MATHI 3

Johan Baptijihbuhnü Thsangyuthsangrakhi

(Mk 1.1-8; Lk 3.1-18; Jhn 1.19-28)

1Judüki Johan Baptijihbuhnü Judea sunglo ching thsangyuthsangrade arü, 2#Mt 4.17; Mk 1.15tüsho tha, “Mulong müthriang, tümüde yinmi kiulongthsü thüninde lah!” 3Tümüde Isaia wukihrünü athakhi ju api ah:

“Sunglo ching khülangnü azhikhi düsheak:

‘Atungpuh thsungkheak limro thsakhamang,

api limtsahpung mukhiungarihdo thsüjang.’ ”

4Johannü kemel nam phuyu, shihküpnü achim rüm; tüsho api tsühyungbe ju tangkhobo le mukhuke lakheah. 5Judüki Jirusalem, Judea alala, tüsho Jordan mühi lakhi alala chingnü api kilim arü 6tüsho arü neakbo alokhide apinü Jordan ching arübo baptijih.

7 # Mt 12.34; 23.33 Tüshe küyimki apinü Pharisirü tüsho Sadukirü ahihdo baptipü arükhi ngükhea, apinü arü ki tha, “Phuruto tsührübo! Shepünü nüsa bukakhiuk arüpü lakhi chingnü thaa tsoshihkhea? 8Jumonü mulong müthrikhi thülünde aso asoang, 9#Jhn 8.33tüsho nüsa küdah thsüde, ‘Abraham ju isa abuh ah,’ de athapü dülüm. Tümüde Thrünpuhnü harü lungbo kheaknü Abraham kilim tsührübo akhiukshihkhuklah de inü nüsa ki thachoh. 10#Mt 7.19Awü ju sangdungbo ying kheak dünkihbah lah, tüsho aso masokhi sangdung aban kiushakbah tüsho mo ching jipyukbah. 11Inü nüsa mulong müthrirü kenü baptijihchoh, tüshe shepü I dunglim arüchonü I kheaknü atobe, ajingkhümpübo inü ahanpü müthülün. Apinü Amüsüh Me tüsho monü nüsa baptijihbah. 12Api khah ching phürü shuhlah, tüsho apinü rhimopung tsüde amüsühbah tüsho api jakam ching hi hanmukhungbah; tüshe apinü atsütbo a amümütbe mo ching takbah.”

Jisu Baptikhi

(Mk 1.9-11; Lk 3.21-22)

13Judüki Jisunü anihbuhnü baptishihpü Johan kilim Galilee chingnü Jordan ching arü. 14Johannü api ki nimlode tha, “Nünü I baptipü yihnüpü lah, tüsho nü I kilim arücho de?” 15Tüshe Jisunü api ki alo, “Kheakü judü lang thsang; tümüde thiyuro-lungki alala dünjipü thsüde isa thsungkheaknü ha rhimopü alim lah.” Jumonü Johannü he de ani. 16Küyimki Jisu baptikhea, apinü ke chingnü nahde akhiuk; tüsho kheahang, api kilim yinmibo khimshuh, tüsho Thrünpuh Me müthrithrümpü nangde api kheak aki keamde apinü ngü. 17#Mt 12.18; 17.5; Mk 1.11; Lk 9.35Tüsho zukleangnü yinmi chingnü düsheak khülangnü tha, “Ha inü tsüde mulong keamkhi, amuzhokhi I tsührü ah.”

Currently Selected:

MATHI 3: YIMCBSI

Highlight

Copy