansan. Tümütüsho nüsanü tümü thabeanü ju kim ching nüsa kilim jihbah; 20tümüde ha nüsanü asukchoh yung, tüshe nüsa Abuh menü nüsa hode asukchoh. 21#Mk 13.12; Lk 21.16Kheakü keoniorünü keoniorü tüsho buhrünü tsührü ashepü ching jihbah; tsührübonü berübuhrü azhihde wusubah tüsho arü asheshihbah. 22#Mt 24.9; Mk 13.13; Lk 21.17; Mt 24.13; Mk 13.13Tüsho I mung dünkheaknü alalanü nüsa thraneanbah. Tüshe shepünü akheam khiungde arümbanü akhümkhitbah. 23Küyimki nüsa kiuto khülang ching thsümüchibanü, püpü khülang ching akhinang. Mihtsürü Tsührü marüchoki Israel kiuto alala ching nüsa rhimo mübande alabah.

24 # Lk 6.40; Jhn 13.16; 15.20 “Jingyanrü khülang ju api thsangyurü kumung yung, yungsho yamlarü khülang ju api putungrü kumung yung. 25#Mt 9.34; 12.24; Mk 3.22; Lk 11.15Jingyanrü khülang ju api thsangyurü nangde, yungsho yamlarü khülang ju api putungrü nangde alakhi asuhdah. Arünü thüyam putungpuh ki Beelzebub de jisho arünü nihbuh yamkhün ching küdükhüh she alü jiba!

Shepü ki Trebe a

(Lk 12.2-7)

26 # Mk 4.22; Lk 8.17 “Jumonü mihtsürübo ki dütre, tümüde amikheak makhiukpü tümü yihdoa müla, tüsho mümükheahpü tümü müyima müla. 27Tümüpürü inü amiting ching nüsa ki thachonü, animuro asukang, tüsho tümü nüsa nükhün ching sochonü, thüyam münbo kheaknü zhiang. 28Tüsho shepünü pang laksahcho tüshe me mülaksahkhuknü dütre. Tüshe shepünü me tüsho pang chido thsümüchi ching dükheakshihpü kuklanü api treang. 29Shonak 1 mo khüjak mahne müyincho de? Tüshe arü khülang she nüsa Abuhnü mümükheahde alo ching mayokhichoh. 30Tüshe nüsa ku ching kuyübo she alala khemütsande lah. 31Jumonü dütre; khüjak ahihdo kheaknü nüsa adün ahihbe ah.

Khrista Alokhikhi

(Lk 12.8-9)

32“Jumonü shepünü mihtsürübo miki I alokhibanü, yinmi ching labuh I Buh miki inü api alokhibah. 33#2 Tim 2.12Tüshe shepünü mihtsürübo miki I bahyukbanü, yinmi ching labuh I Buh miki inü api bahyukbah.

Mungtsü yungde Nuk

(Lk 12.51-53; 14.26-27)

34“Alomi ching mungtsü handarüpü I arükheah de dülüm. Mungtsü yung, tüshe nuk akhiukshihpü I arükheah. 35Tümütüsho tsührübonü arü buhrü azhihde, tsührübonü arü berü azhihde, tsühmeakrübonü arü ani azhihde wusushihpü I arükheah. 36Tüsho mihtsürü riribo ju nihbuh betsührü thsübah. 37Shepünü I kheaknü abuh yungsho abe alü muzhochonü I jingyanrü thsüpü müthülün. Tüsho shepünü I kheaknü tsührü yungsho tsührübe alü muzhochonü I jingyanrü thsüpü müthülün. 38#Mt 16.24; Mk 8.34; Lk 9.23Tüsho shepünü nihbuh sangkim hanbah I dunglim müyannü I jingyanrü thsüpü müthülün. 39#Mt 16.25; Mk 8.35; Lk 9.24; 17.33; Jhn 12.25Shepü nihbuh rhangdung ngüchonü ju adükheakbah, tüsho shepünü I dünkheaknü api rhangdung dükheakchonü ju angübah.

Thsambahbo

(Mk 9.41)

40 # Lk 10.16; Jhn 13.20; Mk 9.37; Lk 9.48 “Shepünü nüsa leangkhichonü I leangkhichoh, tüsho shepünü I leangkhichonü I thiyibuh leangkhichoh. 41Shepünü wukihrü khülang wukihrü mung chingnü leangkhibanü wukihrü thsambah ngübah. Tüsho shepünü thiyurolungki mihtsürü khülang thiyurolungki mihtsürü mung chingnü leangkhibanü thiyurolungki thsambah ngübah. 42Tüsho sherünü harü anini bolung khülang kilim I jingyanrü thsümonü kerüng pungkhüh lang she aduhbanü, inü nüsa ki thiyuro thachoh, tsükjide api thsambah müdükheak.”

Currently Selected:

MATHI 10: YIMCBSI

Highlight

Copy